KAATIDDOG TI BIAG

Ti orihinal a panggep ti Dios ket agbiag koma ti tao iti agnanayon. Yantangay perpekto ti umuna a tao a ni Adan, adda gundawayna a mangtagiragsak iti atiddog a biag a saan a pulos agpatingga, agpannuray dayta iti panagtulnogna iti Dios. (Ge 2:15-17) Nupay kasta, gapu iti panagsukir ni Adan, naipukawna dayta a gundaway, ket ti intero a natauan a puli nagtawid iti basol ken ipapatay manipud ken Adan.—Ro 5:12.

Bayat ti Panawen Dagiti Patriarka. Idi panawen sakbay ti Layus, ti kaatiddog ti biag gistay dimmanon iti sangaribu a tawen. (Ge 5:5-29) Dagiti tattao nga as-asideg iti orihinal a kinaperpekto napapaut ti panagbiagda ngem kadagidiay ad-adayo iti kinaperpekto. Ti kapautan a biag a nairekord isu ti biag ni Matusalem, a nagbiag iti 969 a tawen. Kalpasan ti Layus, napartak nga immababa ti kaatiddog ti biag ti tao.

Impapan ti sumagmamano a tattao a ti kapaut ti tawen kadagidi tiempo sakbay ti Layus ket makabulan laeng. Nupay kasta, awan Nainkasuratan a pakaibatayan daytoy a panangmatmat. No koma ti tawen idi ket katupag ti makabulan nga addaan iti 30 nga aldaw, kayat a sawen daytoy nga awan pay walo a tawen ni Enos idi nagbalin nga ama, ket ti dadduma, kas kada Quenan, Mahalalel, ken Enoc, awan pay innem a tawenda idi nagputotda. (Ge 5:9, 12, 15, 21) Ipakita ti panamagdilig iti Genesis 7:11 ken Genesis 8:3, 4 a ti 150 nga aldaw ket katupag ti lima a bulan. Yantangay dakamaten met ti Biblia nga adda maika-10 a bulan, kalpasanna maysa nga 40-aldaw a periodo ken agarup dua a 7-aldaw a periodo kas limmabas iti las-ud daytoy a tawen, maikuna ngarud a ti tawen agpaut iti 12 a bulan.—Ge 8:5, 6, 10, 12-14.

Nanipud Tiempo ni Moises. Agarup 3,500 a tawenen ti napalabas, insurat ni Moises maipapan iti kaatiddog ti biag: “Kadakuada met laeng pitopulo a tawen dagiti aldaw ti tawtawenmi; ket no gapu iti naisangsangayan a kinabileg walopuloda a tawen, kaskasdi a ti panagreggetda agbanag laeng iti riribuk ken makapasakit a bambanag.” (Sal 90:10) Mainaig iti dayta, saan unay a nagbalbaliw ti kasasaad.

Iti sinigsiglon, saan a nagballigi dagiti panagregget ti tao a mangpaatiddog iti biagna. Nupay kasta, iti adu a daga, ngimmato ti mainanama a kapaut ti panagbiag. Gapuna, napaliiw da James Fries ken Lawrence Crapo: “Ngimmato ti promedio a kapaut ti biag idiay Estados Unidos manipud agarup 47 a tawen iti itatapog ti [maikaduapulo a] siglo agingga iti nasurok a 73 a tawen iti agdama, panagngato a nasurok a 25 a tawen. . . . Ti naannad a panangusig kadagitoy nga impormasion, nupay kasta, ipakitana a ti panagngato ti mainanama a kapaut ti biag ket imbunga ti pannakaikkat dagiti makagapu iti nasapa nga ipapatay imbes a ti pannakapaatiddog ti gagangay a kapaut ti biag.”—Vitality and Aging, 1981, p. 74, 75.

Agarup 2,000 a tawen ti napalabasen, kinuna ni Jesu-Kristo nga awan asinoman a ‘makabael a mangnayon iti maysa a kasiko iti kaatiddog ti biagna.’ (Lu 12:25) Nupay kasta, kinuna met ni Jesus: “Ti bambanag a di mabalin iti tao mabalin iti Dios.” (Lu 18:27) Babaen ken mammadto Isaias, impadto ti Dios: “Kas iti al-aldaw ti maysa a kayo kastanto ti al-aldaw ti ilik.” (Isa 65:22) Ket iti Isaias 25:8 naipadto a ti Dios “pudno nga alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.” Daytoy a kari naulit iti maudi a libro ti Biblia: “Ket [ti Dios] punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.”—Apo 21:4.

[Tsart iti panid 1303]

KAPAUT TI BIAG DAGITI PATRIARKA

Nagan

Genesis

Kapaut ti Biag

Adan

5:5

930

Set

5:8

912

Enos