Mapagtalkam Kadi ti Balakad ti Biblia?

‘Rumbeng kadi a mamatiak iti ibagbaga daytoy a tao?’ Mabalin nga iyimtuodmo iti bagim dayta a saludsod no adda mangilako kenka iti segunda mano a lugan wenno no adda agkari a politiko kabayatan ti kampania ti eleksion. Dimo la ketdi kayat a sayangen ti kuarta ken tiempom kadagiti saan a napateg a produkto wenno impormasion.

MABALIN a mapanunotmo met: ‘Adda kadi napateg a maadalko iti Biblia? No basaek ken adalek dayta a libro, masiguradok kadi a saan a masayang ti tiempo ken bannogko?’ Nailanad iti maysa a bersikulo ti Biblia ti sungbat dayta a saludsod: “Ti kinasirib mapaneknekan gapu kadagiti gapuananna.” (Mateo 11:19, Ti Biblia) Wen, dagiti resulta a magun-odan ti maysa a tao gapu iti panangyaplikarna iti maysa a balakad, wenno “kinasirib,” ti mangipakita no makagunggona met laeng dayta a balakad. Dagiti sumaganad ket komento dagiti tattao a nangiwaya iti panagadal iti Biblia. Dagiti komentoda tulongannaka a mangikeddeng no rumbeng a basaem ken adalem dayta a naisangsangayan a libro.

Salsaludsod Maipapan iti Ipapatay ken ti Kasasaad Dagiti Natay

Pimmusay ti nanang ni Karen, nga agnanaed iti Estados Unidos. Manipud kinaubingna, naisuro ni Karen a no matay dagiti nasingpet a tattao, mapanda idiay langit. Saan unay a makaliwliwa kenkuana dayta a patpatien. Pampanunotenna: ‘Ania ngata ti langa ni nanangko, ita ta addan idiay langit? Kasanokto ngata a mailasin inton mapanak met sadiay? No matayak, sadino met ngata ti papanak?’

Nakipagadal a naimbag ni Karen iti Biblia kadagiti Saksi ni Jehova. Naammuanna nga awan idiay langit dagiti natay no di ket arigna addada iti nargaan a turog. “Saanda a pulos sipapanunot iti aniaman,” kuna ti Eclesiastes 9:5. Ngem makitananto pay ngata ni nanangna?

Dagiti sumaganad a sasao iti Biblia ti mangted kenkuana iti liwliwa ken namnama: “Dikay agsiddaaw iti daytoy, agsipud ta um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Kristo] ket rummuarda.” (Juan 5:28, 29) Naammuan ni Karen a babaen ken Jesus, ti Dios a nangipaltiing iti Biblia pagungarennanto dagiti natay ditoy daga a mismo. “Naglaka a maawatan ken agtutunos dagiti sursuro ti Biblia maipapan iti ipapatay ken panagungar,” kinunana.

Ania a Pamay-an ti Panagdayaw ti Umiso?

Idi agtawen iti 14 ni Angela a taga-Romania, isu ket inkararagan ti maysa a Pentecostal a ministro tapno umawat iti nasantuan nga espiritu ken makapagsao iti nadumaduma a pagsasao. Ngem ammo dagiti nagannakna a saan a maitunos iti Biblia ti sursuro dagiti Pentecostal. Insardeng ti pamiliada ti makimisa ket inrugida ti makipagadal iti Biblia kadagiti Saksi ni Jehova.

Nupay naladingitan idi damo, nakita ni Angela idi agangay a sabali ti isursuro ti dati a relihionda no idilig iti isursuro ti Biblia. Kas pagarigan, nabasana ti Juan 17:3, a kastoy ti kunana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” Nabigbig ni Angela a dagidiay makagun-od iti anamong ti Dios masapul a maaddaanda nga umuna iti pannakaammo maipapan kenkuana. “Kasano koma a magun-odak ti nasantuan nga espiritu ti Dios no dandani awan met ammok maipapan kenkuana?” inyimtuodna. Kuna ni Angela, “Agyamanak ken Jehova ta tinulongannak a mangammo iti umiso a panagdayaw babaen ti naipaltiing a Saona.”

