Napatpateg Ngem “Kadagiti Kangayedan nga Allon”
Kas Insalaysay ni Karl Heinz Schwoerer
Naipasngayak idi 1952 idiay Pittsburgh, Pennsylvania, U.S.A., ngem dimmakkelak idiay New Smyrna Beach, Florida. Idi tin-edyerak, kaay-ayok ti ag-surfing. Kinapudnona, dayta ti nagbalin a kapatgan iti biagko.
IDI 1970, nageskuelaak idiay Embry-Riddle Aeronautical University idiay Daytona Beach, Florida agsipud ta kayatko ti agbalin a piloto dagiti pangpasahero nga eroplano. Nupay kasta, kimmaro ti pannakaupayko iti gobierno, nga idi ket madama a gubgubatenna ti Vietnam. Para kaniak, saan a nainkalintegan dayta. Gapu ta nadismayaak iti intero a sistema ti bambanag a kas iti dadduma a kasadarak kadagidi a tiempo, simmardengak a nageskuela ken sinurotko ti estilo ti panagbiag dagiti hippie (dagiti agtutubo idi dekada 60 ken 70 a nanglaksid iti gagangay a panagbiag, panagkawkawes, ken panagtigtignay. Inkagumaanda ti nagbiag a naibasar iti prinsipio ti talna ken ayat.) Pinaatiddogko ti buokko ken nagdrogaak.
Di nagbayag, naam-ammok ni Susan, maysa a mannakigasanggasat a balasang ken nalaing nga agpinta ken agretrato. Kinarkulok a no la ket ta pagbalinenmi a simple ti panagbiagmi, mabalinko ti agtrabaho iti konstruksion iti innem agingga iti walo a bulan idiay Florida ken kalpasanna, mabalinmin a busbosen ti nabatbati a bulbulan iti tawen nga agnaed iti tolda kadagiti aplaya ti Kosta ti Pacifico idiay Mexico ken Central America.
Sipapanunot iti Naespirituan a Kasapulan
Talaga a makaparagsak unay ti awan pakasiksikoranna a biag bayat ti kaaddak iti nagpipintas nga aplaya iti tropiko—a kaduak ni Sue nga agpimpinta ken agretretretrato kabayatan ti panag-surfing-ko. Ngem kalpasan ti dua a tawen, naamirismi a saan a makapnek ti biagmi. Kasla adda kurang. Isu nga idi ngalay ti 1975, bayat nga agnanaedkami iti Kosta ti Pacifico ti Costa Rica, rinugiak ti nagbasa kadagiti nalatak idi a libro maipapan iti relihion ken pilosopia dagiti taga-Daya agsipud ta kayatko ti malawlawagan iti naespirituan.
Yantangay dagiti libro a binasak ket masansan a nagadaw iti Biblia kas ebidensia ti kinapudno dagiti isursuroda, napanunotko a ti ngarud Biblia ti rumbeng a pagibasarak iti panagsapulko iti kinapudno. Isu nga insukatko ti dadduma nga uong nga aglaon iti substansia ti maiparit a droga iti maysa a daan a King James Version ti Biblia. Minalem nga agbasaak iti Biblia kalpasan ti pigtaw a panag-surfing-ko. Ngem nupay interesadoak unay iti Biblia, limitado ti pannakaammok iti dayta.
“Adda Kadi Kayatyo a Saludsoden Maipapan iti Biblia?”
Iti dalanmi nga agawid idiay Estados Unidos manipud Costa Rica idi Agosto 1975, dimmagaskami ken ni Sue iti maysa a parmasia idiay El Salvador tapno gumatang iti agas. Yantangay marigatankami a makisarita iti parmasiutika, nagboluntario a tumulong ti maysa a kostumer nga agnagan iti Jenny. Isu ket maysa a 16-anyos nga Americana ken nalaing nga agsao iti Espaniol. Kinunana nga isuda kada tatang ken nanangna ket Saksi ni Jehova ken immakarda idiay El Salvador tapno isuro dagiti tattao maipapan iti Biblia.
Sinaludsodannak ni Jenny, “Adda kadi kayatyo a saludsoden maipapan iti Biblia?”
