Iti Mabiiten “Awanton” ti Krimen
“Iti apagbiit laengen a kanito, ket daydiay nadangkes awanton.”—SALMO 37:10.
TI Namarsua kadatayo, ni Jehova a Dios, ket maseknan unay iti tao a pinarsuana; isu ket saan nga adayo kadakuada kas patien ti dadduma. (Salmo 11:4, 5) Maysa pay, makita ken ammona ti amin a krimen ken kinaawan hustisia nga ar-aramiden dagiti tattao. “Dagiti mata ni Jehova addada iti amin a lugar, a sisisiput kadagidiay dakes ken kadagidiay naimbag.” (Proverbio 15:3) Wen, dagiti nadangkes talaga nga addada “iti nagalis a pagsaadan.”—Salmo 73:12, 18.
Ngem naraniag ti masakbayan dagidiay awan pakababalawanna ken napalungdo, uray no napanglaw ken mailupitlupitda. “Siputam daydiay awan pakababalawanna ket agtalinaedka a sikikita iti daydiay napalungdo,” insurat ni salmista a David, “ta ti masanguanan dayta a tao natalnanto.” (Salmo 37:37) Makaliwliwa unay kadatayo dagita a sasao, yantangay manamnamatayo a makitatayto a matungpal dagita iti intero a lubong iti asidegen a masanguanan.
Agbibiagtayo iti Maudi nga Al-aldaw
Agarup 2,000 a tawen ti napalabasen, adda inyimtuod dagiti adalan ni Jesu-Kristo a mangapektar iti intero a sangatauan. “Ibagam kadakami,” kinunada, “anianto ti pagilasinan . . . ti panungpalan ti sistema ti bambanag?” (Mateo 24:3) Ti sungbat ni Jesus ket detalyado a mabasa iti Biblia iti kapitulo 24 ti Mateo, kapitulo 13 ti Marcos, ken kapitulo 21 ti Lucas. Dagitoy a salaysay ti Ebanghelio deskribirenda ti maudi nga al-aldaw ti agdama a lubong a mapnonto kadagiti gubat, bisin, sakit, dadakkel a ginggined, ken umad-adu a kinadakes.
Dagiti napeggad a kasasaad nga impadto ni Jesus nangrugida idi 1914. Sigun iti historiador a ni Eric Hobsbawm iti librona nga Age of Extremes, ti maika-20 a siglo ket “awan duadua a siglo a kaaduan ti naibukbok a dara iti intero a nairekord a pakasaritaan.”
Kuna ti Biblia maipapan iti agdama nga umad-adu a kinakillo: “No agtubo dagidiay nadangkes kas iti mulmula ket rumangpaya dagiti amin a managaramid iti makapasakit, dayta ket tapno matalipuposda iti agnanayon.” (Salmo 92:7) Wen, nalawag dagiti pammaneknek: Dagiti nagadu a kinadakes—a kas iti kattubo a ruot no panawenna—ipamatmatna nga asidegen ti pannakatalipupos dagiti nadangkes! Saan kadi a naimbag a damag dayta?—2 Pedro 3:7.
“Dagiti Nalinteg Tagikuaendanto ti Daga”
“Dagiti nalinteg tagikuaendanto ti daga, ket agtaengdanto nga agnanayon iti dayta,” kuna ti Salmo 37:29. Amin a kita ti krimen ken kinaawan hustisia mapalabaston. Ngarud, awanton ti amin a bambanag a mainaig iti krimen: dagiti alarma iti krimen, kandado, korte, abogado, polis, ken pagbaludan. “Dagiti immun-una a banag,” ikari ti Biblia, “saandanto a maipalagip, saandanto met a tumpuar iti puso.”—Isaias 65:17.
Wen, ti daga ken ti kagimongan ti tao mapasarandanto ti naan-anay a panagbalbaliw a saan pay a pulos a napaspasamak idi. (Isaias 11:9; 2 Pedro 3:13) Dayta ti agpaypayso a namnama dagiti Saksi ni Jehova, ket awisendakayo a mangsukimat a mismo no kasano a mabiiten a matungpal dayta. Laglagipenyo a Daydiay nangipaltiing iti Nasantuan a Kasuratan “saanna a mabalin ti agulbod.”—Tito 1:2.
[Kahon/Ladawan iti panid 9]
NAESPIRITUAN A TULONG KADAGITI BALUD
Iti adu a tawenen, dagiti Saksi ni Jehova iti Estados Unidos nakaawatda iti surat manipud kadagiti balud iti 4,169 a pagbaludan, ospital, ken pagpaimbagan kadagiti agdrogdroga ken nalabes ti panaginumda iti arak. Dadduma a balud ti agkidkiddaw kadagiti literatura a naibatay iti Biblia; dadduma ti agtarigagay nga agpayadal iti Biblia. Dagiti kualipikado a Saksi inkagumaanda a patgan dagitoy a kiddaw. Kinapudnona, iti intero a lubong, masansan a sumarsarungkar dagiti Saksi kadagiti pagbaludan tapno iyadalanda dagiti balud a lallaki ken babbai a nagkiddaw iti tulong tapno maam-ammoda ti Dios. Adu kadagita ti nangaramiden iti dakkel a panagbalbaliw iti biagda, nabautisarandan kas Kristiano, ken nagbalin a managtungpal iti linteg.