Tinulongannak ti Dios Tapno Mapagballigiak Dagiti Pakasuotan
Kas insalaysay ni Vazir Asanov
Dagus a bimmangonak ket imbarikesko ti Biblia ken nagdardarasak a nagsukat. Sakbay a timpuakak iti tawa, linukotko ti sumagmamano a kawes, inkabilko iti kama, ket inulesak dagitoy tapno agparang a matmaturogak pay laeng. Kalpasanna, nagturongak idiay Kingdom Hall, ket ikarkararagko iti Dios a tulongannak. Napasamak dayta idi 1991, idi agtawenak iti 14.
NAYANAKAK iti pamilia a Kurd iti makin-abagatan a paset ti siudad a maawagan itan a Kazakhstan, ti maysa idi kadagiti 15 a republika iti Union Soviet. Dagiti nagannak ken kakabagiak immulada iti isipko nga agbalinakto a lider a mangwayawaya kadagiti kailiak. Nangrugi a kinagurak dagiti tattao a kabusor dagiti Kurd nga uray la sisasaganaak a pumatay tapno saan a mairurumen dagiti padami a Kurd.
Idi arinunos ti dekada 1980, kaduak da Nanang ken ti adingko a nakipagadal iti Biblia kadagiti Saksi ni Jehova. Ngem pinaritannakami ni Tatang a makitimpuyog kadagiti Saksi. Kaskasdi, intultuloyko ti nakipagadal. Iti pamilia a Kurd, narigat a sukiren ti ulo ti pamilia. Ay-ayatek ni tatangko, ngem ipatpategko met dagiti maad-adalko a kinapudno iti Biblia.
Ibubusor iti Pagtaengan ken iti Eskuelaan
Naminsan, nakita ti maysa a maestro ti magasin a Pagwanawanan iti bagko ket impulongnak kadagiti dadakkelko. Gapu iti pungtotna, dinissuannak ni Tatang nga uray la nagdaringungoak. “Makitimtimpuyogka pay la kadi iti dayta a relihion?” inriawna.
Kalpasanna, imbaga ni Tatang nga ilaksidnakon nga anak. Nasairak iti nangngegko! Saan la a dayta, adu a kaeskuelaak ti immikay ken dadduma ti nanginsulto kaniak. Dagiti mannursurok imbabada dagiti gradok ken masansan a laisenda ti pammatik bayat ti klase, ta kayatdak a kombinsiren iti ateistiko a pammatida.
Iti laksid dagita nga ibubusor, inkagumaak latta ti timmabuno kadagiti Nakristianuan a gimong ken inranudko ti baro a pammatik iti sabsabali. Di nagbayag, naammuan ni Tatang nga intultuloyko ti panagbasak iti Biblia ken ti pannakitimpuyogko kadagiti Saksi. Maysa a Domingo, nagpambarak ken Tatang tapno makatabunoak iti gimong. Dagus nga imbagana a maturogakon. Nainget a kinunana, “Ita, kada Domingo maturogkan iti kastoy nga oras.” Impangtana a dusaennak no agsukirak, ket ammok a paypaysuenna dayta.
Agsangsangitak a nagkararag iti pudno a Dios a ni Jehova, a paluknengenna ti puso ni Tatang, ngem saan a nagbalbaliw. Nalagipko ti pannakairurumen dagiti Israelita idiay Egipto. Gapu iti panangtrato ni Tatang, naipalagip kaniak ni Faraon, a nanglapped kadagiti Israelita a mapan agdayaw ken Jehova.—Exodo 5:1, 2.
Panangaramid Kadagiti Pangngeddeng
Maysa a Domingo, inkeddengko ti makigimong. Madandanaganak bayat a nakaiddaak ket siuulimek a nagkararagak ken Jehova. Idi simrek dagiti dadakkelko iti kuartok, nagintuturogak. Impannakkel a kinuna ni Tatang, “Talaga a nakatultulnog ti anakko.” Binisongnak, sa siuulimek a pimmanaw. Sipapasnek nga intuloyko ti nagkararag.
Idi nakapanaw dagiti dadakkelko iti kuarto, dagus a bimmangonak, innalak ti sapatosko iti sirok ti kama ket timpuakak iti tawa, kas nadakamat iti rugi. Napartak a limmabas ti dua nga oras a gimong, ket pampanunotek no ania ti mapasamak inton makawidak. Maragsakanak ta uray nakita ni Nanang a ti laeng kawesko ti adda iti kama, dinak impulong ken Tatang. Ngem pinakdaarannak a maminsan pay nga aglibasak, ipulongnanton ti ar-aramidek.
