“Panagadal iti Biblia—Makagunggona Kadagiti Tuleng”
KASTA ti paulo ti artikulo a naipablaak iti magasin para kadagiti tuleng idiay Czech Republic. Ti mannurat a ni Zdeněk Straka pinadayawanna dagiti Saksi ni Jehova a nagsursuro iti sign language tapno matulonganda dagiti tuleng.
Apay a nagsurat ni Mr. Straka iti kasta nga artikulo? Idi kalgaw ti 2006, tinabunuanna ti kombension dagiti Saksi ni Jehova idiay Prague. Naipatarus ti programa iti sign language tapno magunggonaan ti agarup 70 a tuleng a timmabuno. Tinawen a mangyurnos dagiti Saksi ni Jehova kadagiti kombension iti intero a lubong tapno makagun-odda iti pannakaammo manipud iti Biblia ken makapagpipinnabilegda. Karaman dita dagiti tuleng. Iti nabiit pay, 96 kadagita a kombension iti intero a lubong ket naiparang a puro sign language ken iti sabali pay a 95 a kombension, ti programa ket naipatarus para kadagiti tuleng.
Kadaydi a kalgaw a naangay ti kombension idiay Prague, ti sign language a kongregasion iti dayta a siudad ket mangikonkondukta iti panagadal iti Biblia iti agarup 30 a tuleng. Dagidiay makipagad-adal iti Biblia ket magunggonaanda kadagiti maad-adalda kas ipakita ti sumaganad a kapadasan.
Agdaliasat ni Markéta iti 100 a kilometro iti kada lawas tapno mayadalanna iti Biblia ti maysa a tuleng a babai a taga-Mongolia. Agduma ti Czech ken Mongolian sign language isu a masapul nga ipamuspusanna nga ilawlawag dagiti topiko tapno maawatan a naimbag ti iyad-adalanna. Nagsayaat ti resulta ti panagregget ni Markéta. Ti mayad-adalan ket masikog idi iti maikadua nga anakna ken panggepna ti agparegreg, ngem nagbaliw ti panunotna. Kuna ni Markéta: “Idi sinaludsodko no apay, inseniasna, ‘Ti panagparegreg ket kagura ni Jehova.’ Maragsakanak ta maawatannan ti panangmatmat ti Dios maipapan iti biag!”a
Iti intero a lubong, adu a tuleng ti makagunggun-oden iti umiso a pannakaammo iti Dios babaen ti panagadalda iti Saona. Bayat a sumingsingedda iti Dios ken rumagragsakda, sumaysayaat met ti panagbiagda.—Isaias 48:17, 18.
[Footnote]
a Para iti kanayonan nga impormasion maipapan iti panangmatmat ti Biblia iti aborsion, kitaem ti panid 3-9 iti Hunio 2009 a ruar ti Agriingkayo!
[Kahon iti panid 26, 27]
AMMOM KADI?
● Agar-aramid dagiti Saksi ni Jehova iti mabuya a DVD iti 43 a kita ti sign language. Adda met dagiti publikasion para kadagiti tuleng a mabalin nga i-download manipud iti Web site a www.jw.org.
● Tapno ad-adu a publikasion ti maaramid agpaay kadagiti tuleng, nangorganisar dagiti Saksi ni Jehova iti 59 a grupo dagiti agipatarus iti sign language iti intero a lubong.
● Nasurok a 1,200 ti sign language a kongregasion dagiti Saksi ni Jehova iti intero a lubong.
[Diagram iti panid 26]
(Para iti aktual a pannakaurnosna, kitaem ti publikasion)
www.jw.org