Am-ammuentayo ti Alpine Marmot

Nakangngegak iti napigsa a sagawisiw. Kasla sagawisiw ti maysa a barito no ayabanna ti gayyemna, ngem napigpigsa nga amang. Nagallangugan dayta iti kabambantayan isu a narigat a matukoy ti nagtaudanna. Idi kuan, nakakitaak iti bassit a burboran a kita ti utot a nagdardaras a simrek iti asideg nga abut. Dagus nga inukradko ti librok ket napaneknekak nga alpine marmot ti nakitak ken nangngegko.

SUMAGMAMANO la nga aldaw, adun ti naammuak maipapan kadagitoy burboran nga utot. Ammokon no ania a kabatuan ti kaykayatda a pagkainaran, no ayan ti kangrunaan nga abutda, ken no kasanoda nga agbiag iti narigat a kasasaad iti nangato a lugar nga awanan iti kaykayo.

Kinasiput ken Panagtitinnulong ti Sangapamiliaan

Narigat ti biag dagiti marmot kadagiti nangato a tay-ak iti kabambantayan (alpine). Nakalamlamiis no tiempo ti lam-ek ken adu a bulan nga agniebe ti pagnanaedanda. Agpeggadda met kadagiti tumatayab ken dadduma pay nga animal nga agkaan kadakuada. Nasken ngarud nga agtitinnulong, agplano, ken agbalinda a nasiput tapno agbiagda.

Kadawyanna nga agkakadua ti agkakapamilia a marmot a buklen ti pagassawaan ken ti annakda. Saan la a maysa ti abut ti tunggal pamilia—sabali ti pagnaedanda ken sabali dagiti paglemmenganda no adda peggad. No dadduma, agkutkotda iti abutda kadagiti rengngat iti sirok ti dadakkel a bato. Dagitoy a kasla kastilio a pagnanaedanda ti agserbi a pannakatorre a pagpaliiwan ken pagpainaranda.

Managdaldalus dagiti marmot. Sabali nga abut ti pannakakasiliasda isu a nadalus latta ti abut a pagnanaedanda. Iti ungto ti kangrunaan nga abutda, mangaramidda iti nalawlawa a paset nga ap-apanda iti ruot. Natalged daytoy a pagpasngayan ti kabaian. Naimeng met daytoy a pagkukotan ti intero a pamilia iti napaut a pannaturogda bayat ti tiempo ti lam-ek.

Nalabit ti agguardia ti addaan iti kapatgan a responsabilidad iti pamilia. Ti nataengan a marmot ti agguardia bayat nga agar-arab dagiti kapamiliana iti asideg. Tapno makitana no adda peggad, sagpaminsan a tumakder babaen iti kammaudina tapno nasaysayaat ti panagpaliiwna iti aglawlaw. Dagiti agila, atap nga aso, ken tattao ti kangrunaan a peggad kadagiti alpine marmot. Dagus nga agsagawisiw ti guardia a marmot no makitana dagita wenno aniaman a dakkel a tumatayab. Makapainteres ta naidumduma ti mamakdaar a sagawisiwna no adda agila—ti tumatayab a kangrunaan nga agkaan kadakuada. Apaman a mangngeg dagiti kapamiliana ti mamakdaar a sagawisiw, aglemmengda a dagus. Iti apagdarikmat, awanen ti makita a marmot iti aglawlaw!

Biag wenno ipapatay ti nalabit kaipapanan ti panagtulnogda nangnangruna kadagiti urbon a marmot, a paborito a kanen dagiti golden eagle. No umas-asidegen ti manganup kadakuada, aglemmengen ti guardia iti asideg nga abut agraman ti kakaduana. Kalpasan ti sumagmamano a minuto, siaannad a sumirip tapno masiertona nga awanen ti peggad.

Nasaysayaat a Temperatura ti Bagi ken Nargaan a Pannaturog

Kadagiti nangato a tay-ak a pagnanaedan dagiti alpine marmot, nalawa ti pagarabanda ken kalkalainganna ti pudot no kalgaw. No nalamiis ti paniempo, agkainaranda iti rabaw ti dakkel a bato. Ad-adda nga agproblemada no napudot tangay napuskol ti burborda. Gapuna, nakarkarantingda no bigbigat wenno malmalem.

Awan ti problemada iti pannaturog ta agarup innem a bulan a maturogda. Aginggat’ siam a bulan a maturog ti kabagianda a hoary marmot. Bayat ti napaut a pannaturogda, maminsan wenno mamindua laengen kada minuto nga agpitik ti pusoda ken bumaba iti agarup 5°C ti temperatura ti bagida. Nasken ngarud a saganaanda ti mabayag a dida pannangan. Bayat ti kalgaw ken rugrugi ti otonio, kaanda a kaan tapno makaurnong ti bagida iti taba a mausarda iti napaut a pannaturogda inton tiempo ti lam-ek.

Nagantil dagiti urbon a marmot ken masansan nga agkikinnamatda. Nakakitaak iti tallo nga urbon a nagtulidtulid iti naruot a bakras bayat nga aggiginnantilda. Agkikinnablaaw amin a marmot babaen ti panagdidinneppelda iti agong; agdidinnalus met dagiti agkakapamilia. No tiempo ti lam-ek, agdidinnippitda tapno dida malammin.

Dagiti marmot ket managsakbay ken nasiput iti peggad. (Job 12:7) Nalabit makasursuro dagiti pamilia ti tattao kadagitoy nga utot.

[Blurb iti panid 11]

Napimpintas ti tay-ak iti kabambantayan gapu iti kaadda dagiti marmot ken ti panagtitinnulongda a sangapamiliaan ti mangpaneknek iti kinasirib ti Namarsua.—Salmo 50:10

[Blurb iti panid 12]

Ti nataengan a marmot ti agguardia bayat nga agar-arab dagiti kapamiliana iti asideg