Naisangsangayan a Probision Agpaay iti Sangatauan

SAAN laeng nga angin, taraon, ken danum ti kasapulan dagiti tattao. Tapno agbalintayo a pudpudno a naragsak, nasken a penkentayo ti naespirituan a kasapulantayo. Masapul nga ammuentayo ti panggep ti biag ken no apay nga addatayo ditoy. Gapuna, kinuna ni Jesu-Kristo: “Naragsak dagidiay sipapanunot iti naespirituan a kasapulanda.”—Mateo 5:3.

Kabaelan ti Dios a penken dayta a kasapulantayo babaen ti sagrado a libro a kasaknapan a maiwarwaras iti intero a lubong, ti Nasantuan a Biblia, a magun-odan itan ti kompleto wenno ti dadduma a pasetna iti agarup 2,400 a lenguahe. (2 Timoteo 3:16) Ibaga kadatayo ti Biblia a ti Dios pinarsuana ti uniberso ken ti amin a biag ditoy daga. (Genesis, kapitulo 1 ken 2) Ibagana pay a ti Dios biningayna ti panamarsuana iti innem a piguratibo nga “al-aldaw,” wenno panawen, a ti panagsasaganadna ket maitunos kadagiti kawatiwat ti panawen a nabusbos iti pannakabukel ti daga, kas impasdek dagiti sientista.

Ti Biblia ipalgakna pay ti panggep ti Dios agpaay iti sangatauan. Nailanad dayta iti Salmo 37:29: “Dagiti nalinteg tagikuaendanto ti daga, ket agtaengdanto nga agnanayon iti dayta.” Imutektekanyo ta dagiti nalinteg iti moral ken naespirituan a pamay-an agbiagdanto nga agnanayon saan nga idiay langit no di ket ditoy daga. Awanto ti polusion ditoy daga. Imbes ketdi, agbalinto a paraiso ti intero a daga.—Salmo 104:5; Lucas 23:43.

Pannakaammo a Mangiturong iti Biag

Adda dua nga aspeto dayta a paraiso—pisikal ken naespirituan. Kuna ti Isaias 11:9: “Ti daga sigurado a mapnonto iti pannakaammo ken Jehova kas iti dandanum abbonganda ti mismo a baybay.” Dayta a pannakaammo a naitukit iti puso dagiti pudno a Kristiano tignayenna ida uray itan nga agbiag buyogen ti talna ken panagkaykaysa. Kanayonanna, ipappapusoda ti inkararag ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”—Juan 17:3.

No kayatyo a maammuan ti ad-adu pay maipapan iti namnama a nailanad iti Biblia, maragsakan dagiti Saksi ni Jehova a mangtulong kadakayo.a

[Footnote]