“Diyo Pakasikoran ti Agpaay Kadakayo Inton Bigat”

Kasla din maibturan ni Renée dagiti pakadanaganna. Nasurok a tallo a tawenen nga awan permanente a trabaho ni lakayna a Matthew. “Maup-upayak unay gapu ta diak ammo no ania ti mabalin a mapasamak kadakami,” malagip ni Renée. “Kasla bumtak ti barukongko!” Inkagumaan ni Matthew a pagkalmaen ni baketna babaen iti panangibagana a dida met pay naawanan kadagiti kasapulanda. “Ngem awan pay trabahom!” kinuna ni Renée. “Kasapulantayo ti kuarta!”

TALAGA nga agdanagka no maawananka iti trabaho. Nalabit pampanunotem, ‘Kasano ngata kabayag nga awan trabahok? Kasanomi ngata a mayan-anay ti kuartami?’

Gagangay dagita a pakadanagan ngem nangipaay ni Jesus iti realistiko a balakad a mangkissay iti panagdanag. Kinunana: “Diyo pakasikoran ti agpaay kadakayo inton bigat . . . Umdasen ti parikut ti maysa nga aldaw iti dayta nga aldaw.”—Mateo 6:34, Ti Baro a Naimbag a Damag Biblia.

Ammuem Dagiti Pagam-amkam

Saan met ketdi a kinuna ni Jesus nga agpammarangtayo a kasla awan problematayo. Ngem no pakadanagantayo ti mabalin a mapasamak inton bigat, ad-adda laeng a mapadagsenan ita ti riknatayo. Kinaagpaysuanna, ditay pay ketdi ammo no ania ti naimbag wenno dakes a mapasamak inton bigat. Ngem adda dagiti maaramidantayo tapno madaerantayo ti agdama.

Talaga a nalaka nga ibaga dayta ngem narigat nga aramiden! Nasesante ti asawa ni Rebekah kalpasan ti 12 a tawen a panagtrabahona. Kuna ni Rebekah: “No nadagsen unay ti riknam, marigatanka nga agpanunot a naimbag. Ngem masapul a kasta ti aramidenmi. Isu nga ikagkagumaak a kontrolen ti bagik. Idi saan a napasamak dagiti nagam-amkak unay, naamirisko a talaga a di rumbeng nga agdanagak. Saankamin a nadagsenan yantangay dagiti laeng agdama a problema ti as-asikasuenmi.”

Isaludsodmo iti bagim: ‘Ania ti pagam-amkak unay? Posible ngata a mapasamak dayta? Maib-ibus kadin ti pigsak gapu iti kapapanunot iti mabalin a mapasamak wenno saan?’

Agbalinka a Kontento

Ti panangmatmattayo maapektaranna ti emosiontayo isu nga iparegta ti Biblia daytoy a panagpampanunot: “No adda pagtaraon ken pagkawestayo, mapnektayon kadagitoy a banag.” (1 Timoteo 6:8) Makuna a kontentotayo no limitarantayo dagiti kayattayo ken mapnektayo no addan dagiti inaldaw a kasapulantayo. No tarigagayam ti ad-adu pay, marigatanka a mangpasimple iti biagmo.—Marcos 4:19.

Nagbalin a kontento ni Renée idi realistikon ti panangmatmatna iti situasionna. Kunana: “Dikam pay pulos napugsatan iti koriente, naawanan iti gas, wenno pagnaedan. Ti talaga a problema ket saankami a naruam iti agdama a kasasaadmi. Lallalo a nagdanagak ta tinarigagayak nga agtultuloy koma ti dati a kabibiagmi.”

Idi agangay, naamiris ni Renée a ti panangmatmatna—saan ket a ti kasasaadna—ti mangpadpadagsen iti barukongna. “Masapul nga akseptarek ti agpayson a kasasaadmi ken diakon pampanunoten pay ti dati,” kunana. “Naragragsakakon idi nagbalinak a kontento kadagiti inaldaw nga ipapaay ti Dios.”

Isaludsodmo iti bagim: ‘Magunggun-odak kadi dagiti kasapulak ita nga aldaw? No wen, mabalin kadi a dagiti laeng kasapulak ita ti panunotek ket diak pay la problemaen ti sumaganad nga aldaw?’

Ti umuna nga addang tapno madaeran ti karit ti panagbiag a simple ket ti umiso a panangmatmat.a Ngem ania dagiti praktikal nga aramidem no bassiten ti makukuartam gapu ta naawananka iti trabaho?

[Footnote]

[Kahon iti panid 5]

Nagunggonaan ti Kinapingetna!

Adu a lawas a nagbirbirok ni Fred iti trabaho isu nga impagarupna no din pulos makastrek pay. Kunana: “Kasla agur-urayka iti mangdagas kenka ngem awan met ti immay.” Inkeddeng ni Fred nga aramiden no ania ti kabaelanna. Nagaplay iti aniaman a kompania uray no kasla dida kasapulan dagiti paglainganna. Sinurnadanna dagiti aplikasionna ken sinaganaanna a naimbag ti tunggal interbiu, ta agtalek a “dagiti gakat daydiay nasaet sigurado a mangipaay iti pagsayaatan.” (Proverbio 21:5) Kuna ni Fred: “Iti maysa a kompania, pinarigatdak dagiti nangangato a manedyer babaen ti adu a saludsodda iti namindua a pananginterbiuda kaniak.” Ngem nagunggonaan ti kinapingetna ta kinunana: “Nakastrekak iti trabaho!”

[Kahon/Ladawan iti panid 6]

Napatpateg Ngem iti Kuarta

Ania ti napatpateg—ti nasayaat a kinataom wenno ti kuartam? Usigem ti dua a proverbio ti Biblia.

“Nasaysayaat daydiay bassitan iti sanikua a magmagna iti kinatarnawna ngem iti asinoman a nakillo iti daldalanna, nupay isu nabaknang.”—Proverbio 28:6.

“Nasaysayaat ti putahe a natnateng a sadiay adda ayat ngem iti toro a pinalukmeg iti kulluong ket gura ti naipakuyog iti dayta.”—Proverbio 15:17.

Nabatad a ti pannakapukaw ti trabaho dina kissayan ti kinapateg ti indibidual ken ti nasayaat a kinataona. Isu nga idi naawanan iti trabaho ti asawa ni Renée, kinunana kadagiti annakda: “Adu nga amma ti nangbaybay-a iti pamiliada. Ngem saan a kasta ni tatangyo. Ammoyo a dungdungnguennakayo unay ken tultulongannakayo iti amin a problemayo. Awanen ti masarakanyo a kas kenkuana!”