Maikalima a Sekreto: Kinanainkalintegan

“Ti kinanainkalinteganyo maammuan koma dagiti amin.”—Filipos 4:5

No ania ti kaipapananna. Kadagiti naballigi a pamilia, kanayon nga agpimpinnakawan ti agassawa. (Roma 3:23) Saanda met nga istrikto unay wenno napanuynoy unay kadagiti annakda. Kalkalainganna ti kaadu dagiti ipaannurotda iti pagtaenganda. No kasapulan a mailinteg ti maysa a banag, aramidenda dayta “iti maiparbeng a rukod.”—Jeremias 30:11.

No apay a napateg. Kuna ti Biblia a “ti sirib manipud ngato . . . nainkalintegan.” (Santiago 3:17) Ti Dios a mismo dina ekspektaren ti kinaperpekto kadagiti imperpekto a tattao, isu nga apay koma nga ekspektaren ti agassawa a perpekto ti tunggal maysa kadakuada? Talaga a saan a makapasayaat ti kanayon a panangkritikar kadagiti babassit a kamali no di ket mangpataud laeng iti panagsakit ti nakem. Nasayaat no akseptarentayo ti kinapudno a “maitibkoltayo amin iti adu a daras.”—Santiago 3:2.

Dagiti naballigi a nagannak ipakpakitada ti kinanainkalintegan iti pannakilangenda kadagiti annakda. Saan a nalabes ti panangdisiplinada wenno saanda a “narigat nga ay-aywen.” (1 Pedro 2:18) Ipapaayanda iti wayawaya dagiti agtutubo nga annakda a mangipakpakita iti kinaresponsable. Saanda nga ikagumaan a kontrolen ti tunggal garaw ti agtutubo nga anakda. Kuna ti maysa a reperensia a ti panangikagumaan a mangkontrol iti tunggal aspeto ti biag ti agtutubo “ket katupag ti makabannog a seremonial a panagsala tapno agtudo (rain dance). Napaksuyankanton ngem saan latta nga agtudo.”

Padasem daytoy. Usigem ti kinanainkalintegam babaen iti panangsungbatmo kadagiti sumaganad a saludsod.

◼ Kaano ti naudi a panangpadayawmo iti asawam?

◼ Kaano ti naudi a panangkritikarmo iti asawam?

Mangngeddengka. No narigatanka a nangsungbat iti umuna a saludsod nga adda iti kannigid ngem nalakam la a sinungbatan ti maikadua, mangpanunotka iti kalat a mabalinmo nga aramiden tapno agbalinka nga ad-adda pay a nainkalintegan.

Apay a diyo pagsaritaan nga agassawa no ania dagiti kalat a mabalinyo nga aramiden a dua?

Mangpanunotka iti aspeto a mabalin a pangipaayam iti dakdakkel a wayawaya iti agtutubo nga anakmo bayat nga ipakpakitana ti kinaresponsablena.

Apay a dimo kasarita a naimbag ti agtutubo nga anakmo maipapan iti bambanag kas iti rumbeng nga oras ti panagawidna?

[Ladawan iti panid 7]

Kas iti naannad a drayber, nakasagana nga agpabus-oy ti maysa a nainkalintegan a miembro ti pamilia