Manipud Kadagiti Agbasbasa

Agimtuod Dagiti Agtutubo . . . Kasanon no Nagpakamatay ti Kabsatko? (Hunio 2008) Sakbay a natay ni manangko, lima a tawen a nagsagaba iti depresion. Gapu ta nakitak ti panagsagabana, napanunotko, ‘Nakakaasi met ti biagna!’ Ngem insingasing ti artikulo iti Agriingkayo! a lagipentayo dagiti nasayaat a naglabas. Idi inaramidko dayta, nakitak a saan met gayam a “nakaay-ay-ay ti biagna” yantangay ad-adu dagiti panawen nga isu ket naragsak.

S. Y., Japan

Agimtuod Dagiti Agtutubo . . . Apay a Didak Talken Dagiti Dadakkelko? (Abril 2008) Babaen ti panangbasa ken panangyaplikar kadagiti prinsipio ti Biblia a masarakan iti Agriingkayo! naammuak a saan nga automatiko no di ket in-inut ti panagmataengan ken ti panangpatanor iti panagtalek. Tapno matagiragsakko ti dakdakkel a wayawaya, nasken a paneknekak kadagiti nagannakko a mapagtalkanak. Masapul nga ileppasko dagiti trabahok iti balay ken dagiti asaynmentko. Pagyamanan kadagiti artikulo a kas iti daytoy.

T. L., Estados Unidos

Panangibtur iti Albinism (Hulio 2008) Kas maysa nga addaan iti kastoy a sakit, maragsakanak idi damo a nakitak daytoy nga artikulo. Ngem naladingitanak a nakakita iti sao nga “albino” a naulit-ulit a nausar iti artikulo. Makapainsulto daytoy a sao yantangay maus-usar dayta a manglais kadagiti tattao nga addan iti kasta a sakit.

A. L., Estados Unidos

Sungbat ti “Agriingkayo!”: Dispensarenmi no nasairmi ti rikna dagiti agbasbasa. Inusarmi ti sao nga “albino” maitunos iti pannakausarna iti tay-ak ti medisina. Ngem dimi mailibak a maus-usar dayta no dadduma a panglais. Iti sabali a bangir, adu nga addaan iti albinism ti mangakseptar iti dayta a sao ket saanda a masair. Saanmi a pulos a panggep a laisen ti asinoman.

Pagyaman ti panangipablaakyo iti daytoy nga artikulo. Maysaak met nga albino a kas ken John. Maapresiar unay nga adda dagiti artikulo maipapan iti albinism nga umiso, pudno, napasnek, makaisuro, ken makaiwardas iti impormasion. Kas resultana, ad-addan a maawatan dagiti gagayyemko ti kasasaadko.

T. M., Estados Unidos

Ayat a Nabilbileg Ngem Bagyo! (Agosto 2008) Dagiti artikulo a kas iti daytoy ipalagipna a diak pakadanagan ti masanguanan no di ket masapul nga agtalekak a naan-anay iti Dios. Tallo a tawen ti napalabas, nakitak ti panangipateg dagiti kakabsat idi dinadael ti layus ti pagtaengan dagiti di manamati a nagannakko. Dagus a tinulongan ida dagiti lumugar a Saksi ni Jehova. Agyamanak ken Jehova ta pasetak ti organisasionna.

D. W., Poland

Ti Nakaskasdaaw a Mais (Agosto 2008) Adda mulami a mais iti kanatenganmi ngem nagduduma ti binukelda. Ita, ammomin ti rason gapu iti daytoy nga artikulo. Lima wenno innem laeng a bukel ti immulami isu a saanda a nakaala iti polen a kas koma no naimulada iti kamaisan. Idi napan a tawen, nagapitkami kadagiti nasam-it ken naimas a mais nga agpapada dagiti binukelda gapu ta siaannad a na-pollinate ti tunggal buok ti mais. Pagyamanan unay.

R. W., Japan