Panangmatmat iti Lubong
◼ Idi napagsaludsodan ti agarup 2,000 a tattao idiay Germany, kinuna ti dandani 40% kadagiti agtutubo nga agtawen iti 14 agingga iti 19 nga awan dakesna no babaen iti text wenno e-mail a makisinada iti karelasionda. Ngem kadagiti agtawen iti 50 nga agpangato, nasurok a 80% kadakuada ti nagkuna a di pulos maiparbeng ti kasta.—FRANKFURTER NEUE PRESSE, GERMANY.
◼ Iti intero a lubong, mapattapatta a 2.3 a trilion a text ti naipatulod idi 2008.—HITU NEWS, TAHITI.
◼ “Mano a tawen ti umababaan ti biag ti mannigarilio? Agpromedio iti 5 agingga iti 10 a tawen.”—UC BERKELEY WELLNESS LETTER, U.S.A.
◼ Idiay Estados Unidos, mapattapatta nga aginggat’ 60% kadagiti personal a kompiuter a maus-usar kadagiti opisina ti mabaybay-an a nakalukat iti agpatnag. Kas resultana, agarup 14.4 a milion a tonelada ti carbon dioxide kada tawen ti awan mamaayna nga inruar dagiti planta ti koriente.—WORLD WATCH, U.S.A.
Dagiti Bus a Mangiparparegta iti Ateismo
“Nalabit awan ti Dios. Dikayon madanagan. Tagiragsakenyo ketdi ti biag.” Daytoy nga islogan ket mabasa iti 200 a bus iti London, England; iti 600 pay a bus iti intero a pagilian; ken iti dua a dadakkel a pagbuyaan nga iskrin iti Oxford Street idiay London, sigun iti periodiko a The Guardian. Kuna dagiti promotor a ti kampaniada ket pangsungbat iti narelihiosuan nga adbertismen a mangibagbaga nga iti umap-apuy nga impierno ti pagtungpalan dagiti di manamati. Nausar ti sao a “nalabit” tapno saanda a malabsing ti paglintegan ti Advertising Standards Authority iti Britania, yantangay imposible a paneknekan nga awan ti Dios. Ti maysa a panggep ti kampania ket ti panangparegta iti ad-adu nga ateista nga ilatakdan iti publiko ti takderda.
Dagiti Risgo ti Panangyeskediul iti Nasapa a Panaganak
Gapu kadagiti personal a pagnam-ayan, umad-adu idiay Estados Unidos ti nasapa a mayanak babaen iti napilit a panagpasikal wenno panagpa-cesarean. Nupay kasta, “dagiti maudi a lawas ti panagsikog ket napatpateg ngem iti dati a pagarup,” kuna ti The Wall Street Journal. Idi naadal ti kasasaad ti agarup 15,000 a kappasngay, naammuan nga iti tunggal lawas a kaadda ti sikog iti aanakan iti maika-32 aginggat’ maika-39 a lawas, bumaba iti 23% ti panagkissiw, jaundice, parikut iti panaganges, ken panagdara ti utek. Dagidiay naipasngay iti maika-32 aginggat’ maika-36 a lawas, dakdakkel ti risgona nga addaandanto iti parikut iti kababalin ken panagpampanunot. Irekomenda ngarud ti American College of Obstetricians and Gynecologists a saan a rumbeng a maipasngay ti sikog “no awan pay 39 a lawasna malaksid no adda medikal a rason a maaramid ti kasta,” kuna ti Journal.
Makapasalun-at ti Panagagdan
“Ti kanayon a panagagdan ket simple ken praktikal a pamay-an iti panangpasayaat iti salun-at,” kuna ti The Lancet a magasin maipapan iti medisina idiay Britania. Dagiti managsirarak imbagada iti 69 nga empleado a masansan a nakatugaw iti pagtrabahuanda nga agagdanda imbes nga agelebeytorda. Kalpasan ti 12 a lawas, simmayaat ti panagandar ti bara ken pusoda iti 8.6%. Gapuna, “bimmaba iti 15% ti posibilidad a matayda iti aniaman a makagapu.” Nakita met dagiti empleado a dakkel ti bimmabaan ti “presion ti dara, kolesterol, ken timbangda, sa naksayan ti taba ti bagida ken bimmassit ti siketda.”