Nasamsamay Ngem Agas

IDI agtawen iti 32 ni Lena, a nadakamat iti umuna nga artikulo, “napalalo ti pannakakonsiensiana ken kanayon a pampanunotenna dagiti negatibo a bambanag ken ti ipapatay,” gapu iti pannakaadiktona iti agas. “Kas maysa nga asawa ken ina, kayatko ti agbalin a nasingpet,” insuratna, “ngem naladingit ken nakaay-ay-ay ti biagko ken ti bambanag iti lubong isu a kasla awan ti rason nga agsingsingpetak. Adda dagiti gundaway a pinadasko ti agbalin a nasingpet, ngem napaayak.”

Kalpasanna, ni Lena ket nakipagadal iti Biblia kadagiti Saksi ni Jehova. Di nagbayag, ti kinapudno ti Biblia ti nangted kenkuana iti talna ti panunot ken bang-ar. “Ita pay laeng a nakariknaak iti kasta,” kinunana. Ti pannakaammo kadagiti prinsipio ti Biblia ken ti nagsayaat a namnama iti masanguanan ti nangtignay kenkuana a mangbalbaliw iti biagna ken mangparmek iti pannakaadiktona.

Dagiti Prinsipio Agpaay iti Biag

Ti Namarsua a ni Jehova a Dios inrantana nga agpaay kadatayo dagiti linteg ken prinsipio a masarakan iti Biblia. Kuna ti Salmo 19:7, 8: “Ti linteg ni Jehova perpekto, mamagsubli iti kararua. . . . Dagiti bilin manipud ken Jehova nalintegda, mamagrag-o iti puso; ti bilin ni Jehova nadalus, mamagsilnag iti matmata.”

Kas pagarigan, idagadag kadatayo ti 2 Corinto 7:1 a “dalusantayo koma ti bagbagitayo iti tunggal pakatulawan iti lasag ken iti espiritu.” Impapuso ni Lena dayta a bersikulo ti Biblia, ket dayta ti timmulong kenkuana a mangiwaksi iti pannakaadiktona. Kasta met ti napasamak ken Myra, a nadakamat met iti umuna nga artikulo daytoy a serye. No malagipyo, nagbalin nga adikto iti agas a naireseta kenkuana para iti sakit ti ulo. Kasano a tinaming ni Myra ti parikutna? Sipaprangka nga inyumanna dayta iti doktorna, a nangtulong kenkuana nga agbirok iti sabali a kita ti pannakaagas.a Mainayon pay, ginundawayanna dagiti naespirituan a pammaregta dagiti kakabsat iti Kristiano a kongregasion.

Agpada met a nagpatulong da Lena ken Myra babaen ti kararag. Kuna ti Filipos 4:6, 7: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo.” Adda maysa nga adipen ti Dios idi umuna a panawen a naaddaan iti kasta a talna ti panunot. Insuratna nga idi ‘immadu dagiti mangrirriribuk iti panunotna,’ dagiti sasao ti Dios ti nangted kenkuana iti kinatalinaay, liwliwa, ken ragsak. (Salmo 94:19) Masarakan dagiti kasta a makaliwliwa a sasao kadagiti pinanid ti Biblia ken kadagiti pammaregta ken saranay dagiti makapabileg a Kristiano a kakadua, agraman dagiti Kristiano a panglakayen.

Ngem no dadduma, mabalin a marikna ti tao nga awan serserbina gapu iti pannakaadiktona iti agas. Insurat ni Janice, maysa a Kristiano a naadikto iti reseta nga agas iti adu a tawen: “Dagiti adikto ket mabalin a kimmapuyen ti espiritualidadda ken karurodda ti bagida isu a marigatanda nga agpatulong ken Jehova iti bukodda.” No kasta ti kasasaad, ad-adda a kasapulan nga agpatulongda kadagiti nataengan a Kristiano. Ti naayat ken agtultuloy a pammaregta ken karkararagda “paimbagennanto ti addaan sagubanit.” (Santiago 5:15) Siempre, no ti adikto ket maysa nga ubing, masapul a maaddaan dagiti nagannak iti dakkel a pannakaseknan iti naespirituan ken pisikal a pannakapaimbagna—no saan, agsubli ti pannakaadiktona.

