Ti Korte iti Espania Pinasingkedanna Manen Dagiti Kalintegan ti Maysa nga Ina
● Ania ti mariknam no makuestionaran ti panangpadakkelmo iti annakmo? Kasanon no adda mangibaga a di ammo dagiti annakmo ti makipulapol, dida mapagduma ti naimbag ken dakes, ken malaplapdan ti itatanor ti isipda—gapu amin iti impluensiam?
Dagita ti maipabpabasol ken Rosa López a taga-Espania ken addaan iti dua nga annak a babbai. Nagdarum ti dati nga asawana tapno magun-odanna ti legal a kalintegan nga isu ti pakaipoderan ti annakda. Ni Rosa ket maysa kadagiti Saksi ni Jehova. Kinuna ti nagdarum a dagiti narelihiosuan a patpatien ni Rosa ket dakes ti epektoda iti pannakipulapol, panageskuela, ken panagdesision dagiti annakda. Idi imbasura ti korte iti lugarda dagita a darum, ti dati nga asawa ni Rosa ket nagapelar iti korte ti probinsia.
No maipapan iti rumbeng a pakaipoderan ti annak, makuna nga umiso ti panangbista no ikagkagumaan ti korte ti agbalin a patas ken di makiraman kadagiti nainaig-relihion a debate a kasla ketdin mabisbista ti relihion ti naidarum. Imbes ketdi, tamingenna laeng dagiti isyu a kas iti: Ania dagiti kasayaatan para iti ubing? Adda kadi dakes nga impluensia ti nagannak a nakaipoderanna? Siasino kadagiti nagannak ti ad-adda a makaipaay kadagiti kasapulan ti anakda?
Tapno mataming dagita nga isyu iti kaso ni Rosa, nangdutok ti korte iti sikologo a manginterbiu kadagiti ubbing ken nagannak. Ania dagiti resulta? Naammuan ti sikologo a nupay innem a tawenen nga adda dagiti ubbing iti poder ti inada, nagsayaat ti itatanorda iti amin a benneg—iti eskuelaan, iti kagimongan, ken iti pamilia. Sigun kadagiti naammuan ti sikologo ken iti testimonia dagiti nagannak, awan ti nakita ti hues nga ebidensia a mangipasimudaag nga “adda negatibo nga epektona kadagiti ubbing ti pannakitimpuyogda kadagiti Saksi ni Jehova.” Inkeddeng pay ti hues a “di pulos nainkalintegan ken awan ti nakaibatayan” dagiti akusasion ti dati nga asawa ni Rosa.
Gapu iti panangidumduma iti relihion ken di umiso nga impormasion, ipapan ti dadduma a ti annak dagiti Saksi ni Jehova ket maikapkapis iti makunkuna a normal a panagdakkel. Ngem saan a panangmaltrato kadagiti ubbing ti panangpadakkel kadakuada maitunos kadagiti prinsipio iti Biblia. Matultulonganda ketdi nga agbalin a balanse, nadungngo, ken nasayaat a tattao.—Efeso 6:4; 2 Timoteo 3:15-17.
[Ladawan iti panid 14]
Inkeddeng ti korte a ni Rosa López ti pakaipoderan latta ti dua nga annakna