Ti Panangmatmat ti Biblia

Ania a Talaga ti Dios?

ILAWLAWAG ti Biblia a “ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.” Ipalgak dagita a sasao no ania a talaga ti Dios​—isu ket maysa nga espiritu! (Juan 4:19-24) Kaskasdi, nadeskribir iti Biblia a ti Dios ket maysa a persona, wenno indibidual. Ti naganna ket Jehova.​—Salmo 83:18.

Adda dagiti agbasbasa iti Biblia a nangibaga a mariroda no ania a talaga ti Dios. Yantangay ti Dios ket maysa a di makita nga espiritu imbes nga addaan iti pisikal a bagi, apay a nagadu ti mabasa iti Biblia a kasla mangipakita nga isu ket addaan kadagiti mata, lapayag, agong, puso, takiag, ima, ramay, ken saka?a Mabalin nga ipagarup ti dadduma a ti Dios ket addaan iti pisikal a bagi a kas kadagiti tattao gapu ta kunaen ti Biblia a ti tao ket naparsua iti ladawan ti Dios. Ngem saantayo a mariro no naan-anay nga usigentayo ti kunaen ti Biblia.​—Genesis 1:26.

Apay a Nadeskribir ti Dios a kas Tao?

Tapno maawatan dagiti tattao no ania a talaga ti Dios, dagiti mannurat iti Biblia ket pinaltiingan ti Dios a mangusar kadagiti deskripsion a maar-aramat iti tao a pangtukoyda iti Mannakabalin-amin. Dagiti kasta a termino ket awagan dagiti eskolar iti anthropomorphic, a kayatna a sawen ti “nadeskribir wenno naibilang nga addaan iti langa ti tao wenno kadagiti galad ti tao.” Ipasimudaag dagita a pangtukoy a termino a limitado ti lenguahe ti tao a mangdeskribir iti pudno a Dios a ni Jehova. Ti panggep ket tapno matarusantayo no ania a talaga ti Dios agraman dagiti kapatgan a galadna ken maipaawat dagita kadagiti pamay-an a matarusan ti tattao. Di kayat a sawen dayta a literal ti panangtarustayo kadagita a termino, no kasano a saan a literal ti panangtarustayo no ti Biblia ket tukoyenna ti Dios kas “ti Bato,” “init,” wenno “kalasag.”​—Deuteronomio 32:4; Salmo 84:11.

Umasping iti dayta, tapno maipaawat ti ideya a dagiti galad a naan-anay nga ik-ikutan ni Jehova ket adda met iti tao, nupay iti limitado laeng a pamay-an, kunaen ti Biblia a ti tao ket naparsua iti ladawan ti Dios. Nalawag a di kaipapanan dayta a ti tao ket espiritu wenno ti Dios ket addaan iti pisikal a bagi.

Lalaki Kadi Wenno Babai ti Dios?

No kasano a saantay a tarusan a literal no ti Dios ket madeskribir kas tao, saantay met a tarusan a literal no madeskribir kas lalaki. Kadagiti laeng pisikal a parsua nga adda lalaki ken babai ket maysa dayta a linguistiko a pamay-an a mangipakita a ti lenguahe ti tao ket saanna a naan-anay a madeskribir ti Mannakabalin-amin a Dios a ni Jehova.

Ti panangaramat ti Biblia iti awag nga “Ama” tulongannatayo a mangtarus a ti Namarsua kadatayo ket mabalin a mayasping iti tao a maysa a naayat, manangsalaknib, ken maseknan nga ama. (Mateo 6:9) Di kaipapanan dayta nga ibilangtayo ti Dios wenno ti siasinoman nga espiritu a parsua idiay langit kas lalaki wenno babai. Awan ti lalaki wenno babai kadagiti espiritu a parsua. Makapainteres ta ipasimudaag ti Biblia a dagidiay naayaban a makipagtawid ken Kristo iti nailangitan a Pagarian ket dida ekspektaren nga agtalinaedda a lalaki wenno babai inton maipadayagda kas espiritu nga annak ti Dios. Impalagip kadakuada ni apostol Pablo nga “awan ti lalaki wenno babai” kadakuada inton maipadayagda kas espiritu nga annak ti Dios. Piguratibo a nadeskribirda met kas “ti nobia” ti Kordero a ni Jesu-Kristo. Ipakita amin dagita a saan a rumbeng a tarusantayo a literal ti pannakausar dagiti kualidad ti tao kas pangdeskribir iti Dios​—agraman ken Jesus a bugbugtong nga Anakna, ken iti dadduma pay nga espiritu a parsua.​—Galacia 3:26, 28; Apocalipsis 21:9; 1 Juan 3:1, 2.

Maibasar iti umiso a pannakatarus dagiti mannurat ti Biblia iti akem ti lalaki, tinukoyda ti Dios kas lalaki. Ammoda a ni Jehova, a naayat ken addaan iti naamaan a pannakaseknan kadagiti annakna ditoy daga, ket maitutop a mayasping iti lalaki a siuumiso a mangitungtungpal iti akemna kadagiti annakna.​—Malakias 3:17; Mateo 5:45; Lucas 11:11-13.

Ti Kangrunaan a Galad ti Dios

Nupay ti katan-okan a Soberano ket maysa nga espiritu, saan a pulos nga adayo, misterioso, wenno di mannakikomunikar. Nupay isu ket maysa nga espiritu a persona, saan a makalapped dayta kadagiti tattao a nalinteg ti panagpuspusoda a mayat a mangammo ken mangapresiar iti ayat, pannakabalin, sirib, ken hustisiana. Dagita a galad ti mangipabigbig met iti personalidadna ken nalawag a makita dagita iti sangaparsuaan.​—Roma 1:19-21.

Nupay kasta, ti kinasiasino ti Dios ket mabalin a gupgopen ti kangrunaan a galadna nga isu ti ayat. Gapu ta naisangsangayan unay ti ayatna, naibaga nga isu ket personipikasion ti ayat. (1 Juan 4:8) Dayta a galad ti mangsaklaw iti dadduma pay a kualidad ti Dios, kas iti asi, kinamanangpakawan, ken mabayag a panagitured. (Exodo 34:6; Salmo 103:8-14; Isaias 55:7; Roma 5:8) Ni Jehova ket talaga a Dios ti ayat a mangaw-awis kadatayo nga umadani kenkuana.​—Juan 4:23.

[Footnote]

NAPANUNOTYO KADIN?

◼ Ania ti nagan ti Dios?​—Salmo 83:18.

◼ Pakakitaantayo kadagiti galad ti Dios?​—Roma 1:19-21.

◼ Ania ti kangrunaan a galad ti Dios?​—1 Juan 4:8.