Panagasawa a Maipaspasango iti Rigat

“Naumaakon!” Nangngegyo kadin nga insawang dayta dagiti agassawa? No naasawaankayon, mariknayo met kadi ti kasta no dadduma?

RINIBU a tattao ti nagasawa bayat a kabarbaraan ti ayatda​—wenno iti panawen a narugsoda—​isu nga ipagarupda a kanayon a naragsak ti panagasawada. “Ngem adu ti nalapunosen iti liday inton umayda agpabalakad kaniak,” kuna ti maysa a mammagbaga. “Naumadan iti asawada, iti biagda kas naasawaan, iti ayatda, ken no dadduma uray iti mismo a biagda.” Adu kadagitoy nga agassawa ti agtultuloy nga agkabkabbalay gapu laengen iti ik-ikutanda a kontrata ti kasar.

Narakrak ti sumagmamano a panagasawa gapu kadagiti adu a pakarigatan ken pakaringgoran. Uray pay no agin-innayat ti agassawa, maibus ti pigsa nga agpaay koma iti asawada gapu kadagiti makabannog unay, napaut, ken agbaliwbaliw ti eskediulna a trabaho. Mabalin met a mapukaw ti ayat ken panagraem gapu kadagiti parikut iti kuarta, rigat ti panangpadakkel kadagiti annak, iyaakar iti sabali a pagtaengan, panagbaliw ti panggedan, ken parikut iti salun-at. Iti ababa a pannao, dagiti panagbalbaliw nga iyeg ti panaglabas ti tiempo ti mangpataud iti rigat a mabalin a mamagsina iti agassawa.

Adu nga ina ti agtartrabaho iti katupag ti dua nga amin-tiempo a panggedan​—iti pagtrabahuan ken iti pagtaengan. Gapuna, naipamaysa laengen ti panawenda iti panggedan ken kadagiti annakda. Iti kasta, awanen ti tiempo dagiti agassawa iti maysa ken maysa gapu iti pannakabannog ken pannakapaksuy. Adu ti mangipagarup a kasla didan makalapsut manipud pannakapaay ken pannakarikna a kaslada agmaymaysa. Apay a maipaspasango ti adu a pagassawaan iti adu a pakarigatan? Ania ti mabalinyo nga aramiden tapno agbalin a naragsak ken naballigi ti panagasawayo?