“Agbirokkan iti Sabali a Trabaho”
ISU ket napanaganan kas Fantastic Fred iti kompania.a Iti innem a tawen a panagtrabahona sadiay, dakkel ti naksay iti paggastuan ti kompania gapu kadagiti baro nga ideyana. Gapuna, idi pinaayaban ti boss-na, impagarupna no manayonan ti sueldona wenno maingato ti saadna. Ngem dagus nga imbaga ti boss-na, “Ladingitek ngem agbirokkan iti sabali a trabaho.”
Kasla napleng ni Fred. “Dakkel ti sueldok ken naragsakak iti trabahok ngem kellaat a nagbaliw ti kasasaad,” kinunana. Idi imbaga ni Fred ken baketna nga Adele ti napasamak, naklaat met. “Urayak la naglusdoy,” malagip ni baketna. “Napanunotko, ‘Ania itan ti aramidenmi?’”
Ti napasamak ken Fred ket mapaspasaran met ti minilion kas ipakita ti graph iti baba. Ngem saan a makita kadagiti numero ti nakas-ang nga epekto ti kinaawan trabaho. Kas pagarigan, ni Raúl nga imigrante manipud Peru ket naikkat iti panggedanna kalpasan ti 18 a tawen a panagtrabahona iti dakkel a hotel idiay New York City. Nagbirok ni Raúl iti trabaho, ngem saan a nakasarak. “Iti dandani 30 a tawen, impaayko dagiti kasapulan ti pamiliak,” kunana. “Ita, panagriknak ket awanen serserbik a lalaki.”
Ipakita ti kapadasan ni Raúl ti banag a pagaammon dagiti napukawan iti trabaho—a saan la a problema iti kuarta ti ibunga dayta. Masansan nga agbanag dayta iti nakaro a sakit ti nakem. “Mariknak nga awanen mamaayko,” kuna ni Renée, a tallo a tawenen nga awan trabaho ni lakayna a Matthew. “No awan makukuartam, ibilangdaka dagiti tattao nga awan serserbim, ket di agbayag, kasta metten ti panangmatmatmo iti bagim.”
Nakaro la ngaruden ti sakit ti nakem dagiti naawanan iti trabaho, mapilitanda pay a mangyan-anay iti adda. “Idi adu ti kuartami, dimi pulos pinanunot ti agekonomia,” kuna ni Fred. “Idi bumayagen nga awan trabahomi ngem kaskasdi a dakkel latta dagiti paggastosanmi, kapilitan a pinasimplemin ti biagmi.”
Bayat nga agsapsapulka iti trabaho, masapul nga anusam dagiti pakaburiboran ken pakadanagan nga epekto ti kinaawan trabaho. Nalabit masapul met nga agekonomiaka. Usigentayo nga umuna ti dua a praktikal nga aramidem tapno madaeram dagiti pakadanagam.
[Footnote]
a Nabaliwan ti dadduma a nagan.
[Graph iti panid 3]
(Para iti aktual a pannakaurnosna, kitaem ti publikasion)
Bilang Dagiti Awanan iti Trabaho idi 2008 iti Tallo Laeng a Pagilian
Japan 2,650,000
Espania 2,590,000
Estados Unidos 8,924,000