Ti Kadi Kinapositibo Pasayaatenna ti Salun-atmo?

“Ti naragsak a puso naimbag nga agas,” insurat ti masirib nga ari ti Israel agarup 3,000 a tawen ti napalabasen. (Proverbio 17:22, Ti Biblia) Bigbigbigen ita dagiti doktor a nainsiriban dagita a naipaltiing a sasao. Ngem saan a naikasigudan ti “naragsak a puso” iti adu kadatayo.

Manmano kadatayo ti makaliklik kadagiti pakadanagan iti inaldaw a panagbiag, a mangituggod iti pannakapaay ken negatibo a panangmatmat. Nupay kasta, ipakita dagiti nabiit pay a panagadal nga iti laksid dagiti pakarigatan, nasayaat no agbalintayo a positibo.

Ti kinapositibo ket nadeskribir kas “panangmatmat a nabuyogan iti namnama; ti panangnamnama iti nasayaat a resulta.” No mapaay ti maysa nga optimistiko wenno addaan iti positibo a panangmatmat, ania ti reaksionna? Saanna a matmatan a permanente dayta a pannakapaay. Ngem saanna met a kayat a sawen a dina bigbigen ti pudno a mapaspasamak iti biag. Imbes ketdi, akseptaren ken usigenna dagiti bambanag. Kalpasanna, no ipalubos ti kasasaad, mangaramid iti panagbalbaliw wenno pasayaatenna ti kasasaad.

Ngem ti negatibo a tao masansan a pabasolenna ti bagina gapu iti pakarigatanna. Pagarupenna a permanente ti pakarigatanna ken bunga dayta ti kinamaag, kinakapuy, wenno kinalaadna. Pagbanaganna, pagarupenna a saan a pulos nga agballigi uray kasano ti panangikagumaanna.

Ti kadi panagbalin a positibo pasayaatenna ti salun-at ken kinataotayo? Wen. Iti 30 a tawen a panangadal iti nasurok a 800 a pasiente nga inaramid ti Mayo Clinic, Rochester, Minnesota, E.U.A., natakuatan dagiti sientista a nasalsalun-at ken napapaut ti biag dagiti optimistiko. Naammuan met dagiti managsirarak a dagiti optimistiko nalaklakada a daeran dagiti pakarigatan ken manmano nga agsagabada iti depresion.

Ngem saan a nalaka ti agbalin a positibo iti tengnga ti lubong a dumegdegdeg ti parikutna. Saan a pakasdaawan nga adu ti marigatan nga agbalin a positibo. Ania ti mabalin nga aramiden tapno marisut daytoy a parikut? Iti naipakuyog a kahon, adda sumagmamano a singasing a makatulong kenka.

Nupay ti kinaragsak saanna a marisut ti amin a sakit, makaipaay daytoy iti nasalsalun-at ken ad-adda a makapnek a biag. Kuna ti Biblia: “Amin dagiti aldaw daydiay naparigatan dakesda; ngem daydiay maay-ayatan ti pusona addaan padaya a patinayon.”—Proverbio 15:15.

[Kahon/Ladawan iti panid 26]

No Kasano ti Agbalin nga Ad-adda a Positiboa

◼ No pampanunotem a dimo matagiragsak ti maysa a banag wenno dika agballigi iti dadduma a proyekto, iwaksim dayta a kapanunotan. Ipamaysam ti isipmo kadagiti nasayaat a bambanag.

◼ Ikagumaam a tagiragsaken ti trabahom. Aniaman ti trabahom, kitaem daydiay aspetona a makapnek kenka.

◼ Makigayyemka kadagidiay positibo ti panangmatmatda.

◼ Tamingem dagiti kasasaad a kabaelam; bigbigem nga adda dagiti saanmo a kabaelan.

◼ Iti kada aldaw, mangisuratka iti tallo a nasayaat a bambanag a napasamak kenka.

[Footnote]