Sarsarita Wenno Agpaypayso?

Ti Kristiano a panglakayen a ni Timoteo binilinna dagiti agtarigagay nga agserbi iti pudno a Dios a laksidenda dagiti “saan a pudno a doktrina” ken “sarsarita.” (1 Timoteo 1:3, 4, Ti Baro a Naimbag a Damag Biblia) Kasapulan kadi ita ti kasta a panagannad? Wen, gapu ta dagiti di umiso a kapanunotan ken sursuro ti Biblia iyadayoda dagiti tattao iti pudno a panagdayaw. Dagiti sumaganad ti sumagmamano a di umiso a kapanunotan maipapan iti Biblia. Imutektekanyo dagiti sasao ti Biblia. Makatulong dagitoy tapno mailasinyo ti sarsarita ken agpaypayso.

◼ Sarsarita: Imposible a napasamak dagiti milagro ti Biblia.

Agpaypayso: Adu ti masursuro dagiti tattao maipapan kadagiti parsua ti Dios. Awan ti sientista a naan-anay a makailawlawag iti grabidad, siuumiso a makaibaga kadagiti amin a paset ti atomo, wenno eksakto a makadepinar iti oras. “Masarakam kadi ti nauneg a bambanag ti Dios, wenno masarakam kadi agingga iti mismo a kangitingitan ti Mannakabalin-amin?” (Job 11:7) Gapu ta saantayo a naan-anay a maawatan ti panamarsua, naan-annaden dagiti nalalaing a sientista a mangibaga nga imposible a mapasamak ti maysa a banag.

◼ Sarsarita: Amin a relihion ket anamongan ti Dios.

Agpaypayso: “No agtalinaedkayo iti saok,” kuna ni Jesus, “pudno a dakayo dagiti adalak, ket maammuanyonto ti kinapudno, ket ti kinapudno wayawayaannakayto.” (Juan 8:31, 32) No agturong iti Dios ti amin a relihion, ania pay koma ngarud ti rason a mawayawayaanda? Kinapudnona, insuro ni Jesus a manmano laeng ti adda iti “dalan nga agturong iti biag.”—Mateo 7:13, 14.

◼ Sarsarita: Mapan idiay langit ti amin a naimbag a tattao inton matayda.

Agpaypayso: “Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna. Dagiti nalinteg tagikuaendanto ti daga, ket agtaengdanto nga agnanayon iti dayta. Manginanamaka ken Jehova ket salimetmetam ti dalanna, ket itan-oknakanto a mangtagikua iti daga.” (Salmo 37:11, 29, 34) Adda laeng 144,000 a matalek a tattao a mapan idiay langit. Dinutokan ida ti Dios nga ‘agturay kas ar-ari iti daga.’—Apocalipsis 5:9, 10; 14:1, 4.

◼ Sarsarita: Saanen nga agpaay kadagiti Kristiano ti “Daan a Tulag.”

Agpaypayso: “Amin a Kasuratan impaltiing ti Dios ken makagunggona.” (2 Timoteo 3:16, 17) “Amin a bambanag a naisurat a nasaksakbay naisuratda a pakasursuruantayo, tapno babaen ti panagibturtayo ken babaen ti liwliwa manipud iti Kasuratan maaddaantay koma iti namnama.” (Roma 15:4) Ti “Daan a Tulag” wenno Hebreo a Kasuratan ket napateg a gubuayan ti naespirituan nga instruksion ken pabilgenna ti pammatitayo iti “Baro a Tulag” wenno Kristiano a Griego a Kasuratan.

◼ Sarsarita: Simbolikal laeng ti kaaduan a linaon ti libro a Genesis, agraman ti salaysay maipapan kada Adan ken Eva.

Agpaypayso: Ti mannurat ti Ebanghelio a ni Lucas inlanadna ti kapuonan ni Jesus a mangrugi ken Adan. (Lucas 3:23-38) No sarsarita laeng ti Genesis, asino kadagiti kapuonan ni Jesus ti pudpudno a nagbiag ken asino dagiti sarsarita laeng? Ni Jesus, a nagbiag idiay langit sakbay nga immay ditoy daga, patienna dagiti linaon ti Genesis, agraman ti salaysay maipapan kada Adan ken Eva. (Mateo 19:4-6) Gapuna, arigna a pagduaduaantayo ti kredibilidad ni Jesus no matmatantayo a sarsarita laeng dagiti linaon ti Genesis, agraman ti adu pay a mannurat iti Biblia.—1 Cronicas 1:1; 1 Corinto 15:22; Judas 14.