Ti Panangmatmat ti Biblia

Pannusa Kadi ti Dios Dagiti Mapaspasaram a Parikut?

“Panagkunak ket madusdusaak,” kuna ti maysa a babai nga agtawenen iti 55 kalpasan a naammuanna nga isu ket addaan iti kanser. Gapu ta malagipna ti naaramidna a basol adu a tawenen ti napalabas, impapanna, “Daytoy la ketdi ti pamay-an ti Dios a mangipabigbig a nagbasolak.”

NO MAIPASANGODA kadagiti pakarigatan, adu a tattao ti mangipagarup a dusdusaen ida ti Dios gapu iti basolda iti napalabas. Gapu iti kellaat nga agtutupatop a parikut, nalabit mayunnoyda: “Apay a siak pay? Ania aya ti naaramidko tapno lak-amek daytoy?” Rumbeng kadi nga ipapantayo a dagiti parikuttayo ket pagilasinan a dinatay an-anamongan ti Dios? Dagiti kadi personal a pakarigatan ket talaga a pannusa ti Dios?

Nakapasar iti Rigat Dagiti Matalek a Managdaydayaw

Usigenyo ti salaysay ti Biblia maipapan iti lalaki nga agnagan Job. Dina napakpakadaan ti kellaat a pannakapukaw ti kinabaknangna. Simmaganad, natay amin ti sangapulo nga annakna gapu iti allawig. Di nagbayag, nagsagaba iti naut-ot ken nakaar-ariek a sakit. (Job 1:13-19; 2:7, 8) Gapu kadagita a pakarigatan, nakuna ni Job: “Nagdissuor kaniak ti ima ti Dios.” (Job 19:21, Ti Baro a Naimbag a Damag Biblia) Nabatad a kas iti adu ita, impagarup ni Job nga isu ket dusdusaen ti Dios.

Nupay kasta, ipalgak ti Biblia a sakbay a napasaran ni Job dagiti pakasuotanna, isu ket dineskribir a mismo ti Dios kas “maysa a lalaki nga awan pakababalawanna ken nalinteg, agbuteng iti Dios ken sumiasi iti dakes.” (Job 1:8) Gapu kadagita nga ebkas ti pananganamong ti Dios, nalawag a dagiti rigat a napasaran ni Job ket saan a pannusa ti Dios.

Kinapudnona, naglaon ti Biblia iti adu a salaysay maipapan kadagiti nalinteg a tattao a nakapasar kadagiti pakarigatan. Nupay nasungdo nga adipen ti Dios, nasurok a dua a tawen nga inibturan ni Jose ti di nainkalintegan a pannakaibaludna. (Genesis 39:10-20; 40:15) ‘Masansan a nagsakit’ ti matalek a Kristiano a ni Timoteo. (1 Timoteo 5:23) Ken uray ni Jesu-Kristo a di pulos nagbasol, nagsagaba iti nakaro a pannakamaltrato sakbay ti nakas-ang nga ipapatayna. (1 Pedro 2:21-24) Gapuna, di ngarud umiso nga ipagarup a ti pakarigatan ket pakakitaan iti gura ti Dios. Ngem no saan a ti Dios ti makinggapuanan iti dayta, siasino ngarud, no adda man?

Dagiti Makagapu Kadagiti Parikuttayo

Ipakita ti Biblia a ni Satanas a Diablo ti makinggapuanan kadagiti trahedia a napasaran ni Job. (Job 1:7-12; 2:3-8) Tinukoyna pay a ni Satanas ti kangrunaan a pagtataudan dagiti parikuttayo ita. Mabasatayo: “Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” (Apocalipsis 12:12) Kas “agturay iti daytoy a lubong,” im-impluensiaan ni Satanas ti adu a tattao nga agaramid iti dakes nga agresulta iti nakaro unay a rigat ken ladingit.—Juan 12:31; Salmo 37:12, 14.a

Ngem saantayo koma a dagus a pabasolen ti Diablo iti tunggal pakarigatan a mapasarantayo. Gapu iti natawidtayo a basol ken kinaimperpekto, nalakatayo a makaaramid kadagiti di nainsiriban a desision a mangyeg kadatayo iti parparikut. (Salmo 51:5; Roma 5:12) Ipapantayon nga adda tao a nangikeddeng a saan a mangan a naimbag ken saan nga aginana iti umdas. No agsakit iti nakaro inton agangay, rumbeng kadi a pabasolenna ti Diablo? Saan, ap-apitenna laeng dagiti makadangran a bunga ti di nainsiriban a desisionna. (Galacia 6:7) Dayta a kasasaad ket umasping iti maysa a proverbio iti Biblia: “Adda tattao a mangdadael kadagiti bagbagida babaen kadagiti minamaag nga aramidda.”—Proverbio 19:3, Ti Baro a Naimbag a Damag Biblia.

Kamaudiananna, masapul a bigbigentayo nga adu a di makaay-ayo a pasamak ket resulta laeng “ti tiempo ken ti di mapakpakadaan a pasamak.” (Eclesiastes 9:11) Kas pagarigan, naranaan ti maysa a tao ti napigsa a tudo. Ti medio pannakabasana wenno ti pannakarusepna ket depende iti ayanna idi mangrugi ti tudo. Umasping iti dayta, kadagitoy “napeggad a tiempo a narigat a pakilangenan,” dagiti di nasayaat a kasasaad ket alisto laeng a mangibunga iti manglapunos a pakarigatan. (2 Timoteo 3:1-5) Ti kakaro ti pannakaapektartayo a mismo ket masansan nga agdepende iti tiempo ken kasasaad, a bassit laeng wenno awan pay ketdi ti kontroltayo kadagita. Kaipapanan kadi daytoy a kankanayon lattan nga agsagabatayo iti rigat?

Asidegen nga Agpatingga ti Amin a Pakarigatan

Makaparagsak ta ni Jehova a Dios asidegen a pagpatinggaenna ti amin a pakarigatan. (Isaias 25:8; Apocalipsis 1:3; 21:3, 4) Kabayatanna, ipakpakitana a talaga a maseknan kadatayo babaen ti panangipaayna iti “pakasursuruantayo” ken “liwliwa manipud iti Kasuratan” tapno maibturantayo ita dagiti pakarigatan bayat nga ur-urayentayo ti asidegen a nagsayaat a masanguanan. (Roma 15:4; 1 Pedro 5:7) Iti dayta a tiempo, dagiti nalinteg iti imatang ti Dios agbiagdanton nga agnanayon iti baro a lubong nga awanen ti aniaman a pakarigatan.—Salmo 37:29, 37.

[Footnote]

NAPANUNOTMO KADIN?

◼ Dagiti laeng kadi nadangkes ti agpasar iti pakarigatan?—Job 1:8.

◼ Ti kadi Diablo ti mapabasol iti amin a parikuttayo?—Galacia 6:7.

◼ Agnanayon kadi nga adda pakarigatan?—Apocalipsis 21:3, 4.

[Blurb iti panid 29]

“Ti tiempo ken ti di mapakpakadaan a pasamak mapagteng kadakuada amin.”—Eclesiastes 9:11