Manipud Kadagiti Agbasbasa

Tulongan Dagiti Agtutubo a Mangsaranget iti Karit (Marso 2007) Kas maysa nga agtutubo nga agtawen iti 18, apag-isu unay kaniak ti adu kadagiti punto a nadakamat maipapan iti panagusar iti cell phone ken Internet. Babaen ti Internet, makikomkomunikarak kadagiti diak am-ammo. Di nagbayag, nairuboak gapu iti pannakikomunikarko kadagiti dakes a tattao. Dagus a kimmapuy ti espiritualidadko. Immannugotak pay ketdi a makipagkita iti sumagmamano kadagita a tattao. Nakalkaldaang ta nakaaramidak iti imoralidad gapu iti dayta. Sapay koma ta matulongan daytoy nga artikulo dagiti sabsabali tapno maliklikanda ti saem ken tuok a mapaspasarak. Inaldaw a marigrigatanak gapu iti diak pannakaturturog ken pannakalaglagipko kadagiti kapadasak, ngem determinadoak nga agtakder maibusor ken Satanas.

B. R., Estados Unidos

Apay a Matalimudawak? (Abril 2007) Makaparegta a maammuan a saan la a sisiak ti makapaspasar iti pannakatalimudaw. Gapu iti daytoy nga artikulo, mariknak a kasla direkta a kasarsaritanak ni Jehova, a kunkunana, “Ammok ti mapaspasamak kenka, isu nga adtoyak tapno paregtaenka.”

I. R., Madagascar

Ad-adda a Manayon Ngem iti Obra Dagiti Artesano(Abril 2007) Diak ammo no kasanok nga iyebkas ti panagyamanko gapu iti daytoy nga artikulo. Innem a tawen a nagtrabahoak kas manedyer ti dua a narang-ay nga estudio a pagparetratuan. Ipatpategko ti trabahok ken ti nagdakkel a maitultulongna a mangparang-ay iti kinamanagpartuatko. Ngem naamirisko a bayat a rumangrang-ayak ken ad-adda a mapadpadayawanak gapu iti trabahok, kumapkapuy met ti kinaregtak nga agserbi ken Jehova. Naigamerak iti kinaartesanok isu a nagbassiten ti tiempok para iti dadduma a banag. Ammok a nasken nga agbalbaliwak. Gapuna, immikkatak iti trabahok ket ad-adda a nakipasetak kadagiti aktibidad a mainaig iti panagdayaw ken Jehova. Ti pannakapnek ken rag-o a nariknak iti Nakristianuan a ministerio ket adayo a dakdakkel ngem iti rag-o a nariknak iti panagpataud kadagiti agkakapintas a ladawan.

A. P., Estados Unidos

Agimtuod Dagiti Agtutubo . . . Isu Kadi ti Maibagay Kaniak? (Mayo 2007) Itay nabiit, nangrugi a matnag ti riknak iti maysa a tao nga impagarupko a maibagay kaniak. Ngem kalpasan a nabasak dayta nga artikulo, nabigbigko a dagiti magustuak a galadna ket saan a dagiti galad a talaga a napateg. Tinulongannak dayta nga artikulo a mangamiris a ti kangrunaan a napateg iti maysa a pakiasawaan ket dagiti naespirituan a galad ken ti wagas a panangtratona iti sabsabali. Agyamanak ken Jehova gapu kadagiti kastoy nga artikulo a mangsalsalaknib ken mangibagbagnos kadakami nga agtutubo.

E. P., Estados Unidos

Am-ammuem Dagiti Umili iti East Timor (Mayo 2007) Nagustuak unay a binasa daytoy nga artikulo. Damo a nangngegko ti maipapan iti daytoy a pagilian idi naipadamag dagiti panagderraaw sadiay. Sipud idi, pakaseknakon nga ammuen ti kasasaad dagiti tattao idiay East Timor ken no kasano a maap-apektaran ti panangasaba dagiti Saksi ni Jehova sadiay. Nasdaawak iti personalidad dagitoy a tattao, a mangikagkagumaan latta a mangar-aramid kadagiti inaldaw nga aktibidadda iti laksid dagiti naulpit a kasasaad. Malaglagipkonto ti di maisin a kababalin dagiti umili ti East Timor agraman ni Jacob ken ti pamiliana a nakaisemda latta nupay narigat ti kasasaadda.

Y. M., Japan