Idi 1992, imbagak kadagiti dadakkelko nga adda naisangsangayan a selebrasion a tabunuan ti gayyemko ket inawisnak. Kinapudnona, ti naisangsangayan nga okasion a planok a tabunuan ket maysa nga asamblea dagiti Saksi ni Jehova iti siudad ti Taraz, nga agarup 100 a kilometro manipud iti pagtaenganmi iti Karatau. Sadiay a mabautisaranak kas simbolo ti dedikasionko ken Jehova. Kiniddawko ken Nanang no mabalin a mangalaak iti sangatimba a bukel ti mirasol iti kamarin. Inkirogko dagitoy ket inlakok, isu nga adda umdas a kuartak a tumabuno iti asamblea.
Idi nakaawidak, dinamag ni Tatang no naragsak ti pannakikuyogko iti gayyemko. Impasiguradok a nakaragragsakak. Mariknak a tinulongannak ni Jehova, ta saanen a nagsaludsod pay ni Tatang. Talaga a magustuak dagiti sasao iti Proverbio 3:5, 6: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.”
Kimmapuyak iti Naespirituan
Saan a simmardeng ti ibubusor ni Tatang idi nabautisaranak. Bayat nga intultuloyko ti nakitimpuyog kadagiti Saksi, nakaro ti panangmalo ni Tatang kaniak uray no adda sabali a kaduak. Dandani inaldaw nga ibabain ken pilitennak nga agsardeng, ket masansan nga agsangitak. Nabiit pay a nagun-odan ti Kazakhstan ti wayawayana manipud iti Union Soviet, ket dagiti dadakkelko ken kakabagiak al-allukoyendak nga agbalin a politiko. Pagarupda nga adda oportunidad a pakaikapkapisak.
Nalataken ni manongko iti isport, ket masansan a parparegtaennak ni Tatang a tuladek ti addangna. Isu nga idi arinunos ti 1994, naigamerak met iti isport. Di nagbayag, adu a premio ken pammadayaw ti naawatko gapu iti naikasigudan a laingko iti soccer ken gymnastic. Nangalaak met iti abogasia tapno matulongakto dagiti padak a Kurd. Naginteresak payen iti politika ket kayatko ti mangbuangay iti partido dagiti agtutubo a Kurd. Mangrugin nga ipagpannakkelnak ni Tatang.
“Nangabakka, Tatang”
Kimmapuyakon iti naespirituan ket insardengkon ti agbasa iti Biblia ken tumabuno kadagiti gimong dagiti Saksi ni Jehova. Pinanunotko a saan a bale ta agserbiakto manen ken Jehova inton natataenganakon. Naminsan, dinamag ni Tatang no makitimtimpuyogak pay kadagiti Saksi ni Jehova. “Saanen. Nangabakka, Tatang,” insungbatko. “Naragsakka kadin?” Apaman a nangngeg dayta ni Tatang, naragsakan unay. “Ita, ibilangkan nga anak!” impannakkelna.
Dua a tawen a diak nakigimong, nupay adda dagiti panawen a kayatko ti makigimong. Mabainak ngamin. Impagarupko a di maawatan dagiti kakongregasionko ti kasasaadko.
Ammok met ketdi nga awanen ti nasaysayaat pay ngem iti panagserbi ken Jehova. Masansan nga ibagak iti bagik nga ay-ayatek ni Jehova! Nangrugi nga idagadag kaniak ni Tatang nga agadalak iti unibersidad. Pinatgak dayta ket inkarik pay nga agturposak nga addaan iti medalia. Ngem mangnamnamaak a masarakak kadagiti Saksi inton makadanonak iti unibersidad iti Almaty, maysa a dakkel ken moderno a siudad iti abagatan a Kazakhstan.
Ragsak nga Inyeg ti Panagbalbaliw Dagiti Kasasaad
Di nagbayag kalpasan a nangrugiak a nageskuela iti unibersidad, nakasaritak ti dua a Saksi bayat a mangaskasabada iti lansangan ti Almaty. Sinaludsodandak, “Asino ti pagarupem a mangiturturay iti lubong?”
