Ti Kalintegan ti Pasiente nga Agpili

BABAEN ITI MANNURAT TI AGRIINGKAYO! IDIAY ITALIA

◼ Dagiti Saksi ni Jehova saanda nga agpayalison iti dara. Dayta a panagkedkedda ket naibatay kadagiti bilin ti Biblia a kastoy ti sagudayen ti kaunaan kadagita: “Ti laeng lasag agraman ti kararuana—ti darana—dikay kanen.” Kastoy met ti naibilin kadagiti Kristiano idi umuna a siglo: “Itultuloyyo ti umadayo . . . iti dara.”—Genesis 9:4; Aramid 15:29; Levitico 17:14.

Idiay Monterenzio, Italia, nakiddaw kadagiti estudiante iti haiskul nga agsuratda iti salaysay maipapan iti kinapateg ti panagdonar iti dara. Ti maysa kadakuada ket ni Benedetta, a maysa kadagiti Saksi ni Jehova. Kastoy ti linaon ti salaysay a pinutarna:

“Pagaammo ti kaaduan a dagiti Saksi ni Jehova ket saanda nga agpayalison iti dara gapu iti panangsurotda kadagiti prinsipio ti Biblia. Ngem di kayat a sawen dayta a didan akseptaren ti dadduma pay a pamay-an ti panangagas. Kinapudnona, napateg kadakuada ti salun-atda. Ikagkagumaanda ti agbirok iti magun-odan a kasayaatan a pannakaagasda ken dagiti annakda. Kayatda ti makitinnulong kadagiti dodoktor, no la ket ta maraem dagiti patpatienda.”

Innayon pay ni Benedetta: “Adda kalintegan ti tunggal pasiente nga agpili iti pamay-an ti panangagas a patienna a kasayaatan para kenkuana. Adda met kalinteganna a maraem, ken mangammo kadagiti peggad ken pagsayaatan ti mapilina a pamay-an ti panangagas.”

Ti sanga nga opisina ti AVIS (Association of Italian Blood Donors) idiay Monterenzio ket nangipaay iti premio kadagiti estudiante a nakaputar iti kasayaatan a salaysay kas ebkas ti personal a panangmatmatda maipapan iti dayta a topiko. Kastoy ti impadamag ti magasin a Monterenzio Vivace: “Ni Benedetta Barbi ket naipaayan iti espesial a pammadayaw gapu iti pinutarna a salaysay a naiduma unay iti opinion ti kaaduan—dagiti insuratna ket naiduma iti prinsipio ti AVIS—ngem nailawlawagna ti pammatina iti nadayaw ken makaay-ayo a pamay-an.”

Nupay ti panangmatmat dagiti Saksi ni Jehova maipapan iti dara ket “naiduma unay iti opinion ti kaaduan,” maamiris itan ti adu a doktor ti kinapateg ti takderda. Dayta a takder dagiti Saksi ti maysa kadagiti kangrunaan a nakatulong iti pannakapartuat ti adu a kabbaro a pamay-an ti panangagas a saan unayen a mamagsayasay iti dara bayat ti operasion. Agpadpada a nagimbagan dayta dagiti pasiente a Saksi ken saan a Saksi. Nupay kasta, kas nadakamat iti umuna a parapo daytoy nga artikulo, ti natibker a panagtulnogda iti Biblia ti kangrunaan a rason a dagiti Saksi ni Jehova ket saan nga agpayalison iti dara.

Inton adda manen dagiti Saksi ni Jehova nga umay iti pagtaengam, apay a dimo damagen kadakuada ti panangmatmat ti Namarsua maipapan iti dara? Maragsakandanto a mangilawlawag kenka buyogen ti “nauneg a panagraem.”—1 Pedro 3:15.

[Kahon/Ladawan iti panid 30]

KANAYONAN NGA IMPORMASION

Babaen iti tulong ti adu a mabigbigbig nga eksperto, ti DVD a Transfusion Alternatives ilawlawagna dagiti prinsipio iti tay-ak ti medisina, linteg, ken etika maipapan kadagiti pamay-an ti panangagas a di agkasapulan iti panangyalison iti dara. Magun-odan dayta kadagiti Saksi ni Jehova.