Pinilik ti Nasaysayaat a Karera

Kas insalaysay ni Plamen Kostadinov

DANDANIN agmatuon idi makariingak. Agkaiwara iti suelo dagiti awang a botelia, ken agarinuor dagiti nabangsit ken napnapno a pagarsangan. Kasta unay ti ragsakko iti pasken idi rabii. Ngem ita, nakarkaron ti mariknak a pannakaupay ken liday. Kasla awanen a pulos serserbi ti amin! Palubosandak a mangisalaysay no apay a napagteng daytoy kaniak.

Idi agtawenak iti 14, rinugiakon ti karerak kas pintor. Kalgaw idi ti 1980. Kaibagbaga ni tatangko a nakapasaak nga ageskuela iti kolehio ti arte iti ili ti Troyan, Bulgaria. Kasla tumukno sadi langit ti ragsakko. Idi otonio dayta a tawen, pinanawakon ti ilik a Lovech ket napanak idiay Troyan.

Nagustuak ti mayadayo kadagiti nagannakko ken mangaramid iti kaykayatko. Rinugiak ti agsigarilio, ken pasaray agbartekkami nga agkakaeskuelaan. Maiparit ti agsigarilio ken aginum iti eskuelaan ngem ad-adda pay ketdi a maay-ayatanak a manglabsing kadagiti pagannurotan.

Nagtultuloy ti panangipategko iti arte. Limmaingak nga agdrowing, ken tarigagayak unay ti lumatak. Idi nalpasko ti lima a tawen a panageskuelak idiay Troyan, kayatko nga itultuloy ti panagadalko iti Art Academy idiay Sofia a kabesera ti Bulgaria. Dayta ti kalatakan a pagadalan iti intero a Bulgaria. Idi 1988, nakastrekak iti akademia kas maysa kadagiti walo laeng a napili iti intero a pagilian. Kasta unay ti panangipannakkelko iti dayta a panagballigik! Maysa nga aldaw, miningmingak ti bagik iti sarming ket sipapangas a kinunak iti un-unegko, ‘Plamen, sigurado nga agbalinkanto a nalatak a pintor!’

Ti Dati a Kabibiagko

Di nagbayag, rinugiakon ti agkawes iti nangisit, ken pinaatiddogkon ti buok ken barbasko. Kastoy ngamin ti ibilang ti kaaduan a rumbeng a panaglanglanga dagiti pintor. Tinuladko pay ti maipagarup a karkarna nga estilo ti panagbiagda. Karaman iti dayta ti panagabang iti siled iti pagnanaedan dagiti artist ken panamagbalin iti dayta a nakawarwara aginggat’ mabalin. Nagtarakenak iti bassit nga aso ken pusa nga addaan iti tallo a kuting. Paset met ti biagko ti kinagastador.

Ngem kaskasdi a dumegdegdeg ti essemko iti arte. Agkarapintaak kadagiti abstrak a ladawan a mangipasimudaag iti naisangsangayan a lubong nga adda iti imahinasionko. Pinintaak pay dagiti diding ti siledko. Impagarupko no daytoyen ti pangrugian ti narimat a karerak.

Napateg iti biagko ti masansan a panagragragsakmi kadagiti kaeskuelaak. Ayuyangmi ti siledko bayat a dumdumngegkami iti musika ken agiinum iti kasta unay, uray no agsagsaganakami para iti eksamenasion. Dagiti serioso a saritaanmi ket naisentro iti musika, arte, ken panggep ti biag. Masansan a nagpapatanganmi ti maipapan kadagiti di katataoan ken taga-sabali kano a planeta. Dagita ti nangtukay ti imahinasionko isu nga adda manen ideyak para iti sumaruno nga ipintak. Kayatko a kanayon koma a naragsakak, ngem saak la kasta no nakainumak. Kadawyanna a nalidayak manen iti sumaganad nga aldaw.