Balakad a Mangbalbaliw iti Biag

“Managpungpungtotak,” kuna ni Gabriel a taga-India. “No mapagpungtotdak, agriawak, ibarsakko ti aniaman a maiggamak, ken pagsasawak wenno kabilek dagiti tattao. Ti panagadal iti Biblia ti nangtulong kaniak a mangmedmed iti pungtotko. Itan, uray kadagiti nakadadanag a kasasaad, makapagtalinaedakon a kalmado.”

Nabasa ni Gabriel dagiti teksto a kas iti Proverbio 16:32, a kunana: “Daydiay nabannayat nga agunget nasaysayaat ngem iti nabileg a lalaki, ken daydiay mangmedmed iti espirituna ngem iti daydiay mangkautibo iti maysa a siudad.” Ni Dhiraj a dati a managpungpungtot, kinunana, “Dayta met laeng a teksto ti nakatulong kaniak a mangilasin a maysa a pagkapuyan ti kinamanagpungpungtot, idinto ta maysa a paglaingan ti panangmedmed iti dayta.”

Maysa a butangero ni Philip a taga-South Africa. Mannakiriri, mannanakaw, ken nagubsang ti panagsasaona. Maibalbalud gapu kadagiti krimen a maar-aramidanna. Ngem iti laksid ti kasta a panagbiagna, tinarigagayan ni Philip a maam-ammo ti Dios. Iti pannakipagadalna iti Biblia kadagiti Saksi ni Jehova, napatanorna ti tarigagay nga agserbi iti Dios ken inkeddengna a balbaliwan ti panagbiagna. Insardengna dagiti dakes nga aramidna ken ti pannakilangenna kadagiti kriminal a kakaduana. Ania a kinapudno ti Biblia ti nangtignay kenkuana nga agbalbaliw?

Dagiti Saksi ni Jehova impakitada kenkuana dagiti sasao ni Jesus a masarakan iti Juan 6:44. Binasada: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” Kuna ni Philip, “Adda naimbag a banag a nakita ni Jehova kaniak isu nga inyadaninak kadagiti adipenna, daytoy nagsayaat a panagkakabsat.” Impapuso met ni Philip dagiti salaysay ti Biblia maipapan iti kinaasi ni Jehova kadagiti agbabbabawi a managbasol. “Dagitoy a salaysay,” kuna ni Philip, “ti nakatulong kaniak a mangtarus a nainkalintegan ti pannakilangen ni Jehova kadagiti imperpekto a tattao nga agbabbabawi.”—2 Samuel 12:1-14; Salmo 51.

Ni Wade, maysa nga agtutubo a taga-Australia, ket mangnginum, agus-usar iti droga, mannugal, ken adu ti nakadennanan. Ngem saan a naragsak. Maysa nga aldaw, adda nakasaritana a Saksi ni Jehova ket immanamong a makipagadal kadakuada iti Biblia. Ania ti nasursuro ni Wade?

“Dayawek unay ti panangtrato ni Jesus kadagiti sabsabali,” kuna ni Wade. “Nangipakita iti kinaimbag, asi, ken ayat iti amin, agraman kadagiti ubbing. Ad-adda a kayatko a tuladen ni Jesus bayat nga umad-adu ti maad-adalko. Nasursurok no kasano ti agbalin a nasayaat a tao ken no kasano a pasayaaten ti personalidadko.” Ngem komusta met ngay dagiti dakes a naaramidanna? Intuloy a kinuna ni Wade: “Kuna ti Biblia a no pagbabawyak dagiti basolko ken balbaliwak ti konduktak, pakawanennak ti Dios. Kinapudnona, mabalinko pay ti agbiag iti paraiso a daga. Kamaudiananna, adda namnamak iti masanguanan!” (Mateo 5:5) Binalbaliwan ni Wade ti panagbiagna ket agdaydayawen ken Jehova buyogen ti nadalus a konsiensia.

Dagita ti komento dagiti tattao a mayat a mangpasayaat iti biagda. Sinukimatda a naimbag ti Biblia tapno makitada no makatulong dagiti isursurona a mangrisut kadagiti parikutda ken mangsungbat kadagiti saludsodda. Dagiti naadalda ti nangkombinsir kadakuada nga agtalek iti praktikal a panangiwanwan ti Biblia. Kasta met ti maadalmo.

