No Kasano a Maliklikan ti Makapasakit a Sasao

TI PROBLEMA

Kada agririkayo nga agassawa, agpinnaadukayo iti pammabalaw iti maysa ken maysa. Gagangayen kadakayo dagiti makapasakit a sasao nga uray la “normal” daytan no agtungtongkayo.

No kasta ti mapaspasamak kadakayo, kabaelanyo nga isardeng dayta. Ngem umuna, masapul nga ammuenyo dagiti makagapu ken no apay a pagimbaganyo no agbalbaliwkayo.

DAGITI MAKAGAPU

Dimmakkelan a pamilia. Adu nga assawa a lallaki ken babbai ti napadakkel kadagiti pamilia nga ugalidan ti agsao iti makapasakit. Mabalin a maysa kadakuada wenno agpadada a mangtultulad iti wagas ti panagsasao a nangngegda kadagiti dadakkelda.

Impluensia ti paglinglingayan. Kadagiti komedia iti pelikula ken telebision, nagbalinen a pagkakatawaan ti naalas a panagsasao. Tangay naruamen dagiti agbuybuya, mabalin nga ibilangda payen a nakakatkatawa dagita.

Kultura. Iti dadduma a kagimongan, naturay kano dagiti “pudpudno a lallaki” wenno kasapulan kano nga agbalin a nauyong dagiti babbai tapno dida agparang a kapuy. Kabayatan ti riri, ti agassawa a kasta ti kababalinda mabalin nga ibilangda ti asawada kas kabusor imbes a gayyem, isu a makapasakit ti panagsasaoda imbes a makapabileg.

Aniaman ti makagapu, ti makapasakit a sasao ket mabalin nga agresulta iti panagsina wenno diborsio agraman iti adu a sakit. Kuna pay ketdi ti dadduma a nasaksakit ti sasao ngem iti danog. Kas pagarigan, kuna ti maysa a misis nga agpada a pagsasawan ken dangdangran idi ni misterna: “Narigrigat nga ibturan dagiti pannakainsulto ngem iti pannakakabil. Nasaysayaat koma laengen a danogennak imbes a pagsasawannak.”

Ania ti mabalinmo nga aramiden no nabaybay-anyo nga agassawa a ti makapasakit a sasao ti nangdadael iti relasionyo?

TI MABALINMO NGA ARAMIDEN

Mangipakitaka iti empatia. Ikabilmo ti bagim iti sasaaden ti asawam, ket ikagumaam a tarusan no ania ti mariknana iti panagsasaom. No posible, mangpanunotka iti espesipiko a situasion a nasaktan ti asawam gapu iti naibagam. Dimo pakaseknan ti aktual nga imbagam; ti kangrunaan a panunotem ket no ania ti narikna ti asawam iti naibagam. Adda kadi mapanunotmo a pamay-an a nasaysayaat koma ti panagsasaom imbes a makapasakit? Kuna ti Biblia: “Ti maysa a sungbat, no naalumamay, pagbaw-ingenna ti pungtot, ngem ti sao a makapasakit parnuayenna ti unget.”—Proverbio 15:1.

Paliiwem dagiti agrinrinnaem nga agassawa. No naaringanka iti panagsasao dagiti di nasayaat a pagwadan, kumitaka kadagiti mapagulidanan. Denggem dagiti pagassawaan a nasayaat a tuladen ti panagsasaoda.—Prinsipio ti Biblia: Filipos 3:17.

Pasubliem ti dati a riknayo iti maysa ken maysa. Ti makapasakit a panagsasao ket masansan nga ad-adda a problema ti puso ngem ti ngiwat. Ikagumaam ngarud a panunoten dagiti agkakaimbag ken makaay-ayo a galad ti asawam. Lagipem dagiti aktibidad nga agpada a magusgustuanyo idi. Buyaem dagiti daan a retratoyo. Ania idi ti namagkatawa kenka? Ania dagiti galad a namagsinged kadakayo?—Prinsipio ti Biblia: Lucas 6:45.

Agusarka iti sasao a mangtukoy iti bagim. Imbes a pagsasawam ti asawam, iyebkasmo dagiti pakaseknam babaen iti sasao a mangdeskribir iti nariknam. Kas pagarigan, posible a nasaysayaat ti reaksionna no ibagam, “Mariknak a dinak ikabkabilangan no agplanoka a dinak konkonsultaen” imbes a “Kastaka ngamin—kanayonka nga agplano a dinak konkonsultaen!”—Prinsipio ti Biblia: Colosas 4:6.

Ammuem no kaanoka a sumardeng. No mangrugin a bumara ti saritaanyo, nasaysayaat no itantanyo pay laeng ti agtungtong. Kadawyanna nga awan pagdaksan ti pumanaw no agririkayo, agingga a kalmadokayon a dua.—Prinsipio ti Biblia: Proverbio 17:14.