“Adda!” kinunak. Iti laksid ti langami kas hippie, dagus nga inawisnakami ni Jenny idiay balayda tapno maam-ammomi dagiti nagannakna a da Joe ken Nancy Trembley. Pinatganmi ti awisna. Agmalmalem a nagsalsaludsodkami maipapan iti Biblia ken nasdaawkami iti wagas ti panangsungbat da Joe ken Nancy kadagiti saludsodmi. Kanayonda nga ibaga, “Kitaenyo daytoy a teksto iti Bibliayo ken basaenyo dayta.”
Di agbayag, rumabiin, isu nga inawisdakami nga umyan. Nupay kasta, dida impalubos nga agkakuartokami ken ni Sue, yantangay saankami pay a nagkasar. Adu nga oras iti dayta a rabii a nagsaritaan da Sue ken Jenny ti adu a suheto ti Biblia—manipud ken Adan agingga iti Armagedon.
Ti Berde a Biblia
Kabigatanna, sakbay a nagawidkami, inikkandakami da Joe ken Nancy iti adu a kopia dagiti magasin a Pagwanawanan ken Agriingkayo!, dadduma pay a libro, ken maysa a Biblia—ti New World Translation of the Holy Scriptures, nga addaan idi iti berde nga akkub. Impasiarnakami met ni Joe iti Kingdom Hall. Simple ken desente dayta a pasdek, a pagad-adalan dagiti Saksi ni Jehova iti Biblia. Napanunotko nga anian a nagpaiduma dayta kadagiti naranga a simbaan iti Kakristianuan, a sadiay ket nagbassit ti masursuro dagiti tattao maipapan iti Biblia!
Kamalmanna, idi simmardengkami iti maysa a checkpoint sakbay a ballasiwenmi ti beddeng ti Guatemala, nariribukan dagiti opisial gapu iti awitmi a berde a Biblia. Nasdaawda ta dayta ti Biblia a masansan nga us-usaren dagiti Saksi ni Jehova. Ngem saankami met nga aglanglanga a Saksi ni Jehova. Nupay kasta, pinalubosandakami met laeng dagiti opisial kalpasan ti sumagmamano a minuto. Nasdaawkami agsipud ta dati a suksukisokenda ti luganmi ken dagiti gargaretmi tapno sukimatenda no adda awitmi a droga wenno impuslitmi a bambanag. Gapu iti dayta, rinugianmi nga imbilang ti berde a Biblia kas maysa nga anib, wenno anting-anting.
Bayat nga intultuloymi a binasa ti Biblia ken dagiti publikasion a makatulong kadakami a mangtarus iti dayta, nakombinsirkami a nasarakanmin ti kinapudno maipapan iti Dios. Idi nga agmanmanehoak iti dalanmi nga agturong idiay Mexico, segseggaak ti dua a lawas a panag-surfing-ko idiay Puerto Escondido—ti paboritok a lugar. Kalpasan ti panangtagiragsakko kadagidiay a “kangayedan nga allon,” desididoakon nga agawid idiay Florida tapno agbalinak a maysa kadagiti adipen ni Jehova.
Binusbosko ti simmaganad a dua a lawas nga ag-surfing iti tunggal agsapa. No mumalem, basaek ti Bibliak agraman dagiti publikasion a makatulong iti panagadalko iti dayta. Adda ubing a babai nga agtawen iti walo a nakakita iti berde a Bibliak. Pinilitnakami a kumuyog kenkuana iti dayta a rabii. Saanmi a maawatan no sadino ti kayatna a pangipanan kadakami, ngem ammomi nga adda pakainaigan dayta iti berde a Bibliak. Nagkitakitkami ngem kanayon latta nga awisennakami. Kamaudiananna, kalpasan ti sumagmamano nga aldaw, inkeddengmi a patgan ti awisna. Impannakami iti Kingdom Hall dagiti Saksi ni Jehova, maysa a bassit a pasdek a naaramid iti kawayan ken naatepan iti pan-aw. Inalamano ken inarakupdakami dagiti amin nga adda sadiay a kaslattay nabayagen nga aggagayyemkami.
Nasdaawkami iti nadayaw a kababalin dagiti amin a timmabuno. Dadduma nga ubbing ti mangmingmingming kadakami bayat ti gimong, nalabit a gapu ta idi laeng a nakakitada kadagiti tattao nga addaan iti atiddog nga olandes a buok. Kanayon a palagipan ida dagiti dadakkelda nga agatensionda iti gimong. Nupay kasta, inusar ni Jehova ti maysa nga ubing a kas kadakuada tapno makatabunokami iti gimong iti kaunaan a gundaway.
