Nadisenio Kadi?

Ti Mata ti Simotsimot

● Rabii ti kadawyan a panagtayab ti kaaduan a simotsimot. Nupay dadduma a parsua nga aktibo iti rabii ket madlaw ti kaaddada gapu ta agandap dagiti matada no masilnagan, naiduma ti simotsimot ta saan unay nga agandap ti cornea ti matana.

Usigem: Naisalsalumina ti cornea ti mata ti simotsimot ta buklen dayta ti nakaur-urnos a grupo dagiti bassiusit a tambukor. Dagiti tambukor “ket basbassit ngem iti makita a lawag,” kuna ni Peng Jiang nga assistant professor ti chemical engineering iti University of Florida, U.S.A. Gapu iti urnos ken kabassit dagitoy a grupo dagiti tambukor iti mata ti simotsimot, maagsep ti aniaman a lawag manipud iti aniaman a direksion. Ti kabengbeng dagiti tambukor ket 200-300 a nanometer laeng idinto ta agarup 80,000 a nanometer ti kabengbeng ti buok ti tao!

Namnamaen dagiti inheniero a ti ad-adu a pannakaammoda maipapan iti cornea ti simotsimot ket makatulong kadakuada a mangpasayaat iti disenio ti light-emitting diodes (LEDs) ken liquid crystal displays (LCDs), a gagangay a maus-usar kadagiti elektroniko nga alikamen. Ti disenio ti mata ti simotsimot ket mabalin met a maipakat kadagiti alikamen para iti solar power. Agarup 35% ti agbalandra a lawag kadagiti solar panel a naaramid iti silicon isu nga adu ti masayang a lawag a mapagbalin koma nga enerhia. Ngem babaen ti panangtuladda iti urnos dagiti tambukor iti mata ti simotsimot, ni Jiang ken ti kakaduana nakaaramidda iti silicon panel a nakurkurang pay ngem 3% ti lawag nga agbalandra iti dayta. “Adu ti masursurotayo kadagitoy a natural a disenio,” kinuna ni Jiang.

Ania ti makunam? Naiparna laeng kadi dagiti bassiusit a tambukor a manglapped iti panagandap ti mata ti simotsimot? Wenno nadisenio dayta?

[Ladawan iti panid 30]

Ti “cornea” iti mata ti simotsimot ket buklen ti nakaur-urnos a grupo dagiti bassiusit a tambukor

[Dagiti Ladawan iti panid 30]

Solar panel a naaramid iti silicon ken nadisenio a di agbalandra ti lawag a maisarang iti dayta

[Picture Credit Lines iti panid 30]

Napadakkel a mata ti simotsimot: Impaay ti Dartmouth Electron Microscope Facility; napadakkel a ladawan ti silicon panel: Impaay ni Peng Jiang