Agimtuod Dagiti Agtutubo

Kasanoak a Makisarita iti Nagannakko?

“Talaga nga inkagumaak nga ibaga iti nagannakko ti marikriknak, ngem ti panangisaok ket saan a kas iti kayatko koma—ken didak man la pinalpas a nagsao. Kakaasiak a nangiturtured a mangibaga iti marikriknak ngem napaayak laeng!”—Rosa.a

IDI ubingka pay, nalabit ti nagannakmo ti kaunaan a pagpabalakadam. Ipadamagmo kadakuada ti aniaman. Dika agkedked a mangyebkas kadagiti pampanunotem ken marikriknam, ken agtalekka iti balakadda.

Ngem ita, panagriknam ket didakan maawatan. “Naminsan bayat a mangrabrabiikami, nagsangitak ken impeksak ti marikriknak,” kuna ti balasitang a ni Edie. “Nagimdeng ti nagannakko ngem kasla didak naawatan.” Ania ti resultana? “Napanak lattan iti kuartok sa intuloyko ti nagsangit!”

Iti sabali a bangir, nalabit kaykayatmo no dadduma ti agulimek lattan. “Nagadu ti iyes-estoriak iti nagannakko,” kuna ti barito a ni Christopher. “Ngem no dadduma, diak kayat a maammuanda ti amin a pampanunotek.”

Dakes kadi no bukbukodam lattan ti dadduma a pampanunotem? Saan met—no la ket ta dika mangal-allilaw. (Proverbio 3:32) Ngem nupay kasla didaka maawatan dagiti nagannakmo wenno adda saanmo nga ibagbaga kadakuada, daytoy ti sigurado: Masapul a makisaritaka iti nagannakmo—ken masapul met a denggendaka.

Agsaoka Latta!

Iti dadduma a pamay-an, ti pannakikomunikar iti nagannakmo ket kas iti panagmaneho. No adda bangen iti kalsada, dika sumuko; agsapulka iti sabali a ruta. Usigem ti sumagmamano a pagarigan.

Umuna a Bangen: Kayatmo ti makisarita iti nagannakmo ngem kasla didaka ikaskaso. “Marigatanak a makisarita ken tatangko,” kinuna ti balasitang a ni Leah. “No dadduma, makisarsaritaak kenkuana ngem intono kuan, kunana, ‘Siak kadi ti kasarsaritam?’”

SALUDSOD: Kasanon no adda problema ni Leah a masapul unay nga iyumanna? Adda tallo a pagpilianna.

A B C

Panangkunam, ania ti rumbeng a pilien ni Leah? ․․․․․

Usigentay ti tunggal pagpilian tapno maammuantayo ti mabalin a resulta dayta. Adda sabali a pampanunoten ti tatang ni Leah isu a dina ammo a masursuronen kenkuana ti anakna. No ngarud pilien ni Leah ti A, mabalin a di maawatan ni tatangna no apay nga isu ket bugbugkawan ni Leah. No kasta ti aramidenna, nalabit ad-adda a di maawatan ni tatangna ti ibagbagana, ken dina maipakita a raraemenna ti nagannakna. (Efeso 6:2) Nalawag ngarud a saan a nasayaat ti pagbanagan ti kasta a situasion.

Nupay ti B ti nalabit kalakaan nga aramiden, saan a dayta ti kasayaatan. Apay? Agsipud ta “adda pannakapaay dagiti gakat no sadino nga awan ti kompidensial a saritaan, ngem iti kinaadu dagiti manangbalakad adda maitungpal.” (Proverbio 15:22) Tapno sibaballigi a masolbar ni Leah dagiti problemana, masapul a makisarita iti nagannakna—ket tapno makatulongda, masapul nga ammoda ti mapaspasamak iti biagna. Awan ti maaramidan ti basta panagulimek.

