Ti Laeng Dios ti Makasalbar iti Daga

“RUMIMATRIMAT NGA ASUL KEN PURAW A SANIATA.” Kasta ti panangdeskribir ti astronaut a ni Edgar Mitchell iti dagatayo idi nakitana dayta iti nakasipsipnget a law-ang.

Ti Dios insaganana a naimbag ti daga a pagtaengan ti tao. Idi naparsuan dayta, natignay dagiti anghel nga agdir-i “buyogen ti panangpadayaw.” (Job 38:7) Kalpasan a maammuantayo dagiti nakaskasdaaw a banag maipapan iti planetatayo, adda met panggapuantayo a mangaramid iti kasta a panangpadayaw. Adu dagiti komplikado a sistema ti ekolohia a mangsussustiner iti biag ditoy daga. Iti maysa kadagiti pagaammo unay a sistema, dagiti berde a mula agus-usarda iti lawag ti init, carbon dioxide manipud iti angin, ken danum tapno makaaramidda iti taraon. Agresulta dayta a proseso iti pannakairuar iti atmospera ti elemento nga oksihena​—banag a nakapatpateg iti biagtayo.

Sigun iti Biblia, ti Dios dinutokanna ti tao a mangaywan iti daga. (Genesis 1:28; 2:15) Ngem tapno agtalinaed a balanse ti sistema ti ekolohia, masapul nga umiso ti kababalin ti tao. Kinapudnona, nasken nga ipategna ti pagtaenganna a daga. Nasken a kayatna a manteneren ti napintas a kasasaad dayta. Ngem naipaayan ti tao iti wayawaya nga agpili, isu a mabalinna a pilien no kayatna nga abusuen ken baybay-an ti daga. Ket kasta nga agpayso ti ar-aramidenna. Makadidigra dagiti resulta ti kinaawan pannakaseknan ken kinaagum ti tao.

Adtoy ti sumagmamano kadagiti parikut nga imbunga dayta: (1) Gapu iti pannakakalbo dagiti kabakiran, maap-apektaran ti abilidad ti daga a mangagsep iti carbon dioxide, a mabalin a mangpakaro iti dumakdakes a kasasaad ti paniempo. (2) Gapu iti aglablabes a panagusar iti pestisidio, bumasbassit ti populasion dagiti insekto a makatulong iti naannayas a panagandar ti nadumaduma a sistema ti ekolohia, agraman ti polinasion dagiti mula. (3) Gapu iti aglablabes a panagkalap ken polusion kadagiti baybay ken karayan, rumasrasayen dagiti ikan ken lames. (4) Gapu iti naagum a panagusar kadagiti gameng ti nakaparsuaan ditoy daga, bassitto laengen ti matda para kadagiti masanguanan a henerasion ken maipagarup nga agresulta dayta iti naparpartak a panagbara ti globo. Ipatuldo ti dadduma a maseknan iti kasasaad ti aglawlaw a ti pannakarunaw dagiti glacier ken panagsisina dagiti iceberg idiay Arctic ken Antarctica ket ebidensia a bumarbara ti globo.

Gapu ta umad-adu dagiti natural a didigra, nalabit kuna ti dadduma a bumalbales ti daga isu a madiddidigra ti tao. Inted ti Dios kadatayo ti daga. Kinapudnona, saan a pulos nga agpabpabayad iti panamagtaengna kadatayo ditoy. (Genesis 1:26-29) Nupay kasta, ipakita dagiti agdama a kasasaad iti lubong a saan a tartarigagayan ti adu a tattao a manteneren ti napintas a daga a pagtataenganda. Imbes ketdi, ti tao ket makumikom kadagiti inaagum a tarigagay ken aramidna. Kinapudnona, ipakpakitana nga isu ket dakes nga agindeg ta ‘daddadaelenna ti daga,’ kas naipadto iti Apocalipsis 11:18.

Ipakita ti padto ti Biblia a ti Mannakabalin-Amin a Dios a ni Jehova, ti Namarsua kadagiti sistema ti ekolohia a mangsussustiner iti biag, ket nangikeddengen iti tiempo nga ikisapna dagiti dakes nga agin-indeg ditoy daga. (Sofonias 1:14; Apocalipsis 19:11-15) Sakbay a naan-anay a dadaelen dagiti tao ti intero a daga, agtignayto ti Dios iti tiempo a nasapsapa ngem iti ipagaruptayo.a (Mateo 24:44) Wen, ti laeng Dios ti makasalbar iti daga.

[Footnote]