Ti Panangmatmat ti Biblia
Ania ti Mapasamak Kadatayo no Mataytayo?
SAAN a panggep ti Dios a matay dagiti annakna a tattao. (Roma 8:20, 21) Kinapudnona, idi damo a dinakamat ni Jehova ti ipapatay kenni Adan, nadakamat dayta saan a kas gagangay a namnamaen ti tao a pagtungpalanna no di ket kas pannusa no sukirenna ti Dios. (Genesis 2:17) Naawatan ni Adan ti kaipapanan ti ipapatay, yantangay nairuamen a makakita kadagiti matay nga animal.
Nagbasol ni Adan, ket sinagabana ti epekto ti panagbasolna babaen ti ipapatayna idi agtawen iti 930. (Genesis 5:5; Roma 6:23) Gapu iti isusukirna, nailaksid ni Adan manipud iti pamilia ti Dios isu a din maibilang kas maysa nga anak ti Dios. (Deuteronomio 32:5) Kastoy ti kinuna ti Biblia maipapan kadagiti nakalkaldaang nga epekto ti basol iti sangatauan: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao.”—Roma 5:12.
Ania ti Mapasamak iti Panunottayo?
Kuna pay ti Biblia: “Adda maysa a pasamaken no maipapan iti annak ti sangatauan ken maysa a pasamaken no maipapan iti animal, ket addaanda iti isu met laeng a pasamaken. No kasano a ti maysa matay, kasta met a ti sabali matay; ket addaanda amin ti maymaysa nga espiritu, iti kasta ti tao awan pagsaysayaatanna ngem iti animal, ta isuamin kinaubbaw. Isuamin mapanda iti maymaysa a lugar. Napaaddada amin manipud iti tapok, ket agsublida amin iti tapok.” (Eclesiastes 3:19, 20) Ania ti kaipapanan ti panagsubli iti tapok?
Ti sasao a ‘panagsubli iti tapok’ ipalagipna kadatayo ti imbaga ti Dios iti immuna a tao: “Tapokka ket iti tapok agsublikanto.” (Genesis 3:19) Kaipapanan dayta a dagiti tattao ket buklen iti lasag ken dara a kas kadagiti animal. Saantayo nga espiritu nga adda iti uneg ti bagi a buklen ti lasag ken dara. Agsardengen ti panunottayo no mataytayo. Maipapan iti tao a matay, kinuna ti Biblia: “Ti espirituna pumanaw, isu agsubli iti dagana; iti dayta nga aldaw mapukaw dagiti panunotna [“agpatingga amin a panunotna,” The New English Bible].”—Salmo 146:4.
No kasta ti mapasamak, ania ngarud ti kasasaad dagiti natay? Nalawag ti sungbat ti Sao ti Dios: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman.” (Eclesiastes 9:5) Imbes a kas iti gayyem a mangpasangbay kadatayo iti nasaysayaat a biag, ti ipapatay ket inawagan ti Biblia kas “ti maudi a kabusor,” agsipud ta pagpatinggaenna ti amin a mabalintayo nga aramiden. (1 Corinto 15:26; Eclesiastes 9:10) Kaipapanan kadi dayta nga awanen ti namnamatayo no mataytayo?
Naimbag a Damag Maipapan iti Ipapatay
Para iti minilion a natayen a tattao, kasda la matmaturog laeng ket mabalin nga agriingdanto. Kastoy ti imbaga idi ni Jesus kadagiti adalanna maipapan iti gayyemda a natay: “Ni Lazaro a gayyemtayo napan naginana, ngem agbaniagaak sadiay tapno riingek manipud pannaturogna.” Idi mapmapan ni Jesus iti tanem, nasabatna ti maysa a bunggoy a malmaldaangan. Idi simmangpet iti tanem, pinalukatanna dayta sana impukkaw: “Lazaro, rummuarka!” Ket rimmuar ti lalaki nga uppat nga aldawen a natay. (Juan 11:11-14, 39, 43, 44) Yantangay agruprupsan ti bagi ni Lazaro, impakita ngarud ni Jesus a kabaelan ti Dios a lagipen ti amin maipapan kadagiti natay—ti personalidadda, memoriada, ken ti langada. Kabaelanna a pagungaren ida. Iti sabali pay a gundaway, kinuna ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [kayatna a sawen, ti timek ni Jesus] ket rummuarda.”—Juan 5:28, 29.
Kastoy pay ti kanayonan a naimbag a damag nga ipaay ti Biblia: “Kas ti maudi a kabusor, ni patay mapukawto.” (1 Corinto 15:26) Dagiti agladladingit a tattao saandanto pulosen a kasapulan ti mapan idiay sementerio tapno itanemda ti ay-ayatenda. Kuna ti Biblia: “Awanton ni patay.” (Apocalipsis 21:4) Saan kadi a makaliwliwa ti isursuro ti Biblia maipapan iti mapasamak no matay ti tao?
NAUTOBYO KADIN?
◼ Adda pay kadi puot dagiti natay?—Eclesiastes 9:5.
◼ Awan kadin ti namnama dagiti natay a tattao?—Juan 5:28, 29.
[Blurb iti panid 29]
“Ti espirituna pumanaw, isu agsubli iti dagana; iti dayta nga aldaw mapukaw dagiti panunotna [“agpatingga amin a panunotna,” The New English Bible].”—Salmo 146:4