Agimtuod Dagiti Agtutubo

Kasano a Mapadakkelko ti Panagtalekko iti Bagik?

WEN | SAAN

No agsarmingka, magustuam kadi ti makitam

Panagkunam, adda kadi dagiti paglaingam a maipagpannakkelmo?

Kabaelam kadi a sarangten ti impluensia dagiti kapatadam?

Maakseptarmo kadi dagiti nainkalintegan a pammabalaw?

Kabaelam kadi a di ikankano dagiti saan met a nainkalintegan a komento ti sabsabali maipapan kenka?

Mariknam kadi a maipatpategka?

An-annadam kadi ti salun-atmo?

Makipagragsakka kadi iti sabsabali no agballigida?

Masansan kadi nga ibilangmo ti bagim a naballigi?

No saan ti sungbatmo iti sumagmamano a saludsod iti ngato, mabalin a ti bassit a panagtalekmo iti bagim ti makagapu a dimon mapanunot dagiti naimbag a galadmo. Matulongannaka daytoy nga artikulo a mangamiris kadagita!

KAADUAN nga agtutubo ti awan kompiansada iti langada, kadagiti abilidadda, ken iti bagida no idilig iti dadduma. Kastaka met kadi? No wen, adu ti kas kenka!

● “Maupayak no panunotek dagiti pagkurkurangak. Masansan a siak ti kangrunaan a mangdildillaw iti bagik.”—Leticia.a

● “Kasano man ti kapintasmo wenno kaguapom, addanto latta makitam a napimpintas wenno naguguapo ngem sika.”—Haley.

● “Mababainak no kaduak ti sabsabali. Maamakak di la ket ta ipapanda nga awan serserbik.”—Rachel.

No kasta met ti kaririknam, dika maupay. Adda makatulong kenka. Usigem ti tallo a banag a mangpadakkel iti panagtalekmo iti bagim ken mamagbalin kenka nga ad-adda a positibo.

1. Makigayyemka

Kuna ti Biblia: “Ti pudno a kadua agayat iti isuamin a tiempo, ken ti kabsat a mayanak no adda rigat.”—Proverbio 17:17.

Kaipapananna: No adda problemam, dakkel ti maitulong ti pudno a gayyem. (1 Samuel 18:1; 19:2) Pumigsa ti pakinakemmo no ammom nga adda mangisakit kenka. (1 Corinto 16:17, 18) Isu a makisinningedka kadagidiay nasayaat ti impluensiada kenka.

“Ti pudno a gagayyem pabilgendaka.”—Donnell.

“No dadduma, ti kapatgan ket ti pannakaammom nga adda pudno a mangisakit kenka ta mariknam a napategka.”—Heather.

Palagip: Piliem a pakigayyeman dagidiay mangakseptar iti pudno a kinataom ken dika aginkukuna tapno laeng magayyemmo ida. (Proverbio 13:20; 18:24; 1 Corinto 15:33) No agaramidka iti di umiso tapno laeng magustuandaka, ad-addanto laeng a bumassit ti panagkompiansam iti bagim ken mariknam nga us-usarendaka laeng tapno maaramidda ti kayatda.—Roma 6:21.

Ti Aramidem: Iti baba, isuratmo ti nagan ti gayyemmo a makatulong kenka a mangpadakkel iti panagtalekmo iti bagim.

․․․․․

Apay a dika mangiwaya iti tiempo nga agkaduakayo? Laglagipem: Isu ket saan a kasapulan a kasadarmo.

2. Tumulongka

Kuna ti Biblia: “Ad-adu ti kinaragsak iti panangted ngem iti panangawat.”—Aramid 20:35.

Kaipapananna: No tulongam ti sabsabali, tultulongam ti bagim. Kasano? Kuna ti maysa a proverbio iti Biblia a “no managparaburka, rumang-ayka. Tulongam ti padam a tao ket tulongannaka met.” (Proverbio 11:25, Ti Baro a Naimbag a Damag Biblia) Sigurado a dumakkel ti panagtalekmo iti bagim no tulongam ti sabsabali!b

“Mangpanunotak iti mabalinko nga aramiden para iti sabsabali ken ikagumaak a tulongan ti siasinoman a kakongregasionak nga agkasapulan. Naragragsakak no ipakitak ti ayat ken pannakaseknan iti sabsabali.”—Breanna.

“Makagunggona ti Nakristianuan a ministerio ta tignayennaka nga ad-adda a mangpanunot iti sabsabali imbes nga iti bagim.”—Javon.

