Panangmatmat iti Lubong
Dagiti Canadiano a managsirarak kayatda a maammuan dagiti epekto ti pornograpia kadagiti lallaki. “Nagbirokkami nga umuna iti lallaki nga agtawen iti 20-29 a di pay pulos nakabuya iti pornograpia,” kinuna ti maysa kadakuada, ngem “awan ti nasarakanmi.”—UNIVERSITY OF MONTREAL, CANADA.
Ti Burj Khalifa a kangatuan a pasdek iti lubong ket naisibbo idiay Dubai idi Enero ita a tawen. Ti kangatona ket 828 a metro ken nasurok a 160 ti kadsaaranna. Makita dayta iti kaadayo a 95 a kilometro.—GULF NEWS, UNITED ARAB EMIRATES.
“Awan serserbi ti Reform Judaism no saan a makibagay iti panagbalbaliw ti bambanag. Iti kallabes, nairaman kadagiti narelihiosuan a serbisioda ti naisangsangayan a kararag para kadagidiay agpapaopera tapno masukatan ti mabagbagida.”—THE NEW YORK TIMES MAGAZINE, U.S.A.
Ubbing a Di Makakomunikar
Saan a kas idi, manmanon ti gundaway dagiti nagannak a makitungtong kadagiti annakda bayat ti pannangan ken dandani dida payen maibasaan ida sakbay ti pannaturog. Kinuna ti The Times idiay London: “Mangrugi nga agadal dagiti ubbing iti elementaria a kasla maysa ket kagudua pay laeng ti tawenda no makisaoda ken umad-adu dagiti di makabukel kadagiti simple a sentensia.” Idiay Britania, “18% kadagiti ubbing nga agtawen iti 5 (nasurok a 100,000) ti di makapagsao sigun iti edadda.” Gapuna, adu nga ubbing ti “kasla ganggannaet iti klase” ta dida matarusan dagiti simple nga instruksion, dida maibaga dagiti kasapulanda, ken dida maawatan ti mapaspasamak.
Dagiti Simbaan Idiay Ireland—Awanan Papadi?
“Makitkitatayo a bumasbassiten ti bilang dagiti padi ti Iglesia Katolika,” kuna ti The Irish Times. Limapulo a tawenen ti napalabas, ti Ireland ti kaaduan iti papadi iti intero a lubong. Gapu ta lumaklakay ken dandanidan agretiro iti edad a 75, asidegen a maawanan iti padi ti dadduma a parokia. Sigun iti dadduma, ti puon daytoy a problema ket ti pannakaiparit iti panagusar kadagiti artipisial a panglapped iti panagsikog, a naipablaak idi 1968 iti Humanae Vitae a surat ti papa. Kinuna ti Times a gapu iti dayta a surat, “dagiti sursuro ti Simbaan ket kueskuestionaranen dagiti tattao,” ken idi agangay, “bimmassiten ti panagtalekda kadagiti panguluen iti relihion.”
Umak-akar ti Magnetic North Pole
Idi 1831, nadiskobre ti kaadda ti magnetic North Pole. Adda dayta iti makin-amianan a Canada, “agarup 2,750 a kilometro manipud iti geograpiko a North Pole,” kuna ti Pranses a periodiko a Le Figaro. Agingga idi 1989, ti magnetic North Pole ket umas-asideg iti geograpiko a North Pole iti kapartak a 5 agingga iti 15 a kilometro kada tawen. Sigun iti Paris Institute of Global Physics, umak-akaren ti magnetic pole iti “agarup 55 a kilometro iti kada tawen.” Idi 2007, ti distansiana manipud iti geograpiko a North Pole ket 550 a kilometro laengen. Iti kasta a kapartak ken turongenna, dagiti makin-amianan a lawag (aurora borealis) a kakuykuyog ti magnetic north ket “ad-addanton a makita idiay Siberia ngem iti Canada” inton 2020, kuna ti periodiko.