Magagaranakon a Mangibaga Kadakuada, “Addatayo Aminen Ditoy!”
Kas Insalaysay ni Abigail Austin
Siam idi ti tawenko. Iti maysa a naariwanas nga aldaw idi Abril 1995, nagtutulag ti sumagmamano kadakami iti kongregasion dagiti Saksi ni Jehova iti lugarmi nga agpasiar iti maysa a probinsia ti England. Nagsisinakami iti nagluganan. Nagkakalugankami kada Tatang, Nanang, ni manangko a Sarah ken ni Deborah a gayyemmi. Pagammuan ta adda bumanesbes a lugan a sumungsungad iti ayanmi ket dinungparnakami. Sisiak ti nakalasat.
KALPASAN ti dua a lawas a kaaddak iti ospital, nagsubli ti puotko. Nabuong ti bangabangak ket nangikabil dagiti doktor kadagiti instrumento a pangsarapa iti dayta. Nupay kasta, nagbiit ti iyuungarko. Imbaga dagiti kabagianmi ti napasamak ngem diak pinati ida. Sangkapanunotko a bisbisitaendak dagiti nagannakko ken ni manangko isuna laeng ta mairana a matmaturogak no umayda. Idi laeng nakaawidakon a naamirisko a talaga nga awandan. Naldaanganak unay.
Ania ti nakatulong kaniak a mangdaer iti daytoy nakas-ang a trahedia?
Ti Naespirituan a Tawidko
Siak ti buridek iti lima nga agkakabsat. Idi napasamak ti aksidente, agtawen iti 22 ni Manang Sarah, 20 ni Manong Shane, 17 ni Manang Jessica, ken 15 ni Manong Luke. Nagsayaat ken nakadungdungngo ti nagannakmi. Ni tatangko nga Steve ket panglakayen iti West Yorkshire a kongregasion dagiti Saksi ni Jehova iti Shipley. Magusgustuan ti adu gapu ta kanayon a maiwayaanna ti dumngeg ken tumulong iti sabsabali. Adu met ti mangay-ayat ken ni nanangko a Carol ta kasla anak ti kinadungngona kadagiti lallakay ken babbaket iti kongregasion. Isu ti mangyur-urnos kadagiti party dagiti ubbing a kas kadakami ken tultulongannakami a maaddaan iti nasayaat a gagayyem. Pasangbayenmi ti amin iti balaymi. Sinuruandakami dagiti nagannakmi nga agbalin a nasingpet ken nakonsiderar met kadagiti kaarrubami.
Kada rabii ti Mierkoles nga agadalkami iti Biblia a sangapamiliaan. No dadduma, idramami dagiti pasamak a nadakamat iti Biblia ken agkaweskami iti maibagay kadagiti iyaktomi. Sipud pay idi ubbingkami, sinuruandakamin dagiti nagannakmi nga agsagana para kadagiti gimong iti kongregasionmi ken iti panangikasaba iti mensahe ti Biblia iti binalaybalay. Nupay makumikomda a mangged para kadakami a lima nga annakda, adda latta panawenda kadakami ken tinulongandakami a mangpatanor iti nasinged a relasion ken Jehova.
Idi nagturposen dagiti in-inauna a kakabsatko a da Sarah, Shane, ken Jessica, nagbalinda a payunir, wenno amin-tiempo a Kristiano a manangaskasaba. Kasta met ti inaramid ti gayyemmi a ni Deborah. Nakasingsingedak ken ni Manang Sarah. Kasla isu ti maikadua nga inak, ket no bakasionmi iti eskuelaan, agkaduakami a mapan mangisuro maipapan iti Biblia. Magusgustuak dagidi nga aldaw. Nakitak no kasano karagsak dagiti amin a payunir ket maay-ayatanak a makikadua kadakuada. Kalatko ti agpayunir a kadua ni Manang Sarah kalpasan a makagraduarak.
No bakasion, masansan nga agkakadua ti pamiliami ken ti dadduma a kakongregasionmi. Simminged ti panaggagayyem dagiti agtutubo ken natataengan. Diak man la idi napampanunot no kasano a makatulong ken makaliwliwa kaniak dagita a naimbag a gagayyem kadagiti masungad nga al-aldaw!
Kalpasan ti Aksidente
Idi nakaruarakon iti ospital, nagyanak idiay balaymi. Bayat nga agpaypayunir da Manong Shane ken Manang Jessica, inggaedda ti nagtrabaho iti part-time tapno masuportarandak ken ti bagida.