Ngem iti C, saan a sumuko ni Leah no adda bangen iti kalsada. Imbes ketdi, ikagumaanna ti makisarita maipapan iti dayta iti sabali a gundaway. Ket no agsurat ni Leah ken tatangna, nalabit dagus a mabang-aran. Makatulong met ti panagsuratna tapno mabukelna ti eksakto a kayatna nga ibaga inton dumdumngegen ni tatangna. Inton basaen ni tatangna ti surat, maammuannanto ti kayat nga ibaga ni Leah kenkuana. Daytan ti makatulong tapno ad-adda a maawatanna ti kasasaad ti balasangna. Ti ngarud maikatlo a pagpilian ket agpadpada a pakagunggonaan da Leah ken ni tatangna.

Ania pay ti mabalin a pagpilian ni Leah? Isuratmo iti baba ti mapanunotmo. Kalpasanna, isuratmo ti mabalin a resulta dayta.

․․․․․

Maikadua a Bangen: Kayat ti nagannakmo ti makisarita kenka ngem awan ganasmo a makisarita. “Awanen ti ad-adda a makapasuron ngem iti agsasaruno a saludsod kalpasan ti makabannog nga agmalemmo idiay eskuelaan,” kuna ti agtutubo a ni Sarah. “Diak pay la koma kayat a panunoten ti maipapan iti eskuela, ngem dagus a damagen ti nagannakko: ‘Komusta ti nagmalemmo? Adda kadi aniaman a parikutmo?’” Siempre, nasayaat ti intension ti nagannak ni Sarah iti panagsaludsodda. Kaskasdi nga insennaayna, “Nagrigat ti agestoria maipapan iti panageskuelak no nabambannogak ken diak pay nakainana.”

SALUDSOD: Ania ti mabalin nga aramiden ni Sarah iti daytoy a situasion? Kas iti immuna a pagarigan, adda met tallo a pagpilianna.

A B C

Panagkunam, ania ti rumbeng a pilien ni Sarah? ․․․․․

Usigentay manen ti tunggal pagpilian tapno maammuantayo ti mabalin a resulta dayta.

Sakbay a pilien ni Sarah ti A, isu ket nabannog ken awan ganasna a makisarita. Kalpasan nga inaramidna ti umuna, kaskasdi a mariknana ti bannogna ngem makonsiensia payen ta nabugkawanna ti nagannakna.—Proverbio 29:11.

Kabayatanna, saan a maragsakan ti nagannak ni Sarah gapu iti panagbugkawna—wenno iti panagulimeknan kalpasan dayta. Nalabit ipapanda nga adda ilimlimed ni Sarah. Mabalin nga ad-adda pay ketdin a pilitenda nga agpudno, isu a lallalo a masuron. Saan a nasayaat ti resulta ti kasta a situasion.

Nabatad a nasaysayaat ti B ngem iti A. Ngamin, uray kaskasano, makapagsasarita da Sarah ken ti dadakkelna. Ngem tangay saan a naimpusuan ti panagsasaritada, saan a mapasamak ti tartarigagayan ni Sarah ken ti nagannakna—ti makapabang-ar ken napudno a saritaan.

Ngem iti C, nalaglag-anto ti panagrikna ni Sarah ta dida pay la mapagsasaritaan ti maipapan iti panageskuelana. Apresiaren ti nagannakna ti panangikagumaanna a makisarita kadakuada, isu a naragsakdanto met. Daytoy a pili ti mabalin a mangyeg iti kasayaatan a resulta gapu ta agpapadada a makayaplikar iti prinsipio iti Filipos 2:4 a kastoy ti kunana: “Saan la a ti pagimbaganyo ti kitaenyo. Kitaenyo met ti pagimbagan ti tunggal maysa.”—Ti Baro a Naimbag a Damag Biblia.

Ad-adu pay nga artikulo ti masarakan iti serye nga “Agimtuod Dagiti Agtutubo” iti Web site a www.watchtower.org/ype

[Footnote]

UTOBEM DAGITOY

◼ Ania ti maitulong ti pannakisarita iti umiso a tiempo tapno sumayaat ti komunikasion?—Proverbio 25:11.

◼ Apay a di masayang ti panagreggetmo a makisarita iti nagannakmo?—Job 12:12.

[Kahon/Ladawan iti panid 18]

SABALI A PANANGIPAPAN?

