Ti Panangmatmat ti Biblia

Pannakinobio nga Addaan Panggep a Makiasawa

Agnobio da Julie ken Lee.a Determinadoda nga agtalinaed a nadalus iti moral. Ngem iti maysa a rabii nga awan ti kaduada, rimmasuk ti seksual a riknada. Naimbag laengen ta nakapagpampanunotda sakbay a lumbesda iti maiparbeng ken makaaramidda iti nadagsen a basol.

SAAN laeng a ti linawas nga itatabuno iti narelihiosuan a taripnong ti ramanen ti pudno a panagdaydayaw. Maysa dayta a wagas ti panagbiag a mangimpluensia iti kababalin ken moral a pagalagadan ti maysa. Kinuna ni Jesu-Kristo a ti laeng anamongan ti Dios ket dagidiay ‘mangar-aramid iti pagayatan’ ti Dios. (Mateo 7:21) Tapno maparagsaktayo ti Dios, nasken a taginayonentayo a nadayaw ti pannakirelasiontayo iti ditay kasekso ken makinobio nga addaan panggep a makiasawa.

Kasanoyo a mapagtalinaed a nadalus ti relasionyo iti imatang ti Dios, nangruna ta adu ti makaimpluensia iti agnobio a mangaramid iti di mayanatup? Umuna, laglagipenyo a naaramid dagiti pagalagadan ti Dios agpaay a pagimbagantayo. Maikadua, akseptarenyo ti kinapudno maipapan iti kababalintayo kas tattao. Maikatlo, agtulagkayo a nasaksakbay no kasanoyo a limitaran ti kinalailoyo iti maysa ken maysa. Ken maikapat, iramanyo ti Dios iti relasionyo. Saggaysaentayo nga usigen dagitoy a punto.

Dagiti Pagalagadan a Nairanta a Pakagunggonaantayo

Kuna ti Isaias 48:17, 18: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam. O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.”

Wen, agpaay a pakagunggonaantayo dagiti bilin ken prinsipio a nailanad iti naipaltiing a Sao ti Dios, ti Nasantuan a Biblia. (2 Timoteo 3:16, 17) Dagita ti pammaneknek a talaga a maseknan ti Dios kadatayo ken kayatna nga agragsak ken agballigitayo iti amin nga aspeto ti biag. (Salmo 19:7-10) Kasta met kadi ti panangmatmatyo? No wen, ipakpakitayo ti pudno a kinasirib.

Akseptarem ti Kinapudno Maipapan iti Bagim

Kas iti pudno a gayyem, napudno ni Jehova kadatayo; ibagbagana ti kinapudno maipapan iti bagitayo. Kas pagarigan, pakdaarannatayo ti Saona a “ti puso nagulgulib ngem iti aniaman a banag ket desperado. Siasino ti makaammo iti dayta?” (Jeremias 17:9) Kuna pay ti Biblia: “Daydiay agtalek iti bukodna a puso maag, ngem daydiay magna iti kinasirib isunto ti makalibas.”—Proverbio 28:26.

Kasano nga ipakpakita ti agnobio nga agtaltalekda iti pusoda? Ti maysa ket babaen ti panangitulokda kadagiti kasasaad a posible a pakasulisoganda nga agbalin a nadekket unay iti maysa ken maysa, kas iti nadakamaten nga agnobio. Ti sabali pay ket ti di panangikankano iti nainsiriban a balakad dagiti managbuteng-Dios a nagannak. Ammo dagita a nagannak a dagiti seksual a rikna, nangruna kabayatan ti kinaagtutubo, ket umasping iti napartak a lugan a masapul a makontrol tapno maliklikan ti aksidente.