Determinadokamin nga Agserbi ken Jehova
Kalpasan ti dua a lawas ti makapnek a panag-surfing, inlakok dagiti surfingboard-ko, ken nagawidkami idiay Florida. Sadiay a rinugianmi ti agadal iti Biblia iti tulong dagiti Saksi ni Jehova ken tumabuno kadagiti amin a gimong ti kongregasion. Yantangay determinadokamin nga agserbi ken Jehova, insardengmin ti agkabbalay ken makipulapol kadagiti dati a gagayyemmi. Nagibarbasak ken nagpapukisak, ket gimmatang ni Sue iti sumagmamano a bestidana. Uppat a bulan kalpasanna, nagkallaysakami ket idi Abril 1976, nabautisarankami kas simbolo ti dedikasionmi nga agserbi iti Dios.
Ita, addan panggep ti biagmi. Gapu ta agyamankami ken Jehova kadagiti amin a bendision a nasagrapmi, magagarankami nga agsubli iti pagilian nga Espaniol ti pagsasaona tapno ikasabami ti naimbag a damag maipapan iti Pagarian ti Dios. Ngem binalakadandakami dagiti Kristiano a panglakayen iti kongregasionmi a saan pay laeng. Kinunada a masapul a pabilgenmi pay nga umuna ti espiritualidadmi tapno kabaelanminto ti tumulong sadiay. Impangagmi ti balakadda ket kalpasanna, pinagbalinmi a kalat ti panagbalin a payunir, kas pangawag dagiti Saksi ni Jehova kadagiti amin-tiempo a ministroda.
Rinugian ni Sue ti agpayunir idi Enero 1978. Kayatko met ti agpayunir, ngem dakkel pay laeng ti utangko gapu kadagiti matrikulak idi nageskuelaak iti unibersidad. Nakapanunotak iti simple a solusion. Ideklarak a nabangkaroteak tapno nawayaakton nga agpayunir.
Nupay kasta, nainsiriban a binalakadandak dagiti panglakayen a saanko nga aramiden dayta agsipud ta maikontra dayta kadagiti prinsipio ti Biblia a mangikalikagum a rumbeng nga agbalintayo a ‘mapagtalkan iti amin a bambanag.’ (Hebreo 13:18) Isu nga intultuloyko ti nagtrabaho agingga a nabayadak dagiti utangko. Kamaudiananna, idi Setiembre 1979, naragpatko ti kalatko a makikadua ken Sue iti trabaho a kinapayunir. Kalpasan dayta, nagbiagkami iti simple isu a nabaelak ti agtrabaho iti dua la nga aldaw iti kada lawas tapno adda pangsuportami iti bagbagimi.
Panagserbi iti Bethel Idiay Brooklyn
Idi Abril 1980, kalpasan ti kurang a makatawen a panagkaduami nga agpayunir, adda naawatmi a dakkel a sorpresa. Kasakbayan dayta, pinatganmi ti kiddaw nga agboluntariokami iti konstruksion isu nga insumitemi dagiti aplikasionmi nga agserbi iti Bethel, ti sangalubongan a hedkuarter dagiti Saksi ni Jehova idiay Brooklyn, New York. Naawatmi itan ti awis ket nasken nga addakamin sadiay iti uneg ti 30 nga aldaw! Agkakanat ti nariknami, yantangay kaay-ayomi ti agpayunir. Gapu ta saanmi a matinong ti nasken nga aramidenmi, inyumanmi dayta iti dua a panglakayen, a nangipaawat kadakami iti kinanaisangsangayan ti pribilehio a naitukon kadakami. Binalakadandakami a padasenmi ti agserbi idiay Bethel iti makatawen. Gapuna, inlakomi ti amin nga alikamenmi ket napankami idiay Brooklyn.
Kalpasan ti panagtrabahomi iti konstruksion iti dua a tawen, naawisak nga agtrabaho iti Construction Engineering Office. Sinanaydak sadiay nga agdisenio iti nadumaduma nga estruktura dagiti pasdek. Makatawen met a nagtrabaho ni Sue iti Bindery, ket kalpasanna, naawis iti Graphics Department. Iti kada tawen, no anibersario ti kasarmi, panunotenmi ti napalabas a tawen ken usigenmi dagiti kasasaad ken tarigagaymi ket ikeddengmi ti agtultuloy nga agserbi iti Bethel.
