Ti Panangmatmat ti Biblia

Umdas Kadin ti “Panagbalin a Nasingpet”?

“IKAGKAGUMAAK ti agbiag a nasingpet,” kuna ti maysa nga agkabannuag a babai nga agnagan iti Allison. Kas kenkuana, adu ti mamati nga umanayen ti kasta a panagbiag tapno maay-ayo ti Dios.

Dadduma ti mangipagarup nga uray agbasolda iti nadagsen, awan aniamanna dayta iti Dios no la ket ta ad-adu ti naimbag nga aramidenda. Patienda a nalaklaka para iti Dios ti mangpakawan ngem iti mangkondenar.

Siempre, nagduduma ti panangmatmat ti tao iti “panagbalin a nasingpet.” Ngem ania ti kuna ti Biblia? Ania ti nasken nga aramidentayo tapno maay-ayotayo ti Dios? Ania ti kayat a sawen ti panagbalin a nasingpet iti imatang ti Dios?

Panagpaiwanwan iti Namarsua

Kas Namarsua kadatayo, kalintegan ni Jehova a Dios nga isu ti mangiwanwan kadatayo. (Apocalipsis 4:11) Iti Biblia, nangipaay ti Dios kadagiti linteg ken prinsipio a mangiwanwan iti kondukta ken panagdayawtayo. Kinuna ti Dios iti ilina: “Agtulnogkayo iti timekko, ket masapul nga aramidenyo ti bambanag maitunos iti isuamin nga ibilinko kadakayo; ket pudno unay nga agbalinkayto nga ilik ket siak agbalinakto a Diosyo.”—Jeremias 11:4.

No kasta, masapul nga adalentayo dagiti pagalagadan ti Dios ken iyaplikartayo dagita iti biagtayo tapno ibilangnatayo ti Dios a ‘nasingpet.’ Panunotenyo a kayatyo ti makigayyem iti maysa a tao. Natural laeng nga ammuenyo no kasano ti kayatna a wagas ti pannakatratona, sa kalpasanna aramidenyo no ania ti makaay-ayo kenkuana. Ipamatmat ti Biblia a kas kenni patriarka nga Abraham, mabalintayo ti makigayyem kenni Jehova—kas maysa a makaay-ayo kenkuana. (Santiago 2:23) Maysa pay, gapu ta nangatngato nga amang dagiti pagalagadan ti Dios ngem kadagiti pagalagadantayo, ditay namnamaen a balbaliwanna dagita tapno laeng maitunos kadagiti personal a pagalagadantayo.—Isaias 55:8, 9.

Ti Kinapateg ti Panagtulnog

Talaga kadi a saan a maay-ayo ti Dios no ditay ikankano dagiti “babassit” a bilinna? Nalabit a panunoten ti dadduma a saan a napateg ti panagtulnog iti sumagmamano a “babassit” a bilin. Nupay kasta, awan kadagiti linteg nga impaulog ti Dios ti maibilang a di napateg, kas ipasimudaag ti Biblia iti 1 Juan 5:3: “Daytoy ti kaipapanan ti ayat iti Dios, a tungpalentayo dagiti bilinna.” No aramidentayo ti amin a kabaelantayo a mangsalimetmet kadagiti amin a paglintegan ti Dios, maipakitatayo ti naan-anay a panagayattayo kenkuana.—Mateo 22:37.

Saan a kalkalikaguman ni Jehova nga agbalintayo a perpekto. No talaga a pagbabawiantayo dagiti basoltayo ken pagreggetantayo a di ulitenen dagita, sidadaan a pakawanennatayo. (Salmo 103:12-14; Aramid 3:19) Ngem mabalin kadi a gagaraentayo nga iyaleng-aleng ti sumagmamano a lintegna yantangay pampanunotentayo a makaluban dayta babaen ti panagtulnogtayo kadagiti dadduma a banag? Ipakita ti maysa a pagarigan iti Biblia a saan nga umiso dayta.

Ni Ari Saul iti Israel tinungpalna ti dadduma laeng kadagiti linteg ti Dios. Idi nakigubat kadagiti Amalekita, naibilin kenkuana a dina pulos ispalen ti dinguenda. Masapul a ‘papatayenna ida.’ Nupay natulnog kadagiti dadduma a bilin, sinalungasing ni Saul dayta a bilin ket inispalna ti “kasayaatan iti arban ken iti pangen.” Apay? Gapu ta isu ken dadduma kadagiti tattao tinarigagayanda dagitoy a dinguen.—1 Samuel 15:2-9.