Nagpaagas ni Janice iti maysa a rehabilitasion, naparmekna ti pannakaadiktona, ken saannan a pulos a sinublian dayta. “Nagpannurayak ken Jehova tapno mapagballigiak dagidi a narikut a tiempo,” insuratna. “Natalna itan ti biagko ken agsubsublin ti dati a naragsak a personalidadko.”

Inton Awanen ti Problematayo

Dumtengto ti aldaw a saantayto a kasapulanen ti aniaman nga agas. Kasano? Kuna ti Apocalipsis 21:3, 4: “Ti tolda ti Dios adda iti sangatauan . . . Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag [a pakairamanan dagiti parikuttayo ita] naglabasdan.”

Ti Biblia inyarigna ti Nakristianuan a namnama kas “maysa a sinipete maipaay iti kararua, agpadpada a sigurado ken natibker.” (Hebreo 6:18, 19) No dagiti managlayag idi umuna a tiempo maipasangoda iti bagyo, itinnagda dagiti sinipete ti barko. Apaman a maipalok ti sinipete iti tukok ti baybay, iliklikna ti barko a maipan iti napeggad a kadilian wenno maisadsad. Umasping iti dayta, ti “sigurado ken natibker” a namnama a nailanad iti Biblia tulongannatayo a mangtaginayon iti emosional, mental, ken espiritual a kinatimbeng no tumaud dagiti arig bagyo a pakasuotan—ta sigurado a sumangbay dagita!

Apay a diyo sukimaten ti Biblia ket kitaenyo no kasano a makatulong ken makapabileg dagiti balakad ken pannursurona? Maragsakan dagiti Saksi ni Jehova a tumulong kadakayo, ket dikayto mapaay.

[Footnote]

[Blurb iti panid 9]

“Dikay maringgoran iti aniaman, no di ket iti amin a banag babaen iti kararag ken araraw . . . maipakaammo koma dagiti dawatyo iti Dios; ket ti talna ti Dios . . . saluadannanto dagiti pusoyo ken dagiti pannakabalin ti isipyo.”—Filipos 4:6, 7

[Kahon/Ladawan iti panid 10]

PANANGPASAYAAT ITI SALUN-AT

Ti panagehersisio ket “temporario a mangpasayaat iti rikna ken mangipaay iti apagbiit a gin-awa manipud iti depresion,” kuna ti libro a Managing Your Mind—The Mental Fitness Guide. Makatulong met ti panangbalbaliw iti dieta ken rutina—iti pisikal ken mental. Usigenyo ti napasaran ni Valerie, a naabuso idi ubing pay. Naadikto iti di kumurang a 12 a nagduduma a reseta nga agas. Kaskasdi, naparmekna dayta ket naaddaan iti normal a biag uray kaskasano. Ania ti inaramidna?

Imbes nga agbuya iti telebision ken agbasa kadagiti saan a makagunggona a nobela, nangipasdek ni Valerie iti regular a panagadal iti Biblia, ken panagbasa kadagiti naibatay iti Biblia a publikasion nga ipabpablaak dagiti Saksi ni Jehova, a pakairamanan daytoy a magasin. Kanayon met nga ikararagna ti pammabileg ti Dios, nagpatulong iti kongregasion Kristiano, ken nagbalin nga okupado kadagiti makagunggona nga aktibidad kas iti panangiranud iti makaliwliwa a mensahe iti Biblia. Malaksid iti dayta, insardengnan ti mangan kadagiti saan a makapasalun-at a taraon. Nasdaaw dagiti doktor iti rimmang-ayan ti salun-atna. Adu a tawenen a nakalapsut iti droga.b

[Footnote]