Gapuna, ti agtutubo a ‘magmagna iti nadiosan a sirib’ ipangpangagna dagiti panangiwanwan ti nagannakna. Wen, ipappapusona ti balakad dagiti nagannakna, a gapu iti panangipategda kenkuana, ibagada uray dagiti dina kayat a mangngeg. Siempre, ti kangrunaan a mangipatpateg kenka ket ti nailangitan nga Amam, ni Jehova a Dios, a mangibalbalakad kenka nga “ikkatem ti panagluksaw manipud pusom, ket iwaksim ti didigra manipud lasagmo.” (Eclesiastes 11:9, 10) Kasano? Babaen ti panangiwaksim kadagiti di umiso a tarigagay.

Pagtulaganyo ti Limitasion ti Kinalailoyo

“Kadagidiay agiinnuman a sangsangkamaysa adda ti sirib.” (Proverbio 13:10) Iti rugi pay laeng ti relasionda, iyaplikaren ti masirib nga agnobio dagita a sasao. Pagtulaganda dagiti anamongan ti Biblia a pamay-an ti panangipakita iti pammategda iti maysa ken maysa. Determinadoda met a di lumbes iti nagtulaganda. Ti nalabes a panaglinnailo wenno panagkompiansa ket kas iti kaskasero a panagmaneho. Naladawen ti panagkarim nga agan-annadka nga agmaneho no naaksidentekan!

Kastoy ti kuna ti Biblia: “Makita ti manakem ti dumteng a riribuk ket liklikanna, ngem sarakusoken ti saan nga agpampanunot a tao ket agbabawi kalpasanna.” (Proverbio 22:3, Ti Baro a Naimbag a Damag Biblia) Maliklikan dagiti agnobio ti adu a riribuk babaen ti panagdeytda a kakuyogda dagiti nasayaat a kakadua wenno manakem a tsaperon. Dagiti dakes nga ibunga ti minamaag nga aramid bayat ti panagdeyt ramanenna ti pannakaburibor ti konsiensia, pannakapukaw ti panagraem iti bagi ken iti kaayan-ayat, ken pannakaibabain dagiti maseknan, agraman dagiti kapamilia. Agmasiribka ngarud; pagtulaganyo a suroten dagiti pagannurotan ti Biblia ken determinadokayo a mangyaplikar kadagita!

Pagbalinenyo ni Jehova a ‘Maikatlo a Tali’

Ti panagasawa ket kas iti tinallo a tali, a ti Dios ti kangrunaan a linabag. “Ti tinallo a tali saan a nadaras a mapugsat a magudua,” kuna ti Eclesiastes 4:12. Agaplikar met dayta a prinsipio kadagiti agnobio. Dagidiay agtarigagay a bendisionan ti Dios ti relasionda magun-odanda dayta no agtalinaed ti tunggal maysa kadakuada a nasinged iti Dios. Kuna ti Salmo 1:1-3: “Naragsak ti tao a saan a nagna iti pammatigmaan dagidiay nadangkes . . . Ngem ti pakaragsakanna adda iti linteg ni Jehova, ket iti lintegna agbasa iti nababa a timek iti aldaw ken rabii . . . , ket ti isuamin nga aramidenna agballiginto.”

Wen, no aramidentayo dagiti bambanag sigun iti kayat ni Jehova, pudno nga agballigi ti biagtayo, a pakairamanan ti panagnobio ken panagasawa. Ngamin, isu ti Namarsua kadatayo ken nangipaay iti panagrayo ken panagasawa kas napateg a sagut. Gapuna, rumbeng laeng a tagipatgentay unay dagita.—Santiago 1:17.

[Footnote]

NAPANUNOTMO KADIN?

● Kasanotay nga ammo a ti kasayaatan ti kayat ti Dios para kadatayo?—Isaias 48:17, 18.

● Ania a kinapudno maipapan iti bagitayo ti masapul nga akseptarentayo?—Jeremias 17:9.

● Ania ti sekreto ti naballigi a panagnobio ken panagasawa inton agangay?—Salmo 1:1-3.

[Ladawan iti panid 13]

Iti rugi pay laeng ti relasionda, pagtulaganen ti masirib nga agnobio dagiti anamongan ti Biblia a pamay-an ti panangipakita iti pammategda iti maysa ken maysa ket determinadoda a di lumbes iti nagtulaganda