Masuportaranto Ngata ti Daga Dagiti Masanguanan a Kaputotan?
BABAEN ITI MANNURAT TI AGRIINGKAYO! IDIAY CANADA
◼ Kalpasan ti uppat a tawen a naannad a panangadal kadagiti kangrunaan a sistema ti ekolohia iti lubong, maysa a grupo dagiti eskolar ken dagiti pangulo a mangad-adal iti kasasaad ti aglawlaw—a paset ti panagadal a maawagan iti Millennium Ecosystem Assessment [MA]—impablaakda ti umuna a reportda. Adtoy ti sumagmamano kadagiti konklusionda: Bayat ti napalabas a 50 a tawen, adu ti nagbalbaliwan ti sistema ti ekolohia ti daga gapu iti dumakdakkel a panagkasapulan iti taraon, nadalus a danum, troso, sag-ut, ken gas, isu a kasla saanen a kabaelan ti daga a suportaran dagiti masanguanan a kaputotan. Naapektaran ti natural nga abilidad ti planeta a Daga a mangpabunga kadagiti mula, mangdalus iti angin babaen kadagiti atap a mulmula, ken mangproseso kadagiti substansia babaen kadagiti taaw. Adu a kita ti muyong ken animal ti dandani met maungawen.
“Kasta unay ti panangdangran ti tao iti planeta a posible a mangyeg iti kellaat a pannakadadael ti sumagmamano a sistema ti nakaparsuaan a mabalin a pakaigapuan ti sakit, pannakakalbo ti kabakiran, wenno pannakaungaw dagiti parsua iti dadduma a paset ti baybay,” kinuna ti periodiko a Globe and Mail iti Canada. Kinunana pay: “Dagiti baresbes, kabakiran, kapanagan, sabangan, pupokan iti igid ti baybay ken dadduma pay a lugar a mangdalus iti angin, danum ken dagiti sustansia a mangbibiag iti amin a parsua ket nakaro ti pannakadadaelda nga uray la din maisubli iti sigud a kasasaadda.” Nupay ibagbaga dagiti direktor ti MA a kabaelan ti tao a kissayan ti pannakadadael ti sistema ti ekolohia, ibagada a tapno maibanag dayta “masapul ti dakkel a panagbalbaliw iti panangtrato ti tao iti nakaparsuaan.”
Masalbar pay ngata ti planeta a Daga? Wen! Kas mangay-aywan iti pinarsua ti Dios, ikagumaantay koma a raemen ti aglawlaw. (Salmo 115:16) Nupay kasta, maisubli laeng ti natimbeng a kasasaad ti sistema ti ekolohia babaen ti pannakibiang ti Dios. Ikari ti “Naindaklan a Nangaramid” kadatayo nga iturongna ti atensionna ditoy daga tapno ‘ipaayanna daytoy iti kinaruay.’ (Job 35:10; Salmo 65:9-13) Karaman iti dayta ti baybay ken ti amin a parsua nga agbibiag iti dayta agsipud ta kas Namarsua, kontrolado ni Jehova a Dios dagiti taaw. (Salmo 95:5; 104:24-31) Sigurado a matungpal dagiti karina agsipud ta ti Dios “saanna a mabalin ti agulbod.”—Tito 1:2.
Makaliwliwa a maammuan a kabaelan ti daga a suportaran dagiti masanguanan a kaputotan. Daytoy ti mangtignay iti amin nga agbuteng iti Dios a mangidaydayaw kenkuana gapu iti aglaplapusanan a kinasirib, pannakabalin, ken kinaimbagna ken mangitan-ok kenkuana gapu iti panagayatna iti amin a pinarsuana.—Salmo 150:1-6.
[Picture Credit Line iti panid 12]
Globo: Rinetrato ti NASA