Nadisenio Kadi?

Ti Mata nga Aduan iti Lente

◼ “Dagiti natuontuon a nagsayaat ti pannakaurnosda nga istraktura.” Kasta ti panangdeskribir ni Propesor Luke Lee ti University of California idiay E.U.A. maipapan iti mata ti adu nga insekto.

Utobem: Ti mata ti dadduma nga insekto, kas ti uyokan ken ti tuwato, ket buklen ti adu a lente, a tunggal maysa kadagita ket nakaturong iti agduduma a direksion. Dagiti makita ti tunggal lente ket mamataud iti nalawa ti saklawenna a buya isu a ti insekto ket nalaing nga agsiput iti aniaman a garaw.

Ad-adalen dagiti sientista no kasanoda a matulad ti aduan-lente a mata dagiti insekto tapno makaaramidda kadagiti detektor a makasiput iti napartak a garaw ken kadagiti nakaing-ingpis a kamera a mabalin nga ipokus iti adu a direksion. Nagduduma ti pakausaran dagitoy. Ti maysa ket iti medisina. Kas pagarigan, mabalin a maaramat dayta iti uneg ti tian tapno pageksamen. Dayta nga alikamen a panggep nga usaren dagiti mangngagas ket nadeskribir kas “bassiusit nga instrumento” a mabalin a tilmonen ti pasiente. Apaman nga addan iti tian, dayta ti mangammo kadagiti impormasion babaen ti aduan-lente a matana sana iyallatiw ti impormasion babaen ti transmitter.

Maysa a grupo dagiti inheniero, a mangtultulad kadagiti disenio ti nakaparsuaan, ti nakapatauden iti artipisial a mata nga addaan iti nasurok a 8,500 a lente nga immanay iti espasio a saan a dakdakkel ngem iti 2.5 a milimetro. Ngem awan kaimudinganna dayta a teknolohia no idilig iti narikut a mata dagiti insekto. Kas pagarigan, ti tuwato ket addaan iti agarup 30,000 a lente iti tunggal matana!

Iyimtuodmo iti bagim: ‘Ti kadi nakaskasdaaw a mata dagiti insekto nga aduan iti paset ket naiparparna laeng a timmaud wenno nadisenio?’

[Ladawan iti panid 26]

Napadakkel nga itsura ti maysa a paset ti aduan-lente a mata ti uyokan

[Picture Credit Lines iti panid 26]

Retrato iti intero a panid: © Stephen Dalton/​Photo Researchers, Inc.; napadakkel a retrato: © Raul Gonzalez Perez/​Photo Researchers, Inc.