Pabilgem ti Determinasionmo

“Ti napasnek a panangikagumaan a mangisardeng iti panagsigarilio ti kakaisuna a kapatgan a galad dagiti nakaisardeng iti dayta a bisioda.”—“Stop Smoking Now!”

ITI ababa a pannao, no kayatmo nga isardeng ti agsigarilio, nasken a maaddaanka nga umuna iti nabileg a determinasion a mangaramid iti dayta. Kasanom a mapabileg ti determinasionmo? Umuna iti amin, usigem dagiti pagsayaatam no isardengmo ti agsigarilio.

Makainutka iti kuarta. No inaldaw nga agsigarilioka iti sangapakete, rinibu a pisos ti magastosmo iti makatawen. “Diak pulos idi napampanunot a dakkel gayam a gatad ti saysayangek iti sigarilio.”—Gyanu, Nepal.

Naragragsakto ti biagmo. “Dakkel ti simmayaatan ti biagko ken sumaysayaat pay dayta idi insardengko ti agsigarilio.” (Regina, South Africa) No isardeng dagiti tattao ti agsigarilio, sumayaat unay ti panagraman ken panagangotda. Masansan a nagangganaygayda ken sumayaat pay ti langada.

Mabalin a sumalun-atka. “No isardeng dagiti tattao ti agsigarilio, aniaman ti edadda, adda dakkel ken insigida a pagsayaatanna iti salun-atda.”—The U.S. Centers for Disease Control and Prevention.

Dumakkel ti panagtalekmo iti bagim. “Insardengko ti agsigarilio ta diak kayat ti agpaadipen iti sigarilio. Kayatko a siak ti mangituray iti bagik.”—Henning, Denmark.

Magunggonaan ti pamiliam ken gagayyemmo. “Ti panagsigarilio . . . dadaelenna ti salun-at dagiti adda iti aglawlawmo. . . . Sigun kadagiti panagadal, tinawen a rinibu ti matmatay iti kanser ti bara ken sakit ti puso gapu iti malang-abda nga asuk ti sigarilio uray no saan nga isuda a mismo ti agsigsigarilio.”—American Cancer Society.

Maparagsakmo ti Namarsua kenka. “Dungdungnguen, dalusantayo koma ti bagbagitayo iti tunggal pakatulawan iti lasag.” (2 Corinto 7:1) “Iparangyo ti bagbagiyo a . . . nasantuan, makaay-ayo iti Dios.”—Roma 12:1.

“Idi naammuak a kagura ti Dios dagiti bambanag a mangrugit iti bagi, inkeddengkon nga isardeng ti agsigarilio.”—Sylvia, Espania.

Nupay kasta, saan nga umdas ti kaadda ti determinasion. Mabalin a kasapulantayo met ti tulong ti sabsabali, agraman dagiti kapamilia ken gagayyem. Ania ti maaramidanda?