Manipud Kadagiti Agbasbasa

Agimtuod Dagiti Agtutubo . . . Apay a Dakes ti Panagsao iti Dakes? (Marso 2008) Napadakkelak iti Kristiano a pamilia, ngem nakairuamak ti agsao iti dakes. Namin-adu nga inkagumaak nga isardeng dayta ngem diak latta naisardeng. Nupay kasta, natulongannak daytoy nga artikulo tapno makontrolko ti bagik. Kas nadakamat iti artikulo, diak kayat nga abusuen ti sagut a panagsao. Ita, agpanunotakon a naimbag sakbay nga agsaoak. Agyamanak unay.

C. P., Brazil

Agtawenak iti 12. Gistay amin a kaeskuelaak ket agsasao iti dakes, ken maamakak amangan no addanto aldaw a makapagsaoak met iti kasta. Idi agsuratak koman kadakayo tapno kiddawek a mangiruarkayo iti artikulo maipapan iti dayta a banag iti “Agimtuod Dagiti Agtutubo,” dimteng ti Agriingkayo! nga addaan iti eksakto a kayatko a mairuar koma nga artikulo. Impalagip dayta kaniak no apay a dakes ti panagsao iti dakes, ken pinaregtanak a di agsao iti kasta. Itultuloyyo ti agsurat kadagiti artikulo a kas iti dayta!

A. P., Estados Unidos

Ti panggedanmi ken lakayko ket agdalus kadagiti balay. Kinuna ti maysa kadagiti klientemi a ti resolusionna iti baro a tawen ket isardengnan ti panagsao iti dakes. Imbagana nga inaldaw nga agkararag tapno agpatulong iti Dios a mangisardeng iti nakairuamanna a panagsao iti dakes. Kiniddawna met nga ikkak iti aniaman a literatura a mangisalaysay iti dayta a suheto. Inkararagko ti maipapan iti dayta, ken kas gagangay, in-download-ko iti MP3 player-ko dagiti kabaruan a magasin manipud iti www. jw.org a Web site. Kabigatanna, maragsakanak unay idi nangngegko dagiti linaonna a paulo. Magagaranak unay! Nupay ti artikulo ket naisurat para kadagiti agtutubo, ammok nga adda latta nagsayaat a balakad a magun-odan ti klientemi manipud iti dayta. Magagaranakon a mangiranud iti dayta kenkuana.

S. C., Estados Unidos

Ti Mangkonkontrol iti Trapiko iti Tangatang—Ania ti Ar-aramidenna Tapno Kanayon a Natalgedka? (Abril 2008) Kalpasan a nabasak dayta nga artikulo, nakunak a “natalged ken nakasaganaakon nga agbiahe!” Naparegtaak ken panagriknak ket nataltalgedakon ta impakaammo kaniak ti Agriingkayo! a dagiti mangkonkontroI iti trapiko iti tangatang ket talaga a maseknanda iti kinatalgedtayo. Agyamanak kadakayo.

T. S., Brazil

Ania ti Sungbatmo? Agtawenak iti 12 ken agnanaedak iti makin-abagatan nga Ireland. Kayatko ti agyaman kadakayo kadagiti espesial a pannubok para kadagiti ubbing a nailanad iti makinlikud a panid ti Agriingkayo! Nagsayaat dagita a pannubok. Tumulong dagita kadagiti ubbing tapno basaenda dagiti linaon ti magasin. Pangaasiyo ta itultuloyyo ti mangipaay kadagiti kasta a pannubok. Agyamanak manen.

A. C., Ireland