Manipud Kadagiti Agbasbasa
Inton Awanen ti Sakit! (Enero 2007) No kunayo a dadduma a tattao “ti mangsayang iti kuarta ken panawenda kadagiti panangagas ken agas a saan a makapaimbag wenno makadangran pay ketdi,” nalabit a tuktukoyenyo dagiti alternatibo a kita ti panangagas, yantangay us-usigen ti artikulo no epektibo ken natalged met laeng ti dadduma a kita ti alternatibo a panangagas. Kayatna kadi a sawen nga iparparegta ti Agriingkayo! a nataltalged ken mas epektibo ti panagpaagas kadagiti doktor? Sigun iti U.S. General Accounting Office, adu ti pammaneknek a saan a pudno dayta.
G. C., Estados Unidos
Sungbat ti “Agriingkayo!”: Adu a maawat a kita ti panangagas a naibilang idi a natalged ken epektibo ti napaneknekan a saan a natalged idi agangay. Napaneknekan dayta agpadpada iti panagpaagas kadagiti doktor ken iti alternatibo a kita ti panagpaagas. Aniaman kadagita, nainsiriban nga ammuem no ania dagiti pagimbagan ken pagdaksan ti tunggal kita ti panagpaagas, ket piliem ken siguraduem a saan a maisalungasing dayta kadagiti prinsipio ti Biblia. Personal a pangngeddengmo dayta. Kas iti namin-adu a naibagamin, awan ti partikular a kita ti panangagas nga iparparegta ti “Agriingkayo!” Saan met koma a kondenaren wenno babalawen dagiti Kristiano ti kita ti panagpaagas a pilien ti dadduma. Kas impatuldo dagiti artikulo, alternatibo man wenno moderno a kita ti panangagas, saanna a maikkat ti amin a sakit ti sangatauan. Ti laeng Pagarian ti Dios ti naan-anay a makaikkat iti sakit.—Apocalipsis 21:3, 4.
‘Kumalay-atakto a Kas iti Panagkalay-at ti Kalakian nga Ugsa’ (Agosto 2006) Talaga a pinagpanunotnak ti kinaanus ken kinapakumbaba ni Francesco Abbatemarco. Saanna laeng a dinaeran ti kinabaldadona tapno makapagserbi kenni Jehova no di ket pinagreggetanna pay a pinarmek ti negatibo a riknana. Nakatulong kaniak ti kapadasanna tapno agtalinaedak a silalagip nga aniaman a kasasaad ti pakaipasanguantayo, makapagserbitay latta ken Jehova iti amin a kabaelantayo. Makaparegta met kaniak a makita no kasano a ti panangyaplikar iti Sao ti Dios ket timmulong kenkuana a mangaramid kadagiti dakkel a panagbalbaliw iti biagna.
N. G., Cambodia
Nagadu ti karit a nakaipasanguan ni Francesco. Ngem idi naammuanna ti kinapudno, sigagagar ken situtulok a tinamingna dagita. Nagsayaat nga ulidan ti kinapingetna! Kas kaniak, sapay koma ta dagiti dadduma maparegtada met iti kapadasanna.
M. D., South Africa
Magustuak unay daytoy nga artikulo! No la koma posible, kayatko nga ibaga a personal ken Francesco Abbatemarco no kasano a naparegtaak a mangipaay iti kasayaatan a panagserbi ken Jehova.
J. B., Estados Unidos
Pagyamanan Francesco iti nagsayaat nga ulidan ti kinaregta ken kinaanusmo. Siguradoak nga inton baro a sistema, lumagtokanto a kas iti kalakian nga ugsa. Dimo koma liplipatan nga adda dagiti kakabsatmo a pudno a mangay-ayat ken mangikarkararag kenka.
S. G., Russia