Agimtuod Dagiti Agtutubo

Rumbeng Kadi nga Ipulongko ti Gayyemko?

“Nakarigrigat. Isut’ nagsayaat a gayyemko.”​—James.a

“Idi damo, talaga a marigatanak. Didakon ikankano gapu ta impulongko ida.”​—Ann.

KUNA ti Biblia: “Adda gayyem a dumekket a nasingsinged ngem iti maysa a kabsat.” (Proverbio 18:24) Nakasarakka kadin iti kasta a gayyem? No wen, nakapatpateg ti nasarakam.

Ngem kasano ngay no nakaaramid iti dakes ti kapammatiam a gayyemmo? Kas pagarigan, kasanon no agsigsigarilio, agin-inum, agdrogdroga, agar-aramid iti imoralidad, wenno dadduma pay a dakes nga aramid? (1 Corinto 6:9, 10; 1 Timoteo 1:9, 10) Ania ti rumbeng nga aramidem? Kasaritam kadi iti nalapat? Ipulongmo kadagiti nagannakmo? Ipulongmo kadagiti nagannakna? Ipulongmo iti panglakayen iti kongregasion?b No ipulongmo, anianto ngata ti pagbanagan ti panaggayyemyo? Saan ngata a nasaysayaat no agulimekka lattan?

Ipulongmo Wenno Saan?

Agkamalitayo amin. Kinapudnona, kuna ti Biblia: “Amin nagbasol ken agkurang iti dayag ti Dios.” (Roma 3:23) Nupay kasta, adda dadduma a makaaramid kadagiti nadagsen a basol. Addada met makaaramid iti “di umiso nga addang” a no saan a makorehir, posible nga agbanag iti nakarkaro a parikut. (Galacia 6:1) Usigem ti sumaganad nga agpayso a pasamak.

◼ Naduktalan ti agtutubo a Kristiano nga agnagan iti Susan a ti gayyemna a kapammatianna met laeng ket addaan iti Web page a naglaon kadagiti makagargari a ladawan ken musika a mangitampok iti pannakiseks.

Panunotem: Ania ti aramidem no sika ni Susan? Adda kadi aramidem maipapan iti dayta? Wenno dimo lattan pakibiangan ti aniaman nga ikabil ti gayyemmo iti Web page? No agpabalakad kenka ni Susan, ania ti ibagam kenkuana?

․․․․․

Ti inaramid ni Susan: Kalpasan a pinampanunotna dayta, inkeddeng ni Susan a kasaritana dagiti nagannak ti gayyemna. Kinunana: “Maamakak idi, agsipud ta imbilangko met ida a nasinged a gagayyem. Urayak la a nakasangit iti rigatko a nangibaga.”

Ania ti makunam? Husto kadi ti inaramid ni Susan? Wenno nasaysayaat no nagulimek latta koman?

Tapno nalawlawag kenka dayta a kasasaad, adtoy ti sumagmamano nga usigem:

Ania ti aramiden ti maysa a pudno a gayyem? Kuna ti Proverbio 17:17: “Ti pudno a kadua agayat iti isuamin a tiempo, ken ti kabsat a mayanak no adda rigat.” No supsupringen ti maysa a tao dagiti prinsipio ti Biblia, isu ket agpaspasar iti “rigat,” maamirisna man dayta wenno saan. Nupay saan nga umiso ti “agbalin a nalabes ti kinalintegna” babaen ti panangpadakkel kadagiti babassit nga isyu, ti pudno a gayyem ket saan nga agimbubulsek iti aramid a di mayanatup kadagiti Kristiano. (Eclesiastes 7:16) Saan a mabalin nga iyaleng-aleng dayta a kasasaad.​—Levitico 5:1.

Kasano ngay no sika ti nagannak? Iyimtuodmo iti bagim: ‘No bilang ta siak ti nagannak ket adda makagargari a bambanag nga inkabil ti anakko iti Web page-na, kayatko kadi ti mapakaammuan maipapan iti dayta? Ania ti riknak no adda gayyem ti anakko a makaammo iti mapaspasamak ngem dina man la imbagbaga dayta kaniak?’

Dagiti ngay pagalagadan ti Dios? Saan a tiempo ita nga agulimekka. Imbes ketdi, rumbeng nga annurotem ti moral a pagalagadan ti Dios a nailanad iti Biblia. Kinapudnona, no itakderam ti umiso, parparagsakem ti puso ti Namarsua kenka. (Proverbio 27:11) Kanayonanna, nalaglag-an ti riknam agsipud ta inaramidmo ti kasayaatan para iti gayyemmo.​—Ezequiel 33:8.

“Tiempo ti Panagsao”

Kuna ti Biblia nga adda “tiempo ti panagulimek ken tiempo ti panagsao.” (Eclesiastes 3:7) Masansan a di ammo dagiti ubbing no ania ti rumbeng nga aramidenda no maipasangoda iti partikular a situasion. No adda kalokuan nga inaramid ti gayyemda, irasonda: ‘Diak kayat a maungtan ti gayyemko,’ wenno ‘Diak kayat a mapagura ti gayyemko.’ No dagita laeng koma ti nasken nga ikabilangan, ti simple nga aramidem ket ‘agulimek’ laengen.

Nupay kasta, bayat nga agmatmataenganka, umun-uneg ti pannakaawatmo kadagiti bambanag. Maamirismo nga agpegpeggad ti gayyemmo ken agkasapulan iti tulong​—tulong a mabalin a magun-odam para kenkuana. Ngem ania ti espesipiko nga aramidem no nadamagmo a ti gayyemmo ket nakaaramid iti maisalungasing kadagiti linteg wenno prinsipio ti Biblia?