Adu met a padami a Saksi iti kongregasionmi ti simmaranay kadakami. Nagadu ti naitulongda kadakami! Impaayandakami iti taraon, ken inggatangandakami kadagiti kasapulanmi. Isuda ti nagdalus iti balaymi ken naglaba kadagiti kawesmi agingga a kabaelanmin ti tumakder a bukbukodmi. Kasta unay ti panagyamanmi. Nakaawatkami pay iti adu a kard ken regalo manipud kadagiti kapammatianmi iti nadumaduma a lugar. Nariknami ti kasta unay a panagayat ti organisasion ni Jehova.
Kalpasan ti agarup makatawen, napagnunumuan ti tallo a kakabsatko a nasken nga adda natalged a pamilia a pakaipoderak. Sumagmamano a naasi a pamilia iti kongregasion ti nangitukon iti tulongda, isu a nagsasaritaan ti kakabsatko no ania koma ti pampanunoten da Nanang ken Tatang a kasayaatan para kaniak ken iti naespirituan a masakbayak. Nakasaysayaat ti pamilia ni Billy a maysa a panglakayen ken ti asawana a ni Dawn. Nasingedda a gayyem ti pamiliami ken addaanda iti anak a babai a ni Lois a lima ti tawenna. Inawatdak iti pagtaenganda ket sipud idin, siaayat nga inaywanandak a kas bukodda nga anak. Nupay kabingaynakon ni Lois iti panagayat dagiti nagannakna, pulos a di nagimon kaniak ken agingga ita, nakasingsingedkami a kaskam la pudno nga agkabsat.
No Kasano a Nadaerak ti Trahedia
Idi damo, pinampanunotko no apay a napasamak daytoy nakas-ang a trahedia iti pamiliami, nangruna ta dagiti nagannakko agraman da Manang Sarah ken Deborah ipakpakitada ti panagayatda iti Dios ken iti padada a tattao. Ngem nalagipko ti salaysay ti Biblia maipapan ken Job, a nagtalinaed a matalek iti Dios nupay natayan iti annak. (Job 1:19, 22) Wen, ni Satanas ti nangyeg iti panagsagaba ken ipapatay ditoy lubong sipud pay idi damo, ket maragsakan no dayta a trahedia ti mangpasardeng kadakami nga agserbi iti Dios. (Genesis 3:1-6; Apocalipsis 12:9) Nalagipko met a siaayat nga impaayannatayo ni Jehova iti nagsayaat a namnama a panagungar. (Juan 5:28, 29) Makitaminto manen dagiti kapamiliami agraman ni Deborah inton paraison ti daga! Kinapudnona, rimmayray ketdi ti panagayatko ken Jehova.
No adda maam-ammok a nagpasar met kadagiti trahedia, maladingitanak unay no dida pay naammuan ti panagungar a nakapatpateg a kari ti Biblia. Dayta ti manggutugot kaniak a mangiranud iti namnamami, ta siguradoak a gapu laeng ken Jehova ken iti organisasionna a madadaeranmi daytoy nasaem a pagteng ta ammomi nga adda naraniag a namnama nga agur-uray kadakami.
Nalabit nakatulong met ti kapadasanmi iti sabali pay a wagas ta pinagpanunotna ti dadduma a nagannak, ‘Naipaayanmi ngatan dagiti annakmi iti nabileg a naespirituan a pundasion, a no adda man mapasamak kadakami, makapagtultuloyda latta nga agserbi ken Jehova uray awankamin?’
Ikagkagumaak ti agbiag a kasla sibibiag pay laeng da Tatang ken Nanang. Ammok a kayatda koma a napingetak a tumulong iti sabsabali kas iti ar-aramidenda idi. Sipud idi nalpasakon a nageskuela, rinugiakon ti agpayunir, ket duakami itan ken Lois nga agserserbi kas payunir. Nakiasawan ti tallo a kakabsatko ket siraragsak nga agserserbida ken Jehova kadagiti nakaikamenganda a kongregasion.
Segseggaak unayen ti baro a lubong ti Dios ken ti panagungar ta awanton ti ut-ot ken ipapatay! (Apocalipsis 21:3, 4) Gapu ta ammok nga agkakaduakaminto manen, inspiradoak nga agbiag iti laksid ti aniaman a mapasamak. Magagaranak unayen a mangarakup a siiirut kada Nanang, Tatang, Manang Sarah, ken ni Deborah ken mangibaga kadakuada: “Addatayo aminen ditoy!”
[Ladawan iti panid 23]
Ni Abigail (maikadua iti kannigid) ita ken ti pamilia a nangampon kenkuana