Kalpasan ti kasta a panagbiagko iti agarup 10 a tawen, naumaakon. Makaparagsak nga agpayso dagiti us-usarek a maris kadagiti obramaestrak ngem lumidliday ti riknak ken laplapunosennak ni leddaang. Mapukpukawen ti rimat ti arapaapko nga agbalin a nalatak a pintor. Naldaangak ken diakon ammo no ania a talaga ti aramidek iti biag. Dayta a kanito ti sarsaritaek iti pangrugian daytoy a salaysayko.

Inalawnak ti Kinapudno

Idi 1990, inkeddengko nga iyeksibit dagiti obrak idiay Lovech. Ni Yanita a naam-ammok iti akademia idiay Sofia ket inawisko a makipaset iti eksibit yantangay agkailiankami. Idi nalpasen ti eksibit, napankami iti asideg a restawran tapno selebraranmi ti nagapuananmi. Bayat nga agin-innestoriakami, nadakamatna dagiti nasursurona iti panagpayadalna iti Biblia kadagiti Saksi ni Jehova. Natukay ti interesko iti nadakamatna maipapan iti baro a lubong a naipadto iti Biblia.

Intultuloy ni Yanita ti panagadalna iti Biblia idiay Sofia, ket pasaray ikkannak iti literatura a naibasar iti Biblia. Diak pulos malipatan ti gagarko a nangbasa iti broshur nga “Adtoy! Pagbalinek Dagiti Amin a Bambanag a Baro” ken no kasano nga iti sumagmamano la nga aldaw, naungpotko a binasa ti libro a Mabalinyo ti Agbiag nga Agnanayon iti Paraiso a Daga.a Diak narigatan a namati nga adda Dios, ken dagus a kayatko a masursuro no kasano ti agkararag. Malagipko pay ti damo a panagkararagko. Nagparintumengak ken sipapasnek nga inyebkasko ken Jehova dagiti pakaseknak. Kombinsidoak unay a dengdenggennak. Rimmagsakak ken timmalna ti panunotko.

Idiay Sofia, inyam-ammonak ni Yanita iti agassawa a Saksi ni Jehova. Inawisdak a makipagadal iti Biblia kadakuada ken tumabuno kadagiti gimongda. Diak malipatan ti damo a pannakigimongko idi Hunio 1991. Nasapaak iti dua nga oras isu a nagur-urayak iti bassit a parke. Agnernerbios, alusiisen, ken agduaduaak di la ket ta maipaspasuliakto. Ngem anian a siddaawko ta sibabara a pinasangbaydak iti laksid ti karkarna nga itsurak! Sipud idin, kanayonen a makigimongak ken mamindua kada lawas nga agpayadalak iti Biblia.

Nakaragragsakak idi addan bukodko a Biblia. Diak pay pulos idi nakabasbasa iti kas iti kinasayaat ken kinanaisangsangayan ti sirib a naibinggas iti Sermon iti Bantay! Bayat nga umad-adu ti maad-adalko, napadasak a mismo ti bileg ti Sao ti Dios a mangbalbaliw iti biag kas sagudayen ti Efeso 4:23: “Mapabarokayo koma iti puersa a mangtigtignay iti panunotyo.” Insardengko ti agsigarilio ken pinasayaatko ti panaglanglangak. Dakkel unay ti namalbaliwak ta uray la a linabsannak ni tatangko idi sabtennak iti estasion ti tren idiay Lovech gapu ta dinak nailasin.

Insublatko met a binalbaliwan ti kuartok. Ti kinawara dayta, dagiti impintak iti diding, ken ti nabangsit nga angot ti sigarilio didan matukay ti ganasko nga agpinta. Nariknak a rumbeng a dalusak ti amin nga adda iti aglawlawko isu a pininturaak iti puraw dagiti diding a nangipintaak idi iti tallo ti matana a karkarna a parsua.