Palagip: Dika tumulong tapno laeng adda magun-odam. (Mateo 6:2-4) Saan a makatulong ti kasta a di umiso a motibo. Masansan a madlaw ti sabsabali no saan nga umiso ti motibom!—1 Tesalonica 2:5, 6.

Ti Aramidem: Adda kadin natulongam? Siasino ken ania ti naitulongmo kenkuana?

․․․․․

Ania ti nariknam kalpasanna?

․․․․․

Siasino pay ti mabalinmo a tulongan? Isuratmo no kasanom a matulongan.

․․․․․

3. Dika Maupay No Nagkamalika

Kuna ti Biblia: “Ta amin nagbasol ken agkurang iti dayag ti Dios.”—Roma 3:23.

Kaipapananna: Imperpektoka. Kayatna a sawen nga adda dagiti tiempo a makaisawang wenno makaaramidka iti di umiso. (Roma 7:21-23; Santiago 3:2) Dimo maliklikan ti agkamali ngem makontrolmo ti reaksionmo kadagita. Kuna ti Biblia: “Uray mamin-ano a matuang ti nalinteg, bumangon latta.”—Proverbio 24:16, Ti Baro a Naimbag a Damag Biblia.

“No dadduma, bumassit ti panagtalektayo iti bagitayo no idiligtayo ti pagkapuyantayo iti paglaingan ti sabali a tao.”—Kevin.

“Adda naimbag ken di naimbag a galad ti tunggal maysa kadatayo. Rumbeng nga ipannakkeltayo dagiti naimbag ken aturentayo dagiti di naimbag.”—Lauren.

Palagip: Dimo pagrason ti kinaimperpektom tapno iyugalim ti agbasol. (Galacia 5:13) No igagaram ti agaramid iti di umiso, mapukawmo ti kapatgan iti amin—ti anamong ni Jehova a Dios!—Roma 1:24, 28.

Ti Aramidem: Isuratmo iti baba ti maysa a galad a kayatmo a pasayaaten.

․․․․․

Iyabaymo ti petsa ita iti galad nga insuratmo. Agsukimatka no kasanom a mapasayaat dayta, ken paliiwem ti pagrang-ayam iti makabulan.

Ti Pudno a Pategmo

Kuna ti Biblia a “ti Dios dakdakkel ngem kadagiti pusotayo.” (1 Juan 3:20) Kaipapananna nga adda makitkitana a naimbag kenka a nalabit dimo makitkita. Ngem mapukaw kadi ti pateg dayta gapu kadagiti pakapilawam? Ipapantayon nga adda kuartam a 100 ngem adda bassit pigisna. Ibellengmo kadin dayta wenno ibilangmon nga awan serserbina gapu laeng ta adda pigisna? Siempre saan! Adda man pigisna wenno awan, 100 latta ti balorna.

Kasta met laeng ti panangmatmat ti Dios iti pategmo. Makitkita ken ipatpategna dagiti panagreggetmo a mangparagsak kenkuana uray no panagriknam ket kasla awan unay kaes-eskan dagita! Wen, ipatalged kadatayo ti Biblia a ‘saan a nakillo ti Dios tapno lipatenna ti aramidmo ken ti ayat nga impakitam maipaay iti naganna.’—Hebreo 6:10.

Ad-adu pay nga artikulo ti masarakan iti serye a “Young People Ask” iti Web site a www.watchtower.org/ype

[Dagiti Footnote]

UTOBEM DAGITOY

Ania ti aramidem no malmaldayka gapu ta

● Tagtagibassitendaka dagiti kapatadam?

● Panagriknam ket nalalaing ti sabsabali ngem sika?

● Kasla dagiti laeng pagkapuyam ti makitkitam?

[Blurb iti panid 27]

“Adda tao a nakapimpintas ngem kaskasdi a nalaad ti pagarupna iti bagina. Adda met tao a saan unay a napintas ngem panagriknana, isu ti kapintasan. Depende dayta iti panangmatmat ti maysa.”—Alyssa

[Kahon/Dagiti Ladawan iti panid 27]

TI KUNA DAGITI KAPATADAM

“Masansan a ti magun-odak a tulong ket aggapu iti naayat a sasao ti gayyem wenno uray iti isem laeng wenno arakup.”

“Imbes a kasurontayo ti naimbag a galad ti sabsabali, magunggonaantay ketdi kadagita—no kasano a magunggonaanda met kadagiti naimbag a galadtayo.”

[Dagiti ladawan]

Aubrey

Lauren

[Ladawan iti panid 28]

Saan a maksayan ti balor ti kuarta gapu laeng ta adda pigisna. Saan met a maksayan ti pategmo iti imatang ti Dios gapu iti pakapilawam