Mabilbilang Kadin ti Aldaw ti Planeta a Daga?
Ania ti sungbatmo iti sumaganad a saludsod?
Iti asidegen a masanguanan, dagiti kadi kasasaad ditoy daga ket
(a) sumayaat?
(b) saan nga agbalbaliw?
(c) kumaro?
IKAGKAGUMAAM kadi a taginayonen ti positibo a panangmatmatmo iti masanguanan? Adu ti pagimbaganna no aramidem dayta. Ipakita dagiti panagadal a dagidiay addaan iti positibo a panangmatmat ket nalalaing ken nasalsalun-atda. Natakuatan pay ketdi ti maysa a napaut a panagadal a dagidiay positibo ti panangmatmatda ket basbassit ti posibilidadna nga agsakit ti pusoda no idilig kadagidiay negatibo ti panangmatmatda iti biag. Dagita a natakuatan ket maitunos iti naisurat iti Biblia ginasut a tawenen ti napalabas: “Ti naragsak a puso naimbag nga agas; ngem ti sidudukot nga espiritu magmaganna ti tultulang.”—Proverbio 17:22, Ti Biblia.
Nupay kasta, adu ti marigatan nga agtalinaed a naragsak ken positibo gapu iti ibagbaga dagiti sientista a mapasamakto iti planeta a Daga. Usigem ti sumagmamano laeng kadagiti makapadanag a prediksion a maipadpadamag ita.
Agpegpeggad ti Planetatayo
Idi 2002, impakdaar ti mararaem nga Stockholm Environment Institute a no di ikankano ti sangatauan dagiti ar-aramidenna a mangparang-ay iti ekonomiana a makadadael iti aglawlaw, posible a mangpataud dayta “kadagiti kasasaad nga agresulta iti nakaro a panagbalbaliw ti klima ti planeta ken ti sistema ti ekolohia.” Innayon pay ti report a ti sangalubongan a kinapanglaw, agtultuloy a panagduduma ti kasasaad iti panagbiag, ken awan sardayna a pannakadadael dagiti gameng ti nakaparsuaan ket mabalin a mangisagmak iti sangatauan “iti agsasaruno a krisis iti aglawlaw, kagimongan, ken seguridad.”
Idi 2005, ti United Nations impakaammona iti publiko ti Millennium Ecosystem Assessment Synthesis Report. Dayta ti resulta ti uppat a tawen a sangalubongan a panagadal iti kasasaad ti Daga a nakipasetan ti nasurok a 1,360 nga eksperto manipud iti 95 a pagilian. Addaan dayta iti serioso a pakdaar: “Dagiti aktibidad ti tattao ket aglablabesen ti epektona iti nainkasigudan a maaramidan ti Daga. Gapuna, nasken a ditay koma tagtagilag-anen ti maaramidan dagiti sistema ti ekolohia ti planetatayo a mangsustiner iti biag dagiti sumarsaruno a henerasion.” Tapno malapdan ti didigra, kasapulan “dagiti dadakkel a panagbalbaliw kadagiti pagannurotan, institusion, ken ar-aramid a di pay narugian,” kuna ti report.
Ni Anna Tibaijuka a direktor ehekutibo ti United Nations Human Settlements Programme imbagana ti kapanunotan ti umad-adu a bilang dagiti managsirarak. Kinunana: “No kaskasdi nga awan ar-aramidentayo a pamuspusan, didigra ti agur-uray kadatayo.”
Adda Rasontayo nga Agbalin a Positibo
Dagiti Saksi ni Jehova a mangipabpablaak iti daytoy a magasin ket mamatida met nga asidegen dagiti dadakkel a panagbalbaliw a mangapektar iti daga. Nupay kasta, kombinsidoda a saan nga agresulta dagita a pasamak iti didigra no di ket mangyeg dagita kadagiti nagsayaat a kasasaad a di pay pulos natagiragsak ti sangatauan. Apay a positibo ti panangmatmatda? Agsipud ta agtalekda kadagiti kari a nailanad iti Biblia a Sao ti Dios. Imutektekam ti maysa kadagita a kari: “Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”—Salmo 37:10, 11.
Arapaap laeng kadi ti kasta a namnama? Sakbay a sungbatam dayta, usigem daytoy: Rinibu a tawenen ti napalabas, siuumiso nga impadto ti Biblia ti adu kadagiti kangrunaan a parikut a mapaspasaran ita ti daga ken ti sangatauan. Pangngaasim ta basaem dagiti teksto iti Biblia a nadakamat iti sumaganad nga artikulo, ken idiligmo ti ibagbagada kadagiti maim-imatangam a mapaspasamak iti lubong. Bayat nga ar-aramidem dayta, dumakkel ti panagtalekmo a ti Biblia ket siuumiso ti panangipakpakaunana kadagiti pasamak iti masanguanan.