Alistokay Koma a Mangbirok Kadagiti Tuleng iti Teritoriayo
1 Iyaw-awis ni Jehova: “‘Umayka!’ . . . Ti asinoman a mayat awatenna koma ti danum ti biag nga awan bayadna.” (Apoc. 22:17) Umad-adu dagiti tuleng a mangipangpangag iti daytoy nga awis. Kas resultana, iti napalabas a 7 a tawen, nabuangay ti maysa a sign-language a kongregasion ken agarup 15 a sign-language a grupo ditoy Pilipinas.
2 Nupay dagiti tuleng ken adda depekto ti panagdengngegda ti kangrunaan a birbiroken a kasabaan dagiti sign-language a kongregasion ken grupo kadagiti teritoriada, adu dagiti kasta a tattao a saan pay a nasarakan ken nakasabaan iti daytoy a pagilian.
3 Kasanokayo a Makatulong? Iti kaaddayo kadagiti publiko a lugar, nakakitakayo kadin kadagiti tattao a mangus-usar iti sign language? Adda kadi am-ammoyo iti pagtrabahuanyo wenno idiay eskuelaanyo nga addaan tuleng a miembro ti pamiliana? Alistokay koma a mangbirok kadagiti tuleng kabayatan dagiti inaldaw nga aktibidadyo. Ngem kasanoyo a masigurado a makasabaanda?
4 Panangasaba: No ammoyo nga adda ti sign-language a kongregasion wenno grupo nga asideg kadakayo, ipakaammoyo kadakuada no sadino ti pagtaengan ti tuleng a nasarakanyo. Adu dagidiay tuleng a naparpartak ti irarang-ayda nga agadal iti kinapudno no makalangenda dagiti tuleng a Saksi kadagiti gimong ti kongregasion a maang-angay iti Philippine Sign Language. Gapuna, no adda ti sign-language a kongregasion wenno grupo iti lugaryo, mangipatulod sadiay ti sekretario ti kongregasionyo iti impormasion maipapan kadagiti amin a tuleng iti teritoriayo.
5 Kasanon no awan iti asideg ti makaipaay iti naespirituan a tulong kadagiti tuleng iti lugaryo? Kasanokayo a makatulong? Apay a dikay sumarungkar ken makisarita kadagiti makangngeg a miembro ti sangakabbalayan? Itukonyo nga ipabuya ti maysa a sign-language a video tapno matukay ti interes ti kabbalayda a tuleng. Adu dagiti agibumbunannag ditoy Pilipinas a mangikagkagumaan nga agsursuro iti sign-language tapno ad-adda nga epektibo a makasabaanda dagiti tuleng. (Ara. 16:9, 10) Magun-odanen iti sign-language a video ti broshur a Kalikaguman ken ti libro a Pannakaammo. Adun ti nasayaat a resulta ti panangikondukta iti panagadal iti Biblia babaen ti panangusar kadagitoy nga alikamen.
6 No alistokayo a mangbirok kadagiti tuleng iti lugaryo, maipaayanyo ida iti gundaway a mangawat iti danum ti biag nga awan bayadna.—Mat. 10:11.