Kastoy ti mabasa iti nabayagen a naipaltiing a sasao: “Naragsak ti tao a nakasarak iti sirib, ken ti tao a makagun-od iti panangilasin, ta ti pannakagun-od iti dayta kas gunggona ket nasaysayaat ngem iti pannakagun-od iti pirak kas gunggona ken ti pannakagun-od iti dayta kas apit ngem iti mismo a balitok. Napatpateg ngem kadagiti korales, ket amin a sabsabali pay a pakaragsakam saan a maipada iti dayta. Ti kaatiddog ti al-aldaw adda iti makannawan nga imana; iti makannigid nga imana adda kinabaknang ken dayag. Ti daldalanna ket daldalan ti kinamakaay-ayo, ket amin a dandanana talna. Maysa dayta a kayo ti biag kadagidiay mangpetpetpet iti dayta, ket dagidiay agtultuloy a mangsalimetmet a siiirut iti dayta maawaganda iti naragsak.”—Proverbio 3:13-18.

[Kahon/Ladawan iti panid 25]

NO KASANO A NAKATULONG TI BIBLIA ITI MAYSA A BALUD

Maysa a naragsak nga asawa ni Bill. Ngem sakbay pay nga agmaysa a tawenda ken baketna, naibalud gapu iti krimen a naaramidanna sumagmamano a tawenen ti napalabas.

Idi naakseptarnan nga isu ket maysan a balud, pinanunotna no kasano nga agbalin a nabunga ti kaaddana iti pagbaludan. “Binusbosko dayta iti panagbasa ken panagadal iti Biblia,” kinunana. Inyaplikarna met dagiti naadalna. “Nagbalinak a naasi ken mannakigayyem kadagiti kaseldak, ket nakitada a diak kayat a tuladen dagiti dakes nga aramidda. Ibagada: ‘Kayat ni Bill a busbosen ti panawenna a mangammo iti Dios ken agadal iti Biblia. Saan a sakit ti ulo iti asinoman.’

“Gapu iti pakasarsaritaak, didak inramraman dagiti dadduma a balud kadagiti panagaapada. Awan met ti parikut dagiti guardia kaniak. Gapuna, intalekda kaniak dagiti trabaho a diak kadua dagiti kaaduan a balud iti adu nga oras. Dakkel a salaknib ti panangyaplikarko iti maad-adalko iti Biblia.”

Tinabunuan ni Bill ti panaggigimong dagiti Saksi ni Jehova iti pagbaludan ken sireregta nga inranudna dagiti maad-adalna. Nabautisaran kas maysa a Saksi ni Jehova bayat ti pannakaibaludna. Malagipna: “Sinayangko ti dandani 50 a tawen ti biagko, ket kayatkon ti agbalbaliw. Kombinsidoak a ti panangyaplikar iti pannursuro ti Biblia ti kakaisuna a pamay-an tapno makapagbalbaliw ti maysa a balud. Ken ti pannakipagadal kadagiti Saksi ni Jehova ti pamay-an tapno maammuan ti umiso a pannursuro ti Biblia. Ti laeng relihionda ti mangisursuro iti kinapudno maipapan iti Biblia. Kasta kasimple.”

Kalpasan a nawayawayaan, aktibo itan ni Bill nga agserserbi iti maysa a kongregasion dagiti Saksi ni Jehova iti Estados Unidos. Intultuloyda kenni baketna ti nagadal iti Sao ti Dios ken inyaplikarda ti pannursurona. Apresiarenda unay dagiti sasao iti Isaias 48:17, 18: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam. O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.”

[Ladawan iti panid 23]

Ni Karen, E.U.A.

[Ladawan iti panid 23]

Ni Angela, Romania

[Ladawan iti panid 24]

Ni Dhiraj, India

[Ladawan iti panid 24]

Ni Gabriel, India

[Ladawan iti panid 24, 25]

Ni Philip ken ti pamiliana, South Africa

[Ladawan iti panid 24]

Ni Wade, Australia