Maikapat a Sekreto: Panagrinnaem

“Maikkat koma kadakayo ti isuamin a . . . panagririaw ken nabassawang a panagsasao agraman ti isuamin a kinadakes.”—Efeso 4:31.

No ania ti kaipapananna. Dagiti nariribuk ken naballigi a pamilia ket agpadpada nga addaan kadagiti di pagkikinnaawatan. Ngem dagiti naballigi a pamilia pagsasaritaanda dagita a dida agusar kadagiti makapabain, makapainsulto, ken dadduma pay a makapasakit a sasao. Dagiti miembro ti pamilia tratuenda ti tunggal maysa kas iti kayatda a panangtrato kadakuada ti sabali.—Mateo 7:12.

No apay a napateg. Kas kadagiti igam, dagiti maisawangtayo ket mabalin a makapasakit iti sabsabali. Kuna ti maysa a proverbio ti Biblia: “Naim-imbag ti agbiag a maymaysa iti let-ang ngem ti makikabbalay iti naunget ken managreklamo nga asawa.” (Proverbio 21:19, Ti Baro a Naimbag a Damag Biblia) No maipapan iti panangpadakkel kadagiti annak, kuna ti Biblia: “Dikay rurruroden ti annakyo, tapno saan a maupay ti riknada.” (Colosas 3:21) Mabalin a panunoten dagiti annak a kanayon a madillaw nga imposible a maparagsakda dagiti nagannakda. Mabalin pay ketdi a didan agregget a mangaramid iti dayta.

Padasem daytoy. Usigem no kasano ti kauneg ti panagraem iti uneg ti pamiliam babaen iti panangsungbatmo kadagiti sumaganad a saludsod.

◼ Iti pamiliak, masansan kadi a dagiti dimi pagkikinnaawatan ket agresulta iti ipapanaw ti maysa gapu iti pungtotna?

◼ No kasaritak ti asawak wenno dagiti annakko, makapabain kadi dagiti ibagbagak kas iti “ngelngel,” “kuneng,” wenno sabali pay nga umasping kadagita?

◼ Dimmakkelak kadi iti pamilia a nairuam nga agusar iti naalas wenno makapasakit a sasao?

Mangngeddengka. Mangpanunotka iti maysa wenno dua a kalat a mabalinmo nga aramiden tapno maipakitam ti panagraem iti panagsasaom. (Singasing: Ikagumaam ti agusar kadagiti termino a tumukoy iti bagim imbes nga iti kasarsaritam. Kas pagarigan, “Masaksaktanak no . . . ,” imbes a “Kanayonka nga . . . ”)

Apay a dimo ibaga iti asawam ti/dagiti kalatmo? Kalpasan ti tallo a bulan, damagem iti asawam ti napaliiwna a nagrang-ayam.

Mangpanunotka kadagiti pamay-an a maliklikam ti agsao iti makapasakit no makisarsaritaka kadagiti annakmo.

Apay a dika agpadispensar kadagiti annakmo no nalabit binugtak wenno ininsultom ida?

[Ladawan iti panid 6]

No kasano a dagiti dalluyon makurukoranda ti nagdakkel a bato, ti kanayon a panangisawang iti makapasakit a sasao mapakapuyna ti relasion ti pamilia