Panangmatmat iti Lubong

◼ Idi 1980, 47 a porsiento iti populasion idiay Germany ti mangibilang a narelihiosuan ti kapatgan nga aspeto ti Bisperas ti Krismas. Ita, 8 a porsiento laengen ti addaan iti kasta a panangmatmat.​—TV NEWS CHANNEL N24, GERMANY.

◼ “Iti intero a pakasaritaan ti Estados Unidos, ita pay laeng a nasurok a maysa iti kada 100 nga adulto nga Americano ket balud . . . Iti intero a pagilian, agarup 1.6 a milion ti nakabalud.”​—THE NEW YORK TIMES, U.S.A.

◼ Natakuatan iti maysa a panagadal nga adda maysa wenno ad-adu pay a kita ti pestisidio iti bagi ti “100% kadagiti Espaniol a naeksamen.” Dagita ket “substansia a maibilang iti intero a lubong kas makadadael iti salun-at.”​—UNIVERSITY OF GRANADA, SPAIN.

◼ “Kadagiti pagilian nga adda magun-odan nga impormasion, nasurok a 500 a daras nga ad-adu ti mapaspastrek a buis ti tabako ngem iti magasgastos iti panangkontrol iti dayta.”​—WORLD HEALTH ORGANIZATION, SWITZERLAND.

◼ Ad-adun ti miembro ti Islam ngem ti Romano Katoliko. Idi 2006, Islam kanon ti 19.2 a porsiento ti populasion iti lubong, idinto ta Romano Katoliko ti 17.4 a porsiento.​—REUTERS NEWS SERVICE, BRITAIN.

Timmulong ti Ullaw a Nangguyod iti Barko

Kadagitoy a panawen a nguminngina ti petroleo ken dumegdegdeg dagiti pakaseknan iti kasasaad ti aglawlaw, agsapsapul dagiti makinkukua kadagiti barko iti pamay-an tapno maksayan ti polusion ken konsumo iti petroleo. Us-usarenda ti nabayagen a katulonganda​—ti angin. Ti maysa a pamay-an a pinadasdan ket ti panangusar iti ullaw a tumulong a mangguyod iti barko, inreport ti periodiko a Frankfurter Allgemeine Zeitung. Ti ullaw a 300 a metro ti kangatona ket iduron ti angin isu a ti kapitan mabalinna a pakapsuten ti makina ti barko. Nabiit pay a nausar ti 160 metro kuadrado nga ullaw a nangpaandar iti pangkargamento a barko a bimmallasiw iti Taaw Atlantico.

Malasatanda ti Tikag

“Dagiti igges ti maysa a kita ti insekto idiay Africa malasatanda dagiti nakaro a tikag babaen ti panagbalinda a kas katangken ti kendi,” kuna ti Science News. No bassit unayen ti danum iti bagi dagiti igges ti insekto a Polypedilum vanderplanki, ti danum iti selulada ket masukatan iti kasla sarming a substansia a kaarngi ti timmangken a narunaw nga asukar. Iti kastoy a kasasaad, naan-anay nga agsardeng ti metabolismo dagiti igges. Makapagtalinaed dagiti igges iti kastoy a “di aggargaraw a kasasaad” uray pay agingga iti 17 a tawen sakbay a paungaren ida ti sumaganad a panagtutudo.

Ti Kasayaatan a Lugar Para iti Panagpaliiw iti Law-ang

Maysa nga internasional a grupo ti nangipasdek iti obserbatorio para iti panagpaliiw iti law-ang. Bin-ig a robot ti mangpapaandar iti dayta nga obserbatorio idiay Dome Argus. Dayta ti kangatuan a disso iti banak wenno nangato a kapatagan iti Makindaya nga Antarctica ta 4,000 a metro ti kangatona manipud patar ti baybay. Tangay agarup 1,000 a kilometro laeng ti kaadayona manipud South Pole, nakalamlamiis sadiay ken no dadduma, nakasipsipnget. Natalna ken saan a naagneb ti angin, ken uppat a bulan ti kapaut ti rabii. Ti Dome Argus ket maibilang a kasayaatan a lugar ditoy daga para iti panagpaliiw iti law-ang. Uray no teleskopio laeng ti mausar, kuna ni Lifan Wang a direktor ti Chinese Center for Antarctic Astronomy, “posible ti manggun-od kadagiti ladawan a kas kalawag dagiti naala iti law-ang ken basbassit nga amang ti magastos ngem iti panangipatayab iti teleskopio iti law-ang.”