Marigatanka kadi a makisarita iti nagannakmo? Nalabit sabali ti panangipapanda iti ibagbagam.

No ibagam ti . . .

“Diak kayat a pagsasaritaan dayta.”

Ipapan ti nagannakmo a . . .

“Maibagak iti gagayyemko ti amin a kapanunotak ken rikriknak ngem diak kayat nga ibaga kadakayo ta dikay unay napateg kaniak.”

No ibagam ti . . .

“Diyo maaw-awatan.”

Ipapan ti nagannakmo a . . .

“Lakay ken baketkayo unayen, isu a diyon padasen pay a tarusan ti bambanag ta diyonto met la maaw-awatan.”

[Kahon/Dagiti Ladawan iti panid 21]

TI MAKUNA DAGITI KAPATADAM

“Imbagak kadagiti nagannakko ti problemak idiay eskuelaan, ket nasdaawak ta sidadaanda a dimngeg. Gapu iti tulongda, nagalisto a nasolbar ti problemak!”—Natalie.

“Saan a kanayon a nalaka ti makisarita kadagiti nagannakmo, ngem no ibagam ti marikriknam ken makisaritaka kadakuada, lumag-an la ketdi ti riknam.”—Devenye.

[Kahon iti panid 21]

PALAGIP KADAGITI NAGANNAK

Kas maseknan nga ama wenno ina, nalabit pampanunotem no marigatan a makisarita kenka dagiti annakmo. Usigem ti imbaga ti dadduma nga agtutubo iti Agriingkayo! no apay a bumdengda a makisarita iti nagannakda. Kalpasanna, iyimtuodmo iti bagim dagiti naipakuyog a saludsod, ken kitaem dagiti nadakamat a teksto iti Biblia.

“Bumdengak a makisarita ken Tatang gapu ta nagadu ti as-asikasuenna para iti trabaho ken iti kongregasion. Kasla awan a pulos ti wayana a makisarita kaniak.”—Andrew.

‘Diak aya napupuotan nga ipakpakitak nga awan wayak a makisarita kadagiti annakko gapu ta okupadoak unay? No kasta, ania ti aramidek tapno ad-adda a mariknada a nalakaak a maasitgan? Ania a tiempo ti regular a mailatangko a pannakisarita kadagiti annakko?’—Deuteronomio 6:7.

“Nagsangsangitak a nangibaga ken Nanang a nakiapaak idiay eskuelaan. Kayatko koma a liwliwaennak ngem inungtannak ketdin. Sipud idi, diakon ibagbaga kenkuana ti aniaman a napateg a pakaseknak.”—Kenji.

‘Ania ti reaksionko no adda problema nga ibaga kaniak ti annakko? Nupay nasken a bagbagaak ida, makapagteppelak kadi tapno maimdengak ida a naimbag sakbay nga agbalakadak?’ —Santiago 1:19.

“Uray no sangkaibaga ti nagannak a dida agung-unget no agsasaritada kadagiti annakda, makapungtotda met latta, isu a maupay no kuan dagiti agtutubo.”—Rachel.

‘No adda makapaunget nga ibaga kaniak ti anakko, kasano a mamedmedak ti insigida a panagpungtotko?’—Proverbio 10:19.

“Masansan a no ibagak ken Nanang dagiti personal a pakaseknak, iyestoriana a dagus kadagiti gagayyemna. Nabayag a diak nagtalek kenkuana.”—Chantelle.

‘Ikabkabilangak kadi ti rikna ti anakko babaen iti diak panangyes-estoria kadagiti personal a banag nga imbagana kaniak?’—Proverbio 25:9.

“Nagadu ti kayatko koma nga ibaga iti nagannakko. Kasapulak laeng ti tulongda tapno mairugik ti saritaan.”—Courtney.

‘Mabalin kadi a siakon ti mangirugi iti pannakisarita iti agtutubo nga anakko? Kaano ti kasayaatan a panagsaritami?’—Eclesiastes 3:7.

[Ladawan iti panid 19]

Dika sumuko no adda bangen iti komunikasion-maipamuspusam ti makisarita iti nagannakmo!