Umuna, pasingkedam no agpayso ti nadamagmo. Di la ket ta di umiso a sayangguseng laeng dayta. (Proverbio 14:15) Malagip ti maysa a balasitang nga agnagan iti Katie: “Pinadpadakesnak ti maysa a gayyemko, ket impagarup dagidiay nasinged kaniak a pudno dagiti imbagana. Madanaganak amangan no awanton a pulos ti mamati kaniak!” Impadto ti Biblia a ni Jesus ket saan a “mangtubngar sigun laeng iti banag a nangngeg dagiti lapayagna”​—wenno kas iti panangipatarus ti Contemporary English Version, “saanto a . . . dumngeg kadagiti sayangguseng.” (Isaias 11:3) Ania ti masursurotayo? Saanmo a dagus nga ipapan nga agpayso amin a nadamagmo. Ikagumaam nga ammuen ti agpayso. Usigem daytoy nga aktual a kasasaad.

◼ Ni James, a nadakamat iti rugi daytoy nga artikulo, nadamagna a ti nasinged a gayyemna ket nagdroga iti maysa a pasken.

Panunotem: Ania ti aramidem no sika ni James? Kasano ngata a mapasingkedam no agpayso ti nadamagmo?

․․․․․

Ti inaramid ni James. Idi damo, naginkukuna ni James nga awan ti nadamagna ken dina pulos ammo ti napasamak. “Ngem makonsiensiaakon idi agangay,” kinunana. “Ammok a rumbeng a kasaritak ti gayyemko maipapan iti dayta.”

Ania ti makunam? Ania ngata dagiti pagimbagan ti pannakisarita nga umuna iti tao a naipadamag a nakaaramid iti banag a di mayanatup kadagiti Kristiano?

․․․․․

No saanmo a maitured a kasarita dayta a tao maipapan iti dayta a banag, ania pay ti mabalinmo nga aramiden?

․․․․․

Inamin ti gayyem ni James nga agpayso a nagdroga iti maysa a pasken. Ngem impakpakaasina ken James a dina ibagbaga dayta iti asinoman. Kayat ni James nga aramiden ti umiso. Ngem kayatna met nga aramiden ti gayyemna ti umiso. Isu nga imbagana iti gayyemna nga ikkanna isuna iti makalawas a pawayway tapno ipakaammona dayta kadagiti panglakayen iti kongregasion. No dina aramiden dayta, ni James a mismo ti mangipulong kenkuana.

Iti panagkunam, nainkalintegan ngata ti inaramid ni James? Apay wenno apay a saan?

․․․․․

Saan nga impakaammo ti gayyem ni James dayta a banag kadagiti panglakayen, isu a ni James a mismon ti nagipulong. Ngem idi agangay, nakapagpampanunot met laeng ti gayyemna. Tinulongan dagiti panglakayen tapno maamirisna a nasken nga agbabawi tapno maisubli ti nadalus a relasionna ken Jehova.

Managipulongka Kadi?

Ngem mabalin a mayimtuodmo: ‘No ipulongko ti gayyemko, saan ngata nga agparang a managipulongak? Saan ngata a nalaklaka ti agpammarang nga awan a pulos ti ammok maipapan iti inaramidna?’ No maipasangoka iti kasta a situasion, ania ti maaramidam?

Umuna, annugotem a ti nalaka nga aramiden ket saan a kanayon a naayat a tignay ken ti naayat a tignay ket saan a kanayon a nalaka. Masapul a naturedka a mangipulong iti inaramid ti gayyemmo. Apay a dimo ikararag dayta iti Dios? Kiddawem nga ipaayannaka iti sirib ken tured a kasapulam ket tulongannakanto.​—Filipos 4:6.

Maikadua, panunotem no kasano a ti panangipulongmo ket makagunggonanto iti gayyemmo. Kas pagarigan, magmagnakayo nga aggayyem iti narangkis a bakras ti turod idi pagammuan ta ti gayyemmo ket nagkamali iti panagaddangna isu a natnag iti bakras. Nabatad a kasapulanna ti tulong. Ngem kasano ngay no gaput’ bainna, ibagana kenka nga ikagumaanna lattan a kalay-aten ti narangkis a bakras? Bay-am latta kadin nga isarsarakna ti bagina?

Umasping dayta no maitibkol ti gayyemmo iti Nakristianuan a dana. Mabalin a pagarupenna nga uray no saan nga agpatulong, kabaelanna nga isubli a bukbukod ti relasionna iti Dios. Ngem minamaag ti kasta a panagrasrason. Wen, nalabit mabain ti gayyemmo gapu iti napasamak. Ngem ti panagpatulongmo ket mabalin a mangsalbar iti biag ti gayyemmo!​—Santiago 5:15.

No kasta, saanka a maamak nga agipulong no ti gayyemmo ket nakaaramid iti dakes. Babaen ti panagkiddawmo iti tulong maipaay kenkuana, ipakpakitam a nasungdoka iti Dios a ni Jehova ken iti gayyemmo a nalabit inton agangay, agyamanto kenka gapu iti naayat a tulongmo.

Ad-adu pay nga artikulo ti masarakan iti serye nga “Agimtuod Dagiti Agtutubo” iti Web site a www.watchtower.org/​ype

[Footnotes]

UTOBEM DAGITOY

◼ Kasano a ti panangipulongmo iti dakes nga inaramid ti gayyemmo ket talaga a pakakitaan ti kinasungdom kenkuana?

◼ Siasino dagiti malagipmo a dinakamat ti Biblia a nasubok ti kinasungdoda iti gayyemda? Ania ti masursurom kadakuada?

[Ladawan iti panid 20]

No ti gayyemmo ket naitibkol iti Nakristianuan a dana, masapul a siertuem nga isu ket makagun-od iti tulong