“Ni Satanas a Diablo,” insungbatko, “ti kabusor ni Jehova ken ti amin a sangatauan.” (2 Corinto 4:3, 4) Inlawlawagko a maysaak a bautisado a Saksi ngem nagbalinak a di aktibo.
Idi arinunos ti 1996, nakipagadalak manen iti Biblia kadagiti Saksi. Kalpasan ti sumagmamano a pannakiadalko, naaddaanak manen iti tarigagay nga agserbi ken Jehova, ket nakipasetak iti amin nga aktibidad dagiti Saksi idiay Almaty. Idi Setiembre 1997, nagserbiak kas payunir, wenno amin-tiempo a ministro.
Makatawen kalpasanna, binisitanak ni Tatang. Timmarayak a nangarakup kenkuana. Dimmawat iti pammakawan gapu kadagiti panangtratona kaniak iti adu a tawen. Imbagana a di umiso ti pagarupna kaniak ken iti pammatik. “Tatang,” kinunak, “ay-ayatenka unay.”
Anian a ragsakko idi inawatna ti literatura a naibatay iti Biblia ken nagkiddaw iti Biblia, nga imbagana a kayatna nga ungpoten a basaen dayta! Kalpasan ti makatawen, binisitanak manen, a kaduana ni Nanang. Iti Kingdom Hall, kinablaawan ida dagiti tattao a nagduduma ti pulida ken nakiam-ammoda kadakuada. Naay-ayo ni Tatang iti dayta, ket rinugiannan ti agbasa iti literatura dagiti Saksi buyogen ti dakkel nga interes.
Adu a Bendision
Idi Setiembre 2001, inkallaysak ti nagsayaat a balasang a Russo nga agnagan iti Yelena. Nabautisaran kas Saksi idi 1997 ken nangrugi a nagpayunir idi Mayo 2003. Nakaragragsakkami idi nadamagmi a dagiti dadakkelko makipagad-adaldan iti Biblia kadagiti Saksi ket rumangrang-aydan iti naespirituan. Kinapudnona, diak mamati agingga nga imbaga a mismo ni Tatang kaniak. Inteleponona kaniak a ni Jehova ti maymaysa a pudno a Dios!
Maragragsakanak ta ditoy Almaty adda gundawayko a mangyadal iti Biblia kadagiti tattao a naggapu iti adu a lugar, a pakairamanan ti Tsina, Iran, Pakistan, Siria, ken Turkey. Nabiit pay a kiniddaw ti padi a taga-Iran nga iyadalak iti Biblia nga usarenmi ti pagsasaona a Persiano. Maysa a sigud a heneral a taga-Afghanistan ti maragragsakan iti naadalna maipapan ken Jehova. Naragsakanak met a mangyadal iti maysa a taga-Siria nga usarenmi ti pagsasaok a Kurdish, kasta met ti panangyadal kadagiti tattao babaen ti Kazakh ken Russo, dagiti nakayanakak a pagsasao.
Ita, kaduak ni Yelena nga agserserbi iti kongregasion nga agus-usar iti pagsasao a Kazakh—maysa kadagiti nasurok a 35 a kongregasion dagiti Saksi ni Jehova iti Almaty. Idi napan a tawen, naaddaankami ken Yelena iti pribilehio nga agserbi a temporario iti nabiit pay a naibangon a sanga nga opisina dagiti Saksi ni Jehova a masarakan iti asideg ti Almaty.
Nupay nasursuruanak idi a manggura, ni Jehova insuronak nga agayat. Ammok a ditay koma pulos agsardeng nga agserbi ken Jehova, uray no pilitendatayo dagiti kakabagian ken gagayyemtayo. (Galacia 6:9) Ita, maragsakanak ta dakami nga agassawa ‘aduankami iti aramiden iti trabaho iti Apo.’—1 Corinto 15:58.
[Blurb iti panid 13]
Pinakdaarannak ni Nanang a maminsan pay nga aglibasak, ipulongnanton ken Tatang ti ar-aramidek
[Ladawan iti panid 15]
Ti Kingdom Hall idiay Karatau, a pakigimgimongak idi agtutuboak pay
[Ladawan iti panid 15]
Saanen a busbusoren dagiti dadakkelko ti trabahotayo
[Ladawan iti panid 15]
Idi nagkasarkami ken Yelena
[Ladawan iti panid 15]
Dakami ken Yelena iti baro a pasilidad ti sanga nga opisina iti asideg ti Almaty