Iti panaglabas dagiti tawen, naaddaankami iti sumagmamano a nagsasayaat ken nasinged a gagayyem. Kanayonanna, yantangay ti kaaddami iti Bethel ti nangted kadakami iti gundaway nga agserbi ken Jehova ken iti sangalubongan a panagkakabsatmi iti makapnek a wagas, inkeddengmi ti agtalinaeden nga agserbi iti Bethel. Idi 1989 rinugianmi ti nagadal iti Espaniol isu a nabaelanmi ti tumulong iti maysa a kongregasion dagiti Espaniol idiay Brooklyn. Nagbanaganna, addaankami iti nagsayaat a gundaway nga agserbi iti dua a tay-ak—iti Bethel ken iti kongregasion nga agus-usar iti ganggannaet a lenguahe.
Naminsan, sinarungkarannakami idiay Brooklyn Bethel ti nadakamatmi itay a ni Jenny, ket makapainteres a maammuan mismo manipud kenkuana no kasano a nagaammokami idiay El Salvador. Kagapgapuna gayam idi iti maysa nga iyad-adalanna iti Biblia ken madmadi ti riknana isu a sakbay nga agawid, dimmagas iti parmasia tapno gumatang iti agas. Iti di naigagara a rason, saan a napan iti parmasia a dati a paggatgatanganna no di ket iti parmasia nga ayanmi iti dayta nga aldaw.
Panagserbi iti Dadduma a Pagilian
Maysa nga aldaw idi 1999, sinorpresanak ti manangaywan iti departamentomi. Dinamagna no kayatko ti mapan idiay sanga nga opisina ti Australia ken tumulong iti proyekto ti Regional Engineering Office iti tallo a bulan.
Dagus nga immanamongak. Di nagbayag, napankamin idiay Australia a sadiay ket nagserbikami iti tallo a tawen. Makaparagsak ti tumulong iti panangdisenio kadagiti sanga nga opisina iti sumagmamano a pagilian iti Daya ken iti Abagatan a Pacifico. Idi nagsublikami idiay Brooklyn idi 2003, adda manen agur-uray a sorpresa kadakami. Naawiskami a mapan iti sabali a pagilian tapno agserbi iti Regional Kingdom Hall Office nga adda iti sanga nga opisina ti Brazil, nga adayo bassit iti dakkel a siudad ti São Paulo.
Agingga ita, ditoy pay laeng ti ayanmi. Dayta nga opisina ti mangtartarawidwid iti pannakaibangon dagiti Kingdom Hall iti kaaduan a pagilian iti Abagatan nga America. Kuykuyogennak ni Sue iti trabahok a pakairamanan ti panagdaliasat tapno tumulong iti panagibangon kadagiti Kingdom Hall ken panangparegta kadagidiay agtartrabaho iti adu a proyekto.
Tagtaginayonenmi Dagiti Prioridadmi
Aminek a kaay-ayok latta ti ag-surfing, ngem addan nasarakak a napatpateg ngem “kadagiti kangayedan nga allon.” Isu a para kaniak, ti panag-surfing ket maysa laengen a paglinglingayan. Babaen ti naayat a panangandingay ni Sue, maipampamaysak dagiti napatpateg a bambanag nga isu ti panagserbi iti naayat a Diostayo a ni Jehova.
Ti kapatgan itan kadakami ket ti panangusarmi iti biag ken paglainganmi tapno mayadelantar dagiti interes ti Pagarian ken maitandudo ti nadalus a panagdayaw ken Jehova a Dios. Naammuanmi a ti kapatgan ket saan a no sadino ti pagserserbianmi ken Jehova no di ket ti amin-kararua a panagserbimi kenkuana iti sadinoman nga ayanmi.—Colosas 3:23.
[Blurb iti panid 25]
“Kaay-ayok pay laeng ti ag-surfing, ngem addan nasarakak a napatpateg ngem ‘kadagiti kangayedan nga allon’”
[Ladawan iti panid 22, 23]
Retratok bayat ti panag-surfing-ko, a nausar iti maysa a poster para iti Summer Surf Festival
[Ladawan iti panid 23]
Idi agtawenak iti 13
[Ladawan iti panid 23]
Saan a makapnek ti estilo ti panagbiag dagiti hippie
[Dagiti Ladawan iti panid 25]
Ngato: Tumultulongkami a mangibangon iti Kingdom Hall;
Kannawan: Dakami ken ni Sue ita