Naidagadag a Mangasaba Dagiti Agtutubo a Katoliko

BABAEN ITI MANNURAT TI AGRIINGKAYO! IDIAY AUSTRALIA

IDI Hulio, dagiti Romano a Katoliko iti intero a lubong ket nagtataripnong ditoy Sydney, Australia, tapno rambakanda ti World Youth Day 2008, maysa a narelihiosuan a taripnong nga inesponsoran ti Iglesia Katolika.

Dagiti mangiwagwagayway kadagiti banderitas a sangaili manipud iti 170 a pagilian naguummongda kadagiti kalsada. Agdirdir-i ken agkankantada isu a kasla agpipiesta ti intero a siudad. Rinibu ti agur-uray iti Sydney Harbor tapno makitada ni Pope Benedict XVI, a simmangpet babaen ti barko a kinuyog ti 12 pay a namaris a barangay. Agarup 500 a milion a tattao iti intero a lubong ti nangbuya iti dayta kadagiti TV.

Ti maudi a Misa a naangay iti pagkareraan dagiti kabalio iti daytoy a siudad ket tinabunuan ti 400,000 a tattao, karaman ti 4,000 nga opisial ti simbaan ken 2,000 a kameng ti media. Dayta pay laeng ti kadakkelan a taripnong a naangay ditoy Australia ta ad-adu ti dimmar-ay iti dayta ngem iti Olimpiada idi 2000 a naangay iti daytoy met la a lugar.

Ania ti World Youth Day? Apay a naangay dayta? Ania dagiti aktibidad a naaramid? Ken ania ti impalgakna no maipapan iti pammati dagiti agtutubo ditoy Sydney?

“Kumapkapuyen ti Pammatida”

Ti World Youth Day ket tinawen a taripnong tapno maparegta ti pammati dagiti agtutubo a Katoliko. Ramrambakan dayta dagiti Katoliko kadagiti simbaan iti lugarda. Ngem kada dua wenno tallo a tawen, adda dakkel a siudad a pakaangayan dayta ket maawis a dumar-ay dagiti agtutubo a Katoliko iti intero a lubong. Sangapulo a siudad iti lima a kontinente ti nakaangayanen dagiti kasta a panagtataripnong, ket minilionen ti nakadar-ay kadagita.

Ngem kas inadmitir dagiti opisial ti simbaan, panggep met ti World Youth Day a lapdan ti bumasbassit a bilang dagiti Katoliko ken ti kumapkapuy a pammatida. Kinuna ti maysa a nangato ti saadna a padi dagiti Katoliko iti Australia a ni George Cardinal Pell: “Mapaspasaranmi ti nakaro a parikut kadagiti miembromi a saanen a mangan-annurot iti Kinakatolikoda ken kumapkapuyen ti pammatida. Panggep ti World Youth Day a risuten dayta.”

Sigun iti Vatican, bumasbassiten ti bilang dagiti papadi iti intero a lubong. Kadagiti kallabes a dekada, pinullo a ribu a padi ti nagikkat iti kinapadida tapno mangasawada. Ti bilang dagiti seminarista iti Australia ket nagsuek iti nasurok a 70 a porsiento iti napalabas a 30 a tawen. Ti promedio nga edad dagiti padi iti kadakkelan a diosesis iti Australia ket nasurok nga 60, agarup 20 a tawen a laklakay ngem iti promedio idi 1977.

Iti adu a pagilian, bimmassit met ti bilang dagiti makimismisa. Agarup 25 a porsiento kadagiti amin nga Australiano ti mangibaga a Katolikoda, ngem 14 a porsiento laeng ti kanayon a makimisa. Awan kano pay 10 a porsiento kadagiti agtutubo a Katoliko ti makimismisa. Kabayatanna, adu a Katoliko ti di mangan-annurot kadagiti doktrina ti relihionda maipapan iti seksual a moralidad, kontraseptibo, ken diborsio wenno panagsina. Adu ti madisdismaya gapu kadagiti eskandalo a mapaspasamak iti simbaan, kas kadagiti papadi a mangmolmolestia kadagiti ubbing.

Kuna ti The Sydney Morning Herald a ti World Youth Day “ket talaga a desperado a pamuspusan tapno mapasardeng ti panagkapuy ti impluensia ti simbaan. Dagiti mangidadaulo iti simbaan iti Australia ken Roma ket mangnamnama a babaen kadagiti agtutubo, rumegta ken umadu manen dagiti miembroda.” Ania ti ar-aramiden dagiti mangidadaulo iti simbaan tapno maallukoyda dagiti agtutubo?