Idi dinamag ni propeta Samuel no apay a saan a nagtulnog ni Saul iti bilin ti Dios, nagreklamo ni Saul ket kinunana a nagtulnoganna dayta. Sinaggaysana dagiti nasayaat a gapuananna ken dagiti tattao, agraman dagiti indatonda iti Dios. Inyimtuod ni Samuel: “Ad-adda kadi a pakaragsakan ni Jehova dagiti daton a mapuoran ken sakripisio ngem ti panagtulnog iti timek ni Jehova? Adtoy! Ti panagtulnog nasaysayaat ngem iti sakripisio, ti panangipangag ngem iti taba dagiti kalakian a karnero.” (1 Samuel 15:17-22) No kasta, saan a makaluban ti panagsukirtayo iti Dios uray no agidatdatontayo kadagiti sakripisio wenno agar-aramidtayo kadagiti nasayaat a bambanag.

Dagiti Pagalagadan ti Dios—Pammaneknek ti Ayatna

Gapu iti ayatna, saan a kayat ni Jehova a basta pugpugtuantayo no ania ti makaay-ayo kenkuana. Iti Biblia, nangted ti Dios iti nalawag a pagalagadan iti moral, a kasla kunkunana: “Daytoy ti dalan. Magnakayo iti dayta.” (Isaias 30:21) No surotentayo ti panangiwanwanna, maliklikantayo dagiti makaupay ken saan a natalged nga agsusupadi a kapanunotan dagiti tattao maipapan iti moral. Makapagtalektayo a kanayon a pagimbagantayo ti panangiwanwan ti Dios, a ‘mangisursuro iti pakagunggonaantayo.’—Isaias 48:17, 18.

Ania ti pagpeggadanna no mangipasdektayo iti bukodtayo a pagannurotan no ania ti makuna a “panagbalin a nasingpet”? Natawidtay amin ti tendensia nga agbalin a managimbubukodan. Mabalinnatayo nga allilawen ti pusotayo. (Jeremias 17:9) Mabalin a tagilag-anentayo ti pateg dagiti inted ti Dios a pagannurotan ket ibilangtayo dagita a narigat wenno nainget unay.

Kas pagarigan, mabalin nga agdenna ti dua a di kasado, a pampanunotenda a yantangay awan ti sabali a nairaman, personal a pangngeddengda dayta. Nalabit nga ammoda a saan a maitunos kadagiti pagalagadan ti Biblia ti inaramidda ngem mabalin a panunotenda a yantangay “awan ti sabali a nadangran,” saan met siguro a kagura dayta ti Dios. Mabalin a makullaapan ti isipda gapu iti derrepda ket dida makita ti kaipapanan ken pagdaksan ti inaramidda. Mamakdaar ti Biblia: “Adda dalan a nalinteg iti sanguanan ti maysa a tao, ngem dagiti dalan ni patay isuda ti tungpal dayta kalpasanna.”—Proverbio 14:12.

Impaay ni Jehova ti amin a lintegna gapu iti panagayatna kadagiti tattao ken gapu iti tarigagayna a mailikliktayo iti panagsagaba. Ti panangyaleng-aleng kadagiti pagalagadan ti Dios mainaig iti seksual nga imoralidad wenno iti dadduma a kondukta dina pinagbalin a naragragsak ken naballigi dagiti tattao. Pinagbalinna ketdi a komplikado unay ti biag ti adu a tattao. Iti sabali a bangir, ti panangannurot kadagiti linteg ti Dios tulongannatayo nga agbiag a nasin-aw ken mayadayotayo ti bagitayo ken dagiti sabsabali manipud iti saan a nesesita a pannakadangran.—Salmo 19:7-11.

No pudno met laeng a kayatyo ti agbalin a nasingpet iti panangmatmat ti Dios, aramidenyo ti amin a kabaelanyo a mangsurot iti panangiwanwanna. Iti kasta, mapaneknekanyo a mismo a “dagiti bilin [ni Jehova] saanda a makapadagsen.” —1 Juan 5:3.

NAPANUNOTMO KADIN?

◼ Apay a nasken a surotentayo ti panangiwanwan ti Namarsua?—Apocalipsis 4:11.

◼ Nasken kadi a tungpalentayo ti amin a bilin ti Dios?—1 Juan 5:3.

◼ Apay a saan a nainsiriban a datayo ti mangipasdek iti bukodtayo a pagalagadan iti moral?—Proverbio 14:12; Jeremias 17:9.

[Ladawan iti panid 21]

Tultuladenyo kadi ti panangmatmat ti Dios mainaig iti naimbag ken dakes?