“Isardengyo ti Maringgoran”
“Naibus ti urnongmi iti banko agraman dagiti indepositomi a naipanagan kadagiti annakmi. Adu a bulan nga awan ti pamastrekanmi.”
● Iti maysa nga ili ditoy India, adda idi narang-ay nga eskuelaan nga imanmaneharko. Adda pay tiempo a dimmanon iti agarup 500 ti bilang dagiti estudiante. Idi kuan, maysa a nalatak nga eskuelaan iti siudad ti nangipalaka iti matrikula ken nangipatulod kadagiti bus iti lugarmi. Siempre, adu kadagiti estudiantek ti immakaren iti dayta nga eskuelaan. Kinapudnona, agarup 60 laeng ti nabati iti dati a dandani 500 nga estudiantek. Ad-adda pay a kimmaro ti kasasaad ta di nagbayag kalpasan dayta, imbabawi ti maysa nga opisial ti eskuelaan ti pinansial a tulaganmi ken siuutang pay la kaniak. Gapu iti adu a susuelduak nga empleado, nagparikutak iti pinansial.
Nagsasaritaanmi a sangapamiliaan ti kasasaadmi. Nagsakripisiokami amin bayat nga inkagumaanmi a suroten ti balakad ni Jesus a pagtalinaedenmi a “simple” ti panagbiagmi. Iti sabali a pannao, saankami nga aggasto iti nalablabes ngem iti badyetmi. (Mateo 6:22, 25) Insardengmi pay laeng nga usaren ti kotsemi gapu iti gastos iti gasolina ken panangmantener iti dayta. Tapno basbassit ti magastomi iti taraon, makitiendakami no rabii unayen ta nalaklaka ti presio kadagita nga oras. Kinissayanmi met dagiti putahemi iti tunggal pannangan.
Dakami ket Saksi ni Jehova. Napateg kadakami ti makitaripnong kadagiti kapammatianmi no tiempo dagiti Nakristianuan a gimong. (Hebreo 10:25) Isu a nupay narigat ti pinansial a kasasaadmi, determinadokami a di aglangan kadagiti gimong ken asamblea, nupay nawatiwat ti daliasatenmi. Adayo dagiti pangasabaan ken pangyadalanmi iti Biblia. Imbes a kotse, motorsiklo laengen ti us-usarenmi. Ngem siempre, dua laeng ti makapaglubbon iti dayta.
Ngem di kaipapanan dayta a bimmassit ti panawenmi a mangasaba. Ad-adu ketdi nga oras ti us-usaren ni baketko ken ti balasangmi a mangisarsarita iti sabsabali maipapan iti Biblia. No dadduma, pagpagnaenda ti 12 agingga iti 16 a kilometro agpapan agawid iti panangyadalda iti Biblia kadagiti interesado a tattao. Ikagkagumaanmi met iti barok ti mangbusbos iti ad-adu nga oras iti panangisuro iti Biblia kadagiti sabsabali.
Medio nasaysayaat itan ti pinansial a kasasaadmi. Ngem gapu iti napasaranmi, nasursuromi a sangapamiliaan a saan a dagiti material a bambanag ti rumbeng nga ipangpangrunami. Nasursuromi pay a dimi rumbeng a pakaringgoran unay dagiti banag a dimi makontrol. Naparegtakami a nangnangruna iti kuna ti Salmo 55:22: “Ipalladawmo ti dadagsenmo ken Jehova a mismo, ket isu saranayennakanto. Saannanto a pulos ipalubos nga agdiwengdiweng daydiay nalinteg.” Siento porsiento a napaneknekanmi ti kinaagpayso dayta bayat ti narikut a kasasaadmi iti pinansial.—Naipatulod.