Dagiti Pabuya ken Panagraragsak

Nairaman iti World Youth Day 2008 dagiti pabuya ti simbaan, grupo a panagsasarita, grupo a panagpasiar kadagiti maibilbilang a nasantuan a lugar, ken dadakkel a Misa. Nupay dagita nga aktibidad naparegtada unay ti adu kadagiti dimmar-ay, nadlaw ti dadduma ti sabali a kababalin a mangparparagsak iti dayta a selebrasion. Kastoy ti kinuna ni Alexandra a maysa nga agtutubo a Katoliko manipud Estados Unidos maipapan iti World Youth Day: “Maysa laeng dayta a dakkel a party.”

Ti innem nga aldaw a taripnong ditoy Sydney intampokna ti 450 a makapaengganio a pabuya, agraman konsierto, sine, aktual a drama, eksibit, ken panagpabuya kadagiti kalsada. Nadumaduma ti musika a nausar ta adda heavy metal, rap, ken kankanta kadagiti teatro ken simbaan. Rinibu a naariwawa nga agtutubo ti nagaaripuno kadagiti rock concert.

Adu a Katoliko ti nagbalaw kadagita nga aktibidad. Ti okasion ket “nagbalin laengen a maysa a naragsak a party—makalawas a panagragragsak, konsierto, ken nailubongan nga ar-aramid a manmano kadagita ti pudno a nasantuan ken sagrado,” kinuna ti padi a ni Peter Scott iti ABC News ditoy Australia. Kinapudnona, ni Cardinal Ratzinger a Pope Benedict XVI itan, kastoy ti insuratna idi tawen 2000: “[Ti musika a] ‘rock’ ket ebkas dagiti tarigagay ken derrep. Kadagiti rock concert, agbalin dayta a musika kas ebkas ti maysa a kita ti panagdayaw nga umasping iti kulto a ti kinaagpaysona ket maikontra iti Nakristianuan a panagdayaw.”—The Spirit of the Liturgy.

Mabalin a tumaud ti saludsod a, “Talaga kadi nga epektibo ti World Youth Day a mangbalbaliw iti biag?” Kinuna ti dati a padi a ni Paul Collins: “Nalabit balbaliwanna ti biag ti sumagmamano. Ngem kaaduan ket agsubli iti dati a kabibiagda.” Kinunana pay: “Saan a mapasamak dagiti napateg a panagbalbaliw babaen kadagiti naisangsangayan a pabuya ken panagragragsak no di ket babaen iti naanep a panagusig, naannad a panagplano, ken masindadaan a panangilinteg kadagiti nakaro ken nabayagen a problema.”

“Dakayto Dagiti Saksik”

Dagita a kinapudno ket nabatad nga ammo dagiti mangidadaulo iti simbaan. Gapuna, intampok ti World Youth Day 2008 ti tema nga: “Umawatkayto iti pannakabalin inton dumteng kadakayo ti Nasantuan nga Espiritu, ket dakayto dagiti saksik.”a

Dagiti obispo indagadagda kadagiti dimmar-ay a “kas koma kadagidi apostol ti kinaregtada a mangsaksi iti kaaldawantayo maipapan kadagiti sursuro ni Kristo.” Ginutugot ni Pope Benedict XVI dagiti dimmar-ay nga agbalinda a “baro a henerasion dagiti apostol,” ken iti sabali pay a gundaway, imparegtana kadakuada nga ikasabada “ti Naimbag a Damag kadagiti gagayyem, kapamilia, ken iti amin a masabatda.”

Dagita a pammaregta ti nangtukay iti rikna ti dadduma a napasnek a dimmar-ay. Ti 20 anyos a ni Ramido a taga-Estados Unidos kinunana iti maysa a reporter: “Kayatko nga ipaypayso ti panagbalin a saksi.” Ngem kastoy ti napaliiw ti 18 anyos a ni Beatrice a taga-Italia: “Saan nga isarsarita dagiti agtutubo ita ti maipapan iti Dios. Narigat ti agbalin a saksi ita.” Adu kadagiti dimmar-ay ti nagkomento iti kas iti kinuna ti dua a babbalasitang a taga-Texas, E.U.A., “Dagiti laeng Saksi ni Jehova ti mangaskasaba iti lugarmi!”

Dagiti Agtutubo a Mangaskasaba

Talaga nga agdindinamag dagiti ubbing ken nataengan a Saksi ni Jehova gapu iti naregta a panangaskasabada. Apay nga ar-aramidenda dayta? “Ay-ayatenmi ngamin ti Dios, dagiti tattao, ken ti Biblia,” kinuna ti 22 anyos a ni Sotir a maysa kadagiti Saksi ditoy Sydney.

