Nadisenio Kadi?
Boxfish—Nainut iti Enerhia
Tapno makaaramid iti lugan a nalaglagda, nain-inut nga agkonsumo iti enerhia, ken saan a makadangran iti aglawlaw, nagbirok dagiti diseniador iti mabalinda a pagtuladan iti lugar a dimo namnamaen—iti uneg ti baybay! Ti boxfish, a masarakan iti asideg ti kadilian kadagiti baybay iti tropiko, ket agserbi a nagsayaat a pagtuladan dagiti lugan a nalag-an ken naannayas ti tarayna.
Usigem: Napaspas nga aglangoy ti boxfish. Iti kada segundo, kabaelanna a langoyen ti distansia a katupag ti innem a daras a kaatiddog ti bagina. Ngem ti kinapaspasna ket saan a maigapu iti pigsana. Imbes ketdi, ti kasla kahon a sukogna ti mangpaannayas iti napaspas a panaglangoyna. Kinapudnona, dagiti inheniero nagaramidda iti lugan a kasuksukog ti boxfish ken sinubokda dayta iti maysa nga usok. Natakuatanda nga adayo a naan-annayas ti panagtaray dayta ngem kadagiti babassit a lugan.
Ti boxfish ket addaan iti naingpis a kudil a pakaigapuan ti kinalag-anna ken gubuayan ti pigsana. Naannayas latta ti panaglangoy daytoy nga ikan uray nadawel ti baybay gapu kadagiti babassit nga alikuno iti aglikmutna. Gapuna, nalaka nga agmaniobra ken masaluadan manipud iti pannakadangran.
Patien dagiti inheniero a dagiti boxfish ket nasayaat a pagtuladan iti nataltalged ken nain-inut nga agkonsumo iti gasolina ngem kaskasdi a nalag-an a lugan. Kuna ti maysa nga eksperto a ni Dr. Thomas Weber: “Talaga a dimi ninamnama a daytoy kasla nakapuy ti itsurana nga ikan ti nagbalin a pagtuladanmi para iti lugan a naan-annayas ken nain-inut nga agkonsumo iti gasolina.”
Ania ti makunam? Naiparna laeng kadi a timmaud ti nainut nga agkonsumo iti enerhia a boxfish? Wenno nadisenio dayta?
[Picture Credit Lines iti panid 10]
Boxfish: © Hal Beral/V&W/SeaPics.com; lugan: Mercedes-Benz USA