Gapu iti dayta, didak kayaten a kadua dagiti kabarkadak, ngem dagus nga immadu ti naam-ammok kadagiti Nakristianuan a gimong ket isudan ti nagbalin a nasinged a gagayyemko agingga ita. Nagbiit ti irarang-ayko gapu iti kasta a makapabileg a panaglalangen. Idi Marso 22, 1992, nabautisaranak iti damo nga asamblea dagiti Saksi ni Jehova iti Bulgaria a naangay iti siudad ti Plovdiv.

Panagsubli iti Lovech

Nupay ammok a narigat para iti maysa a pintor ti makasarak iti panggedan iti bassit nga ili, inkeddengko a kalpasan ti panagraduarko, agsubliak idiay Lovech. Naamirisko a diak mapaggiddan ti naballigi a karerak kas pintor ken ti panangyun-unak iti Pagarian ti Dios iti biagko. Inkeddengko a baliwan dagiti planok isu a nagbalinak a boluntario a mannursuro iti Biblia. Idi ages-eskuelaak pay laeng iti Art Academy, ni Yanita a tallo a tawenen nga immun-una a nagraduar ket naregtan a mangisursuro kadagiti naibatay-Biblia a kinapudno idiay Lovech. Isu laeng ti Saksi sadiay.

Idi nagsubliak iti Lovech, addan bassit a grupo a makipagad-adal iti Biblia kadagiti Saksi ni Jehova. Maay-ayatanak unay a sumarsarungkar kadagiti tattao iti binalaybalay ken iranud kadakuada ti namnamak iti masanguanan. Inkeddengko a busbosen ti ad-adu a tiempo iti daytoy a trabaho.

Ngem idi agangay, rimsua dagiti narigat a kasasaad. Idi 1994, nakanselar ti opisial a pannakairehistromi kas narelihiosuan nga organisasion ken nailungalong ti nasaknap a pammardaya ti media.b Masansan a mapaayaban dagiti Saksi iti polisia ken nakompiskar dagiti literaturami. Kadagita a narigat a kasasaad, maiparit ti panaggigimongmi iti publiko a lugar. Nupay kasta, kanayon a naggigimongkami iti 12 metro kuadrado a siled a kaariping ti balay ni Yanita. Naminsan, nakaanaykami a 42 iti dayta a bassit a siled. Tapno saan a maisturbo dagiti kaarruba, irikepmi dagiti tawa no kantaenmi dagiti kanta ti Pagarian. No napudot ti paniempo, agkalimduosankami iti uneg ti kuarto ngem naragsakkami latta nga agtataripnong.

Dagiti Bendision nga Impaay ni Jehova

Ap-apresiarek unay ti kinaregta ni Yanita iti pudno a panagdayaw, ket iti panagregreg dagiti binulong ti kalendario, natnag ti riknami iti maysa ken maysa. Nagkallaysami idi Mayo 11, 1996. Agduma ti personalidadmi ngem agkatunosankami. Isu ti kadekketan a gayyemko ken katulongak. Agyamanak ken Jehova gapu ta impaayannak iti katakunaynay a ti “pategna adayo nga ad-adda ngem iti pateg dagiti korales.”—Proverbio 31:10.

Dadduma kadagiti dati a gagayyemko ti nagbalin a nalatak nga artist, nga inarapaapko met idi a pagbalinan. Nupay kasta, agyamanak ta pinilik ti imbilangko a nasaysayaat a karera. Adun dagiti natulongak a makasarak iti panggep ti biagda, ket nagbalindan a kapammatiak. Dagiti bendision a sagsagrapek iti panagserbik ken Jehova ket adayo a nasaysayaat ngem iti aniaman a dayaw ken kinalatak a nalabit nagun-odak kas maysa a pintor. Maragsakanak ta naam-ammok a sisisinged ti katan-okan nga Artist a ni Jehova a Dios.

[Footnotes]

[Ladawan iti panid 12]

Dakami ken Yanita