Ti Panangmatmat ti Biblia

Rumbeng Kadi nga Agbalin a Ministro Dagiti Babbai?

“MASDAAW ken makapungtotak ta agingga ita, di pay la mabalin a maordenan dagiti babbai,” insurat ti maysa a Katoliko a babai iti pagiwarnak nga USA Today. Adu ti kasta met ti kapanunotanda. Ngamin, iti dadduma a relihion, adda dagiti babbai a ministro, padi, obispo, ken rabbi.

Dagiti relihion iti agsumbangir a dasig—dagidiay mangiparit nga agbalin a ministro dagiti babbai ken dagidiay mangipalubos iti kasta—ket agpapada nga agkuna a sursurotenda ti Biblia. Ngem awan kadakuada ti ayonan ti Biblia. Apay? Tapno masungbatan, usigentayo nga umuna no kasano ti panangusar ti Biblia iti sao a “ministro.”

Dagiti Ministro Idi Umuna a Siglo

Para kenka, ania ti kaipapanan ti sao a “ministro”? Mabalin a ti dagus a mapanunot ti adu ket ti lider ti relihion, lalaki man wenno babai, a mangidadaulo iti panagdaydayaw ti kongregasion wenno grupo. Ngem iti Biblia, nalawlawa ti pannakausar dayta a sao. Alaentayo a pagarigan ti Kristiano a babai a ni Febe, nga inyam-ammo ni Pablo kas “kabsattayo a babai, a maysa a ministro iti kongregasion nga adda sadiay Cencrea.”—Roma 16:1.

Mapampanunotmo kadi a sitatakder ni Febe iti sanguanan ti kongregasion idiay Cencrea a mangidadaulo iti narelihiosuan a gimongda? Ania a ministerio ti inaramid ni Febe? Iti suratna kadagiti taga-Filipos, dinakamat ni Pablo dagiti babbai a “timmulong [kenkuana] . . . iti pannakaisaknap ti ebanghelio.”—Dakami ti nangyitaliko; Filipos 4:2, 3, Ti Baro a Naimbag a Damag Biblia.

Ti kangrunaan a pamay-an dagiti Kristiano idi umuna a siglo a mangikasaba iti naimbag a damag ket iti “publiko ken iti binalaybalay.” (Aramid 20:20) Dagidiay nakiraman iti dayta a trabaho ket ministro. Karaman kadakuada dagiti babbai a kas ken Priscila, a kadua ni lakayna nga “ad-adda a siuumiso nga imbinsabinsada . . . ti dalan ti Dios” iti maysa a managbuteng-Dios a lalaki a di pay idi nabautisaran kas Kristiano. (Aramid 18:25, 26) Kas ken Febe, nabatad nga epektibo a ministro ni Priscila a kas met iti adu a babbai.

Maysa a Nadayaw nga Annongen

Ti kadi panangasaba iti publiko ket nababa nga annongen, a sumegunda laeng ti pategna isu a mabalin nga ipaannong kadagiti babbai bayat nga as-asikasuen dagiti lallaki ti napateg a trabahoda a panangidaulo iti kongregasion? Saan a pulos! Maigapu dayta iti dua a rason. Umuna, imbatad ti Biblia nga amin a Kristiano—karaman dagiti lallaki nga addaan nadagsen a responsabilidad iti kongregasion—ket makiraman iti panangasaba iti publiko. (Lucas 9:1, 2) Maikadua, ti panangasaba iti publiko ti kangrunaan a pamay-an idi ken agingga ita a dagiti Kristiano, babbai man wenno lallaki, maitungpalda ti bilin ni Jesus a ‘mangaramid iti ad-adalan kadagiti tattao iti amin a nasion ken mangisuro kadakuada.’—Mateo 28:19, 20.

Adda pay napateg nga akem dagiti babbai iti uneg ti kongregasion. Insurat ni Pablo: “Dagiti babbaket mararaem koma . . . mannursuro iti naimbag; tapno mapasublida dagiti agtutubo a babbai iti rikriknada nga ayatenda dagiti assawada, nga ayatenda ti annakda.” (Tito 2:3, 4) Gapuna, dagiti nataengan a babbai nga addaan kapadasan iti Nakristianuan a panagbiag pribilehioda a tulongan tapno agmataengan dagiti naub-ubing ken basbassit ti kapadasanda a babbai. Nadayaw ken nadagsen met dayta nga annongen.

Panangisuro iti Kongregasion

Nupay kasta, awan a pulos ti mabasa iti Biblia a nabilin dagiti babbai a tumakderda iti sango ti kongregasion tapno mangisuro. Imbes ketdi, kinuna ni apostol Pablo nga “agulimek koma dagiti babbai kadagiti panaggigimong.” Apay? Maysa a rason nga insuratna ket tapno maaramid nga “umno ken naurnos” ti amin a banag. (1 Corinto 14:34, 40, Ti Baro a Naimbag a Damag Biblia) Tapno naurnos ti kongregasion, maysa a grupo ti tinudingan ti Dios a mangisuro. Imutektekam ta saan a gapu ta lalaki ti maysa ket maipaayanen iti pribilehio a mangaywan iti kongregasion. Dagidiay laeng talaga a kualipikado ti pakaitalkan dayta a pribilehio.a—1 Timoteo 3:1-7; Tito 1:5-9.

Mangipababa kadi kadagiti babbai ti annongen nga impaay ti Dios kadakuada? Saan. Laglagipem a dinutokan ida ti Dios a mangaramid iti nagpateg a trabaho—ti panangikasaba maipapan kenkuana. (Salmo 68:11) Dagiti lallaki ken babbai a Saksi ni Jehova ita a ministro iti publiko ket natulongandan ti minilion nga agbabawi ken gumun-od iti pannakaisalakan. (Aramid 2:21; 2 Pedro 3:9) Saan a bastabasta dayta a naaramidanda!

Ti urnos para kadagiti lallaki ken babbai ket makatulong iti pannakataginayon ti talna ken mangipakita pay iti panagraem iti amin. Kas panangyilustrar: Dagiti matam ken lapayagmo ket agtinnulong tapno makaballasiwka iti aduan-lugan a kalsada. Umasping iti dayta, ti Dios paraburanna iti talna ti kongregasion no dagiti lallaki ken babbai aramidenda ti pagayatanna sigun iti annongen nga impaayna iti tunggal maysa kadakuada.—1 Corinto 14:33; Filipos 4:9.b

[Footnotes]

NAPANUNOTMO KADIN?

● Kasano a nangisuro dagiti babbai iti nagkauna a kongregasion Kristiano?—Aramid 18:26.

● Siasino dagiti nadutokan a mangaywan iti kongregasion?—1 Timoteo 3:1, 2.

● Ania ti panangmatmat ti Dios iti ministerio dagiti Kristiano a babbai ita?—Salmo 68:11.

[Blurb iti panid 29]

“Ni met laeng Jehova ipaayna ti sasao; dagiti babbai a mangibagbaga iti naimbag a damag ket dakkel a buyot.”—SALMO 68:11