Talaga Kadi a Nagbiagda iti Kasta Kapaut?

Sigun iti Biblia, nagbiag ni Adan iti 930 a tawen, ni Set iti 912 a tawen, ken ni Matusalem iti 969 a tawen—kurang la iti 31 a tawen ket sangaribun! (Genesis 5:5, 8, 27) Agpada ngata ti kapaut ti tawen idi ken iti kaaldawantayo, wenno ab-ababa idi, nalabit katupag dagiti bulbulantayo, kas iparipirip ti dadduma?

Paneknekan ti Biblia nga agpada ti kapaut ti tawen idi ken iti kaaldawantayo. Panunotenyo: No ti tawen idi ket kas iti kapaut ti bulantayo ita, nakaub-ubing a nagbalin nga amma dagiti sumaganad a nadakamat a lallaki: sakbay a naginnem ti tawen ni Quenan, ken nasurok la a lima ti tawen da Mahalalel ken Enoc.—Genesis 5:12, 15, 21.

Maysa pay, pinagduduma dagiti nagkauna a tattao ti aldaw, bulan, ken tawen. (Genesis 1:14-16; 8:13) Kinapudnona, ti detalyado a kronolohia nga inusar ni Noe tulongannatayo a mangammo no kasano kawatiwat ti maysa a bulan. No pagdiligen ti Genesis 7:11, 24 ken ti Genesis 8:3, 4, makitatayo a 150 nga aldaw ti kapaut ti lima a bulan, manipud iti maika-17 nga aldaw ti maikadua a bulan agingga iti maika-17 nga aldaw ti maikapito a bulan. No kasta, nabatad nga inusar ni Noe ti 30 nga aldaw kas kapaut ti maysa a bulan, ket 12 a bulan ti mangbukel iti maysa a tawen.—Genesis 8:5-13.a

Ngem kasano a makapagbiag dagiti tattao iti nasurok a 900 a tawen wenno nasursurok pay? Sigun iti Biblia, ti Dios pinarsuana dagiti tattao tapno agbiagda nga agnanayon. Ngem gapu iti basol ni Adan, immapay ti kinaimperpekto ken ipapatay iti sangatauan. (Genesis 2:17; 3:17-19; Roma 5:12) Dagidiay nagbiag sakbay ti Layus as-asidegda iti kinaperpekto ngem kadatayo ita, ket awan duadua a maysa daytoy a kangrunaan a rason no apay a napapaut idi ti biagda. Kas pagarigan, nagbiag ni Matusalem kalpasan ti pito laeng a kaputotan manipud kenni Adan.—Lucas 3:37, 38.

Ngem iti din agbayag, ikkaten ni Jehova a Dios ti amin nga epekto ti basol ni Adan kadagiti amin a mangipakpakita iti pammatida iti naiparukpok a dara ti Anakna, ni Jesu-Kristo. “Dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Wen, umad-adanin ti tiempo inton ti edad ni Matusalem a 969 ket kasla nakaab-ababa!

[Footnote]

[Graph iti panid 30]

(Para iti aktual a pannakaurnosna, kitaem ti publikasion)

1000

Matusalem

Adan

Set

900

800

700

600

500

400

300

200

100

Ti kaaduan a tawen ti tao