Kabayatan ti World Youth Day 2008, agarup 400 nga agtutubo a Saksi iti Sydney ti napan iti pakaang-angayan dayta a selebrasion, saan a tapno dumar-ay, no di ket tapno makiraman iti espesial nga urnos ti panangikasaba kadagiti kinapudno ti Biblia kadagidiay dimmar-ay a Katoliko. “Maragsakanak a makaam-ammo kadagiti agtutubo a Katoliko a naespirituan ti panagpampanunotda,” kinuna ti 25 anyos a ni Travas. “Adu kadakuada ti addaan iti nagsayaat a salsaludsod maipapan iti Biblia, ket siraragsak nga impakitak kadakuada dagiti makapnek a sungbat.”

“Nainggayyeman ti pannakisaritak,” kinuna ni Tarsha a 23 anyos. “Imbagak kadakuada a maragsakanak iti iyaayda ditoy Sydney ken kayatko met a maammuan no ania dagiti patpatienda.” Kinuna ti 20 anyos a ni Frazer: “No maitutop, dagiti makasaritak ket regaluak iti libro nga Ania a Talaga ti Isursuro ti Biblia? b Naragsakan ti amin nga inikkak iti dayta.”

Talaga a nagustuan ti adu a dimmar-ay ti pannakisaritada kadagiti agtutubo a Saksi. Ni Suzanne a taga-Fiji dinamagna iti maysa kadagiti Saksi a ni Belinda, nga agtawen iti 19 no apay nga ipalpalubos ti Dios ti panagsagaba. Insingasing ni Belinda a pagsaritaanda ti sungbat a mabasa iti libro nga Isursuro ti Biblia. Kalpasanna, kinuna ni Suzanne: “Kadawyanna nga ibaga kaniak dagiti tattao a ditay maawatan ti panagtignay ti Dios. Ita, naammuakon ti makagapu!” Idi inted ni Belinda dayta a libro, kinuna ni Suzanne: “Ikagkagumaak itay a tandaanan ti amin nga ibagbagam. Diak ngamin impagarup nga itedmo kaniak daytoy a libro!”

Adda Filipina a nagkiddaw ken Marina, a maysa a Saksi nga agedad iti 27, a retratuenna isuna iti sango ti maysa a nalatak a pasdek iti Sydney. Nagresulta dayta iti nainggayyeman a saritaan. Isu ket inikkan ni Marina iti libro nga Isursuro ti Biblia. Kinuna dayta a Filipina: “Inkararagko idi rabii a sapay koma ta ad-adda a maawatak ti Biblia. Mabalin a daytoy a libro ti sungbat iti kararagko!”

Ni Levi a maysa a Saksi ken agtawen iti 27 kinasaritana ti dimmar-ay nga agina a taga-Panama. Di nagbayag, nagturongen ti saritaanda kadagiti bambanag maipapan iti Dios ket nagsayaat ti tungtonganda maipapan kadagiti pannursuro ti Biblia. Inikkan ida ni Levi iti libro nga Isursuro ti Biblia sana dinamag: “Ania ti kararagsakan a paset ti biaheyo?” Bayat a petpetpetanna ti libro nga Isursuro ti Biblia, simmungbat ti anak, “Ti pannakaam-ammomi kenka.”

Wen, adu nga agtutubo a Katoliko ti magagaran a mangammo iti ad-adu pay maipapan iti Biblia. Sika met ngay? Kayatmo kadi nga ad-adda a maawatam ti Biblia? Kiddawem ngarud kadagiti Saksi ni Jehova nga iyadalandaka iti Biblia. Maragsakanda a tumulong kenka ken awan ti aniaman a bayadam!

[Footnotes]

[Blurb iti panid 27]

“Mapaspasaranmi ti nakaro a parikut kadagiti miembromi a saanen a mangan-annurot iti Kinakatolikoda ken kumapkapuyen ti pammatida.”—Ti Romano Katoliko a ni George Cardinal Pell

[Kahon/Dagiti Ladawan iti panid 25]

PANNAKAITAMPOK DAGITI BOKASION TI SIMBAAN

Ti World Youth Day 2008 ti kadakkelan pay laeng a napasamak idiay Australia a pannakaitampok ti nagadu a narelihiosuan a bokasion. Ti nasurok a 100 nga orden ken ahensia dagiti Katoliko pinaregtada ti nasurok a 50,000 a peregrino nga agpadi, agmadre, wenno agserbi para iti simbaan.

Getty Images

[Ladawan iti panid 24, 25]

Nagparada kadagiti kalsada dagiti namaris ti kawesda a dimmar-ay

[Dagiti Ladawan iti panid 26]

Dagiti Saksi ni Jehova kinasabaanda dagiti dimmar-ay a nagpasiar iti siudad ti Sydney

[Picture Credit Line iti panid 24]

Getty Images