Panangmatmat iti Lubong
◼ Ti opisial a Web site dagiti Saksi ni Jehova (www.watchtower.org) ket mangipapaay ita iti impormasion iti 314 a lenguahe. Itay napan a tawen, nasurok a 22 a milion ti nagsukimat iti dayta a site—promedio a nasurok nga 60,000 iti kada aldaw.
◼ “Ti pananggun-od iti nadalus ken nawadwad a danum agpaay iti isuamin ket maysa kadagiti kadakkelan a parikut a sangsanguen ti lubong ita. . . . Masansan unay a no danum ti kasapulantayo iti maysa a lugar, ti masarakantayo ket dagiti paltog.”—BAN KI-MOON, SEKRETARIO-HENERAL TI UNITED NATIONS.
Kinaragsak ken Salun-at
Nabayagen ti kapanunotan a kaaduanna a nasalsalun-at dagiti naragsak ken positibo a tattao ngem kadagiti managsiksikor, naunget, wenno negatibo a tattao. Kalpasan ti nabiit pay a panagadal, kinuna dagiti managsirarak a dagiti “naragsak” a tattao ket addaan iti nababbaba a cortisol—maysa a kita ti hormone ti panagsikor a mabalin a pakaigapuan ti nagduduma a sakit no nangato dayta iti nabayag. Dagiti kasta a tattao ket addaan met iti nababbaba a “dua a kita ti protina a mangipasimudaag iti nasaknap a panagebbal iti bagi.” Sigun ken Dr. Andrew Steptoe ti University College iti London, “ti kinaragsak ket agpannuray saan laeng nga iti kababalin a natawidtayo kadagiti nagannaktayo no di ket iti wagas ti pannakilangentayo ken no addaantayo iti panggep iti biag.”
Panangpaliiw iti Bulan Babaen ti Teknolohia
Iti ginasuten a tawen, paliiwen dagiti Muslim ti langit tapno makitada ti umuna a paset ti kellep a mamagpatingga iti bulan ti Ramadan ken pangrugian ti Feast of Fast-Breaking. Kas tradision iti dadduma a lugar, direkta a kitaen dagiti tattao ti bulan a dida agusar iti aniaman nga instrumento, sa kalpasanna, adda iyanunsio kadakuada ti lider ti relihionda. Ngem iti las-ud ti naglabas a sumagmamano a tawen, adda dagiti klero a nanganamong iti pannakausar ti teknolohia. Dagiti astronomo ti Iran, a kaduaen dagiti klero a mangpatalged kadagiti mabuyada, ket agus-usar itan kadagiti napigsa a teleskopio, alikamen a pagkita no rabii, ken uray kadagiti eroplano nga addaan kadagiti alikamen nga epektibo unay iti panangpaliiw iti bulan. No nasapsapa a makitada ti paset ti kellep, mabalin a nasapsapa met a mangrugi ti piesta.
Ammo Kadin Dagiti Maladaga ti Agpili?
Dagiti maladaga, nga uray innem pay laeng a bulanda, ket makapatanordan iti “abilidad nga agpili no siasino ti pakigayyemanda sakbay pay a masursuroda ti agsao,” kuna dagiti managsirarak iti Yale University, U.S.A. Dagiti maladaga nga innem agingga sangapulo a bulan ket nagbuyada iti dadakkel ti matana nga ay-ayam a marigrigatan a sumang-at iti katurturodan. Adda dagiti ay-ayam a tumultulong iti dayta a sumang-at ngem adda met dagiti manglaplapped iti isasang-at dayta. Kalpasan ti pabuya, dagiti maladaga ket “naikkan kadagiti kasta nga ay-ayam tapno agpilida iti ay-ayamenda,” inlawlawag ti Houston Chronicle. “Ti pinili ti dandani amin a maladaga ket ti manangtulong nga ay-ayam imbes a ti saan a manangtulong.” Gapuna, uray kaskasano ket “kabaelanen dagiti maladaga a pagdumaen ti naloko ken nasingpet a kaay-ayam, ken ammoda no siasino ti pilienda,” kuna ti pagiwarnak.
“Pannakawaw iti Naibotelia a Danum”
“Nagadu a nakabotelia a danum ti busbusbosen dagiti Americano, dandani 30 a bilion a botelia iti kada tawen,” kuna ti U.S.News & World Report. Ngem adu ti di makaammo a kaaduan a nakabotelia a danum ket naggapu laeng iti gripo. Gapuna, “naallilaw ti siasinoman a mangpili iti nakabotelia a danum gapu ta ipagarupna a makapasalun-at dayta no idilig iti danum iti gripo,” kuna ti magasin. Iti kaaduan a pagilian, ti danum iti gripo ket masuksukimat tapno masigurado a nakapasa daytoy kadagiti nainget a pagalagadan. Ken no maidilig iti “nakanginngina” a nakabotelia a danum, “makuna a libre” ti danum iti gripo!