Nadisenio Kadi?

Ti Sippit ti Salaksak

● Ti bullet train idiay Japan ti maysa kadagiti kapardasan iti intero a lubong ta agarup 300 a kilometro kada oras ti kapartakna. Ti maysa kadagiti makagapu iti kapartakna ket ti bassit a billit—ti salaksak. Apay?

Usigem: Tapno makaala iti naimas a taraonna, makapagsuek ti salaksak iti danum a bassit la a parsiak ti mapataudna. Naginteresan unay dayta ni Eiji Nakatsu, ti inheniero a nangimaton iti pannakaipadas ti panagtaray ti bullet train. Pinampanunotna no apay a laklakaen ti salaksak ti agsuek iti danum manipud iti tangatang. Ti sungbat dayta ket napateg iti panangsolbarda iti naisalsalumina a problema mainaig iti bullet train. Inlawlawag ni Nakatsu: “No sipepegges a sumrek ti tren iti akikid nga usok, mangpataud daytoy iti napigsa a puersa ti angin a kas iti kapardas ti uni ti idadanonna iti ungto ti usok. Gapuna, tumaud ti napigsa, nabangag, ken gumgumluong nga uni ken nakapigpigsa a panagdayyeg a marikna dagiti residente nga agnanaed iti kaadayo nga 400 a metro isu nga agrekreklamoda kadagiti autoridad.”

Naikeddeng a ti sungo ti bullet train ket madisenio a kas iti sippit ti salaksak. Ania ti resultana? Naparpartak itan iti 10% ti taray ti bullet train ken basbassiten iti 15% ti makonsumona nga enerhia. Naksayan met iti 30% ti puersa ti angin a pataudenna isu nga awanen ti gumgumluong nga uni no lumabas iti usok.

Ania ti makunam? Naiparna laeng kadi ti kaadda ti sippit ti salaksak? Wenno nadisenio dayta?

[Picture Credit Lines iti panid 29]

Agsusuek a salaksak: Woodfall/Photoshot; bullet train